រាជធានីភ្នំពេញ ៖ មហារីកថ្លើមគឺជាជំងឺធ្ងន់ធ្ងរឈានមុខគេលេខ១ ដែលកំពុងតែកើត មានលើបុរសខ្មែរ ហើយអ្វីដែលកាន់តែអាក្រក់នោះ គឺភាគច្រើននៃអ្នកជំងឺកើតមហារីកថ្លើម ភាគច្រើនបំផុតគឺទៅទទួលការព្យាបាលនៅដំណាក់កាលហួសពេល មិនអាចជាសះបាន គឺបានត្រឹមតែការព្យាបាលសម្រន់…
រាជធានីភ្នំពេញ ៖ មហារីកថ្លើមគឺជាជំងឺធ្ងន់ធ្ងរឈានមុខគេលេខ១ ដែលកំពុងតែកើត មានលើបុរសខ្មែរ ហើយអ្វីដែលកាន់តែអាក្រក់នោះ គឺភាគច្រើននៃអ្នកជំងឺកើតមហារីកថ្លើម ភាគច្រើនបំផុតគឺទៅទទួលការព្យាបាលនៅដំណាក់កាលហួសពេល មិនអាចជាសះបាន គឺបានត្រឹមតែការព្យាបាលសម្រន់ ឬពន្យាជីវិតតែប៉ុណ្ណោះ ព្រោះជំងឺមហារីកថ្លើម កម្រនឹងចេញជារោគសញ្ញាឲ្យអ្នកបានដឹងខ្លាំងណាស់នៅដំណាក់កាលដំបូងៗនោះ ។
លោកវេជ្ជបណ្ឌិត អ៊ាវ សុខា ប្រធានផ្នែកមហារីក និងជំងឺឈាមនៃមន្ទីរពេទ្យកាល់ម៉ែតមានប្រសាសន៍ឲ្យដឹងថា ជំងឺមហារីកចំនួន ៥ ដែលកើតញឹកញាប់ជាងគេបំផុតលើបុរសខ្មែរ និងបានសម្លាប់ប្រជាពលរដ្ឋខ្មែរយ៉ាងស្ងៀមស្ងាត់បំផុតនោគឺ មាន៖ (១) – មហារីកថ្លើម, (២) – មហារីកសួត, (៣) – មហារីកក្រពះ , (៤) – មហារីកពោះវៀនធំ និង (៥) – មហារីកកូនកណ្ដុរ ។
នៅពេលសាកសួរថា តើជំងឺមហារីកថ្លើម អាចទទួលបានការព្យាបាលជាឬអត់ វេជ្ជបណ្ឌិត អ៊ាវ សុខា ថ្លែងបញ្ជាក់យ៉ាងដូច្នេះថា៖ «និយាយមែនទែនទៅ ការព្យាបាលជំងឺមហារីកថ្លើមឲ្យជាសះ សឹងតែអត់តែម្តង មានន័យថា គឺ ៩៩.៩៩ ភាគរយហើយ គឺអត់ជាទេ ។ ប៉ុន្តែយើងអាចធ្វើ ការព្យាបាលពន្យាជីវិតបាន ៥ ឆ្នាំ គឺបាន ៥០%»។
(១) – ដូរថ្លើម ៖ គឺកាត់ថ្លើមទាំងមូលចេញដែលជាថ្លើមឈឺនោះចេញដាក់ថ្លើមថ្មី ។ ដែលនេះជាវិធីទំនើបជាងគេបំផុត ប៉ុន្តែអស់ថវិកាច្រើនណាស់ ហើយគ្រោះថ្នាក់ដល់ជីវិតក៏ខ្ពស់ដែរ »។ តាមរយៈវិធីនៃការព្យាបាលបែបនេះ គឺគេយកថ្លើមបរិច្ចាគតែ ៦០% ពីអ្នកបរិច្ចាគ យកទៅដាក់ជំនួសឲ្យថ្លើមរបស់អ្នកជំងឺដែលខូច អញ្ចឹង ១ ឆ្នាំក្រោយវានឹងដុះជិតពេញវិញ ហើយអ្នកដែលបរិច្ចាគថ្លើមឲ្យទៅអ្នកជំងឺក៏ដុះថ្លើមជិតវិញដែរ ។
ប៉ុន្តែមិនមែនជាអត់ប៉ះពាល់សុខភាពសោះនោះទេ គឺវាប៉ះពាល់ដែលមានន័យថា អ្នកជំងឺក្រោយពីដាក់ថ្លើមនឹងហើយ ត្រូវព្យាបាលដោយលេបថ្នាំ ធ្វើម៉េចការពារឲ្យថ្លើមនោះកុំឲ្យវាខូច អញ្ចឹងត្រូវព្យាបាលដោយថ្នាំរាប់ឆ្នាំទៀត ដើម្បីមានជីវិតរស់ ប៉ុន្តែសុខភាពគឺមួយថ្ងៃកាត់ មួយថ្ងៃកោរ គ្រាន់តែថាគឺជីវិតនៅរស់បាន ៥ ឬ ៦ ឆ្នាំបន្ត តែវាអាចប្រឈមនឹងការកើតមហារីកថ្លើម លើថ្លើមថ្មីនឹងផងដែរ។
(២) – វះកាត់ដុំសាច់ ៖ ឧបមាថាមហារីកថ្លើមនឹងរកឃើញនៅតូច ទំហំ២ ឬ ៣ សង់ទីម៉ែត្រ មានន័យថា ក្រោម ៥ សង់ទីម៉ែត្រ។ ហើយថ្លើមគេចែកចេញជាពីរកង់ធំៗគឺ ខាងឆ្វេង និងខាងស្តាំ ។ បើសិនជាវាកើតនៅខាងឆ្វេង គឺភាគច្រើនពេទ្យវះបាន ដោយកាត់យកខាងថ្លើមផ្នែកខាងឆ្វេងចេញ អញ្ចឹងនៅសល់ថ្លើមខាងស្តាំ ។ ក្រោយពីកាត់ចេញហើយ យើងឲ្យគាត់លេបថ្នាំគ្រាប់ រយៈពេល ២ ឆ្នាំទៀត ។ វិធីនេះក៏ជួយឲ្យអ្នកជំងឺខ្លះ អាចពន្យារស់បាន ៤ ទៅ ៥ ឆ្នាំដែរ ។
លោកវេជ្ជបណ្ឌិតបញ្ជាក់ថា ៖ «ប៉ុន្តែបើសិនដុំសាច់មហារីកកើតនៅថ្លើមផ្នែកខាងស្តាំវិញ យើងកាត់ខាងស្តាំចោលតែម្តង គឺអត់បានទេ ព្រោះបើកាត់គឺគ្រោះថ្នាក់ដល់ជីវិតតែម្តង អញ្ចឹងយើងកាត់បានតែមួយជ្រុងតូចមួយ ។ តែបើកាត់យកចេញមួយ រយៈពេល ៣ ទៅ ៤ ខែនឹងដុះ ២ ឬ៣ដុំទៀត។ អញ្ចឹងការព្យាបាលរបៀបនឹងវាអត់សូវបានផល អស់តែលុយអ្នកជំងឺ ។ បើអត់វះរស់បានមួយឆ្នាំ មិនបាច់វះ តែបើវះអ្នកជំងឺគ្រាន់តែស្ងប់ចិត្ត តែប៉ុណ្ណោះ តែអស់លុយច្រើនណាស់»។
៣- ដុតបំផ្លាញដុំមហារីក ៖ វិធីមួយទៀត គឺនៅបណ្តាប្រទេសខ្លះក៏ដូចជាប្រទេសយើង គឺអ្នកខ្លះក៏ចាប់ផ្តើមធ្វើការចាក់ថ្នាំ ចូលដល់ដុំនៅក្នុងថ្លើមនឹងតែម្តង ឬក៏ប្រើរលកសម្លេង ដែលមានប្រេ្វកង់ខ្ពស់ ដុតកំដៅដើម្បីរំលាយដុំមហារីក ។ នេះជាវិធីសាស្ត្រព្យាបាលដើម្បីឲ្យអ្នកជំងឺស្ងប់ចិត្ត អត់អាចពន្យាជីវិតអីបានទេ ។ ពេលចាក់ទៅដុំនឹងរលួយអស់ទៅ តែ ២ ឬ ៣ ខែក្រោយ នឹងដុះ ២ ឬ ៣ ដុំទៀត ។ យើងអត់ដឹងថា នៅក្នុងថ្លើមទាំងមូល ជិត ២ តឹកនឹង តើមានដុំមហារីកនៅចំនុចណាខ្លះ អត់ដឹង ចេះតែដុតៗនាំឲ្យរលួយថ្លើម ។ តែវិធីនេះក៏អត់មាន ប្រសិទ្ធភាពអីពន្យាជីវិតអ្នកជំងឺដែរ គ្រាន់តែធ្វើទៅធ្វើឲ្យអ្នកជំងឺស្ងប់ចិត្ត និងអន់ឈឺ ឬហៅថា ការព្យាបាលសម្រន់។
៤ – មធ្យោបាយមួយទៀត គឺលេបថ្នាំមហារីកថ្លើម ឬជួនកាលគេអាចព្យាបាលដោយកាំរស្មី ៖ ប្រើបច្ចេកវិទ្យាទំនើបចុងក្រោយ សម្រាប់ការព្យាបាលដោយកាំរស្មី គឺអាចពន្យាជីវិតឲ្យអ្នកជំងឺ បានប្រហែល ២ ទៅ ៣ ឆ្នាំ ។ សម្រាប់វិធីនេះ គឺអ្នកជំងឺអស់លុយតិច អ្នកជំងឺអត់ប្រឈមមុខនឹង គ្រោះថ្នាក់ដល់ជីវិត គុណភាពជីវិតអ្នកជំងឺល្អ ហើយពន្យាជីវិតបានយូរ ៕
អត្ថបទនេះនាំជូនមកដោយក្រុមហ៊ុនធានារ៉ាប់រងជីវិត AIA
ចែករំលែកព័តមាននេះ