ខេត្តបន្ទាយមានជ័យ ៖ ជនសង្ស័យម្នាក់ដែលគេក្របួចបានហើយត្រូវជនជាតិឥណ្ឌូនេស៊ីតាមវាយផ្អើលនៅប្លុកកាស៊ីណូក្នុងភូមិក្បាលស្ពាន១ សង្កាត់ប៉ោយប៉ែត ក្រុងប៉ោយប៉ែត កាលពីយប់ថ្ងៃទី១៤ សីហា ឆ្នាំ២០១៨ ជាប់ចោទលួចម៉ូតូត្រូវបានស្គាល់អត្តសញ្ញាណហើយ។
ជនសង្ស័យខាងលើឈ្មោះប៊ុន ធឿន ភេទប្រុស អាយុ២៤ឆ្នាំ ស្នាក់នៅភូមិក្បាលស្ពាន១ សង្កាត់ប៉ោយប៉ែត ក្រុងប៉ោយប៉ែត ។
តាមប្រភពព័ត៌មានបានឱ្យដឹងថា ជនសង្ស័យខាងលើត្រូវបានក្រុមកម្មករធ្លាប់រួមអាជីពជាមួយគ្នាតាមចាប់បាន ហើយគេឃើញជនជាតិឥណ្ឌូណេស៊ីម្នាក់ដែលជាថៅកែតាមវាយ ព្រោះតែខឹងនឹងជនសង្ស័យម្នាក់នេះលួចម៉ូតូនៅចំណុចធ្វើការក្នុងប្លុកកាស៊ីណូនាពេលកន្លងមក។
តាមរបាយការណ៍របស់នគរបាលក្រុងប៉ោយប៉ែតបានឱ្យដឹងថា មុនឈានដល់ការឃាត់ខ្លួននេះ ជនសង្ស័យខាងលើបានលួចម៉ូតូរបស់ឈ្មោះកែ សុក្រិត ភេទប្រុស អាយុ២៦ឆ្នាំ លុះតាមរកឃើញក៏ចាប់ជនសង្ស័យខាងលើប្រគល់ឱ្យសមត្ថកិច្ចតែម្តង។ ក្រោយការឃាត់ខ្លួន ជនសង្ស័យបានសារភាពថា ខ្លួនពិតជាបានលួចម៉ូតូរបស់ជនរងគ្រោះខាងលើប្រាកដមែន។
គួរបញ្ជាក់ថា ម៉ូតូដែលជនសង្ស័យលួចបានយកទៅលក់ឱ្យគេនៅឯស្រុកអូរជ្រៅ ខេត្តបន្ទាយមានជ័យ ប៉ុន្តែដោយពុំមានឯកសារគ្រប់គ្រាន់ អ្នកទិញក៏នាំទៅជួបសមត្ថកិច្ចដើម្បីឱ្យជួយដឹងឮ ។ ផ្ទុយទៅវិញ ជនសង្ស័យបែរជាកុហកថា ខ្លួនទៅយកឯកសារម៉ូតូឱ្យ ដឹងអីក្រោយចាកចេញមិនឃើញវិលត្រឡប់មកវិញឡើយ លុះម្ចាស់ម៉ូតូចាប់ជនសង្ស័យខាងលើបានប្រគល់ឱ្យសមត្ថកិច្ច ទើបដឹងថា ឈ្មោះប៊ុន ធឿន ជាជនសង្ស័យដែលបានលួចម៉ូតូគេយកទៅលក់នៅស្រុកអូរជ្រៅ។
ម៉ូតូម៉ាកហ្វីណូមួយគ្រឿងមិនស្គាល់ម៉ាកដែលត្រូវជនសង្ស័យលួចយកទៅលក់នៅស្រុកអូរជ្រៅ ដោយមានការសង្ស័យ ហើយត្រូវបានសមត្ថកិច្ចដកហូតទុកនោះ ត្រូវបានប្រគល់ជូនម្ចាស់ម៉ូតូវិញហើយកាលពីថ្ងៃទី១៥ សីហានេះ។
ដោយឡែកជនសង្ស័យត្រូវបានលោកវរសេនីយ៍ឯក ធិន ស៊ិនដេត អធិការនគរបាលក្រុងប៉ោយប៉ែតប្រាប់ថានឹងបញ្ជូនទៅស្នងការដ្ឋាននគរបាលខេត្តដើម្បីចាត់ការបន្តតាមនីតិវិធី ៕
ចែករំលែកព័តមាននេះ