ខេត្តបន្ទាយមានជ័យ ៖ រឿងអាជ្ញាធរកាយជង្ហុកដែលខូចៗតាមដងផ្លូវបេតុង ដើម្បីជួសជុលថ្មី តែអាក់ខាន ព្រោះភ្លៀងបន្តធ្លាក់ជាបន្តបន្ទាប់ ហើយថ្ងៃមុនកោះសន្តិភាពបានចេញផ្សាយម្តងហើយ ពាក់ព័ន្ធការត្អូញត្អែររបស់ពលរដ្ឋជាអ្នកធ្វើដំណើរពេលយប់ ដែលព្រួយបារម្ភអំពីគ្រោះថ្នាក់ចរាចរណ៍ តែទីបំផុតកាលពីរំលងអធ្រាត្រឈានចូលព្រឹកថ្ងៃទី១៥ សីហានេះមានករណីមួយបានកើតឡើង គឺមនុស្ស៣នាក់បានជួបហេតុគ្រោះថ្នាក់ចរាចរណ៍ជិះម៉ូតូបុកពំនូកដីកណ្តាលទ្រូងផ្លូវ បណ្តាលឲ្យរងរបួសធ្ងន់ស្រាល ។
ហេតុការណ៍គ្រោះថ្នាក់ចរាចរណ៍នេះកើតឡើងលើដងផ្លូវបេតុង ក្នុងភូមិមិត្តភាព សង្កាត់ និងក្រុងប៉ោយប៉ែតខាងត្បូង ជាប់នឹងសាលាអនុវិទ្យាល័យប៉ោយប៉ែតក្រុង ឬហៅសាលា២ជាន់ ។ យ៉ាងណាក៏ដោយជនរងគ្រោះមកទល់ និងរសៀលថ្ងៃទី១៥ សីហានេះ នគរបាលជំនាញចរាចរណ៍នៃអធិការដ្ឋាននគរបាលក្រុងប៉ោយប៉ែតប្រាប់ថា មិនទាន់ស្គាល់អត្តសញ្ញាណនៅឡើយទេ គឺក្រោយកើតហេតុត្រូវគេបញ្ជូនទៅមន្ទីរពេទ្យបង្អែកក្រុងប៉ោយប៉ែត ។
ចំណែកម៉ូតូរងគ្រោះត្រូវបានសមត្ថកិច្ចជំនាញនាំយកទៅរក្សាទុកនៅអធិការដ្ឋាននគរបាលក្រុងបណ្តោះអាសន្ន ។ សមត្ថកិច្ចប្រាប់ថា បញ្ហាខាងលើ គឺកើតឡើងដោយសារការដ្ឋានសាងសង់ផ្លូវពុំមានដាក់ស្លាកសញ្ញាសម្គាល់ និងគ្មានភ្លើងបំភ្លឺ ។ យ៉ាងណាក៏ដោយជង្ហុកជាច្រើនតាមដងផ្លូវបេតុងកាត់មុខសាលាសង្កាត់ប៉ោយប៉ែតត្រូវបានអាជ្ញាធរអភិវឌ្ឍន៍ទាំងភ្លៀង បានជាច្រើនកន្លែងហើយផងដែរ ។
ដើម្បីបញ្ជៀសគ្រោះថ្នាក់ចរាចរណ៍កុំឲ្យកើតមានតទៅទៀតគប្បីអាជ្ញាធរដាក់ស្លាកសញ្ញា ឬភ្លើងបំភ្លឺតាមទីតាំងជង្ហុកដែលមិនទាន់អភិវឌ្ឍន៍ផង ៕
ចែករំលែកព័តមាននេះ