ខេត្តបន្ទាយមានជ័យ ៖ ជនសង្ស័យចែកចាយ និងប្រើប្រាស់គ្រឿងញៀនចំនួន៧នាក់ត្រូវបានកម្លាំងនគរបាលក្រុងប៉ោយប៉ែតធ្វើការបង្ក្រាបជាបន្តបន្ទាប់ក្នុងរយៈពេល២ថ្ងៃគឺថ្ងៃទី១២-១៣ សីហា ឆ្នាំ២០១៨ នៅសង្កាត់ផ្សារកណ្តាល និងសង្កាត់ប៉ោយប៉ែត។ តាមរបាយការណ៍សមត្ថកិច្ចបានឱ្យដឹងថា ដំបូងកម្លាំងប៉ុស្តិ៍រដ្ឋបាលផ្សារកណ្តាលចុះល្បាតកាលពីរសៀលថ្ងៃទី១២…
ខេត្តបន្ទាយមានជ័យ ៖ ជនសង្ស័យចែកចាយ និងប្រើប្រាស់គ្រឿងញៀនចំនួន៧នាក់ត្រូវបានកម្លាំងនគរបាលក្រុងប៉ោយប៉ែតធ្វើការបង្ក្រាបជាបន្តបន្ទាប់ក្នុងរយៈពេល២ថ្ងៃគឺថ្ងៃទី១២-១៣ សីហា ឆ្នាំ២០១៨ នៅសង្កាត់ផ្សារកណ្តាល និងសង្កាត់ប៉ោយប៉ែត។
តាមរបាយការណ៍សមត្ថកិច្ចបានឱ្យដឹងថា ដំបូងកម្លាំងប៉ុស្តិ៍រដ្ឋបាលផ្សារកណ្តាលចុះល្បាតកាលពីរសៀលថ្ងៃទី១២ សីហា ២០១៨ ក្នុងភូមិសាស្ត្រភូមិផ្សារកណ្តាល សង្កាត់ផ្សារកណ្តាល ប្រទះឃើញសង្ស័យម្នាក់ឈ្មោះឆោម ម៉ាន់ ភេទប្រុស អាយុ២២ឆ្នាំ មានទីលំនៅក្នុងភូមិ និងសង្កាត់ផ្សារកណ្តាល ក្រុងប៉ោយប៉ែត ពេលធ្វើការត្រួតពិនិត្យរកឃើញម្សៅក្រាមពណ៌សថ្លា ចំនួន១កញ្ចប់។
ក្រោយការសាកសួរ សមត្ថកិច្ចឈានទៅឃាត់ខ្លួនជនសង្ស័យជួញដូរគ្រឿងញៀនម្នាក់ទៀតឈ្មោះសុខ ចិន ហៅឆៃ ភេទប្រុស អាយុ៣៥ឆ្នាំ មានទីលំនៅភូមិផ្សារកណ្តាល សង្កាត់ផ្សារកណ្តាល ដកហូតបានម្សៅក្រាមពណ៌សថ្លាចំនួន២កញ្ចប់តូច នៅវេលាម៉ោងជាង៥ល្ងាចថ្ងៃទី១៣ ខែសីហា ឆ្នាំ២០១៨ នៅចំណុចផ្លូវបេតុងក្បែរសណ្ឋាគារលីហេងឆាយ ក្នុងភូមិបាលិលេយ្យ២ សង្កាត់ប៉ោយប៉ែត។
ក្រោយពីឃាត់ខ្លួនជនសង្ស័យទាំងពីរនាក់ខាងលើរួចមក នៅល្ងាចថ្ងៃដដែល កំលាំងជំនាញប្រឆាំងបទល្មើសគ្រឿងញៀនក្រុងប៉ោយប៉ែត បានសហការជាមួយកំលាំងប៉ុស្តិ៍រដ្ឋបាលសង្កាត់ផ្សារកណ្ដាលបន្តឃាត់ខ្លួនជនសង្ស័យប្រើប្រាស់គ្រឿងញៀនបានចំនួន៥នាក់ទៀតរួមមាន ១-ឈ្មោះសួស ចាន់ ភេទប្រុស អាយុ២១ឆ្នាំ មុខរបរកម្មករ ស្នាក់នៅភូមិ ផ្សារកណ្ដាល សង្កាត់ផ្សារកណ្ដាល ក្រុងប៉ោយប៉ែត ខេត្តបន្ទាយមានជ័យ ២-ឈ្មោះឌឹម វិន ភេទប្រុស អាយុ២២ឆ្នាំ មុខរបរកម្មករ ស្នាក់នៅភូមិផ្សារកណ្ដាល សង្កាត់ផ្សារកណ្ដាល ក្រុងប៉ោយប៉ែត ខេត្តបន្ទាយមានជ័យ ៣-ឈ្មោះ សេង កីឡាប ភេទប្រុស អាយុ២៩ ឆ្នាំ មុខរបរកម្មករ ស្នាក់នៅភូមិក្បាលស្ពាន១ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ ៤-ឈ្មោះ ហង្ស គី ភេទប្រុស អាយុ២៣ឆ្នាំ មុខរបរកម្មករ ស្នាក់នៅភូមិផ្សារកណ្ដាល សង្កាត់ផ្សារកណ្ដាល ក្រុងប៉ោយប៉ែត ខេត្តបន្ទាយមានជ័យ និង៥-ឈ្មោះហេង ភី ភេទប្រុសអាយុ២៨ឆ្នាំ កម្មករលីស៊ីម៉ង់ត៍ ស្នាក់នៅភូមិផ្សារកណ្ដាល សង្កាត់ផ្សារកណ្ដាល ក្រុងប៉ោយប៉ែត។
លោកវរសេនីយ៍ឯក ធិន ស៊ិនដេត អធិការនគរបាលក្រុងប៉ោយប៉ែតប្រាប់តាមទូរស័ព្ទថា ក្រោយសាកសួរនិងធ្វើកំណត់ហេតុរួច ជនសង្ស័យទាំង៧នាក់ រួមនឹងវត្ថុតាងថ្នាំញៀន ត្រូវបានសមត្ថកិច្ចកសាងសំណុំរឿងបញ្ជូនទៅការិយាល័យជំនាញនៃស្នងការដ្ឋាននគរបាលខេត្តដើម្បីចាត់ការបន្តតាមនិតិវិធីច្បាប់នៅរសៀលថ្ងៃទី១៤ សីហានេះ ៕
ចែករំលែកព័តមាននេះ