ខេត្តស្ទឹងត្រែង ៖ រឿងរា៉វក្នុងលោកអ្វីក៏អាចកើតឡើងបានដែរ និងមានគ្រប់រូបភាព ។ ប៉ុន្តែរឿងរ៉ាវមួយដែលមិនគួរគិតតែខ្លួនឯង ហើយបំភ្លេចក្តីសុខរបស់អ្នកដទៃនោះ គឺស្នេហាមិនអាចចែកគ្នាបានទេ ព្រោះជារឿងបេះដូង ។…
ខេត្តស្ទឹងត្រែង ៖ រឿងរា៉វក្នុងលោកអ្វីក៏អាចកើតឡើងបានដែរ និងមានគ្រប់រូបភាព ។ ប៉ុន្តែរឿងរ៉ាវមួយដែលមិនគួរគិតតែខ្លួនឯង ហើយបំភ្លេចក្តីសុខរបស់អ្នកដទៃនោះ គឺស្នេហាមិនអាចចែកគ្នាបានទេ ព្រោះជារឿងបេះដូង ។
ដោយសារតែការបំពានបេះដូងនេះ ទើបរឿងរ៉ាវមួយបង្កឱ្យមានការភ្ញាក់ផ្អើលឆោឡោនៅកែងផ្លូវបំបែកអូរពងមាន់ គ្រាដែលបុរសម្នាក់កំពុងដឹកស្ត្រីមានកូននៅលើរ៉ឺម៉កម៉ូតូឆ្លងផ្លូវបំបែក ក៏ត្រូវស្ត្រីម្នាក់ផ្សេងទៀតស្ទុះមកចាប់ទាញចង្កេះខោដោយអះអាងថា «បុរសរូបនេះ បានចុះចេញពីផ្ទះបាត់២ឆ្នាំមកហើយ ដោយគ្មានដំណឹង មិននឹកស្មានថា មកលួចមានប្រពន្ធចុង ភ្លេចប្រពន្ធដើម និងកូនដូច្នេះសោះ ។ ហេតុការណ៍នេះ បានកើតឡើងកាលពីថ្ងៃទី១១ ខែសីហាកន្លងទៅ នៅម្តុំផ្លូវបំបែកអូរពងមាន់ ចម្ងាយពីទីរួមខេត្តប្រមាណ១៨គីឡូម៉ែត្រ ។
ប្រភពព័ត៌មាននៅកន្លែងកើតហេតុឱ្យដឹងថា គ្រាដំបូង គេឃើញស្ត្រីម្នាក់ក្នុងសម្លៀកបំពាក់ពណ៌ទឹកប៊ិក ស្ពាយកាបូប បង់កក្រមា បានស្ទុះទៅទាញចាប់ចង្កេះខោបុរសម្នាក់ ពេលកំពុងបើកបររ៉ឺម៉កម៉ូតូដឹកស្ត្រីម្នាក់ដែលមានកូនតូចក្នុងដៃផង ដោយស្រែកឆោឡោឡើងថា «បាត់ពីផ្ទះខ្ញុំដើររក២ឆ្នាំហើយ បែរជាពង្រត់ស្រីនេះមកស្ទឹងត្រែងសោះ តោះឥឡូវទៅផ្ទះវិញ» ។ ប្រឈមមុខនឹងប្រពន្ធតាមទាន់ បុរសសម្បុរខ្មៅសម្បូរស្នេហ៍ម្នាក់នេះ ប្រតិកម្មរហ័សឆ្លើយភ្លាមៗថា «អញអត់ទៅទេ គេមានកូនហើយចោលគេមិនបានទេ» ។
ប្រភពដដែលបន្តថា ស្ត្រីម្នាក់ស្លៀកខោជើងវែង ពាក់អាវដៃវែង ពណ៌ទឹកប៊ិក ពេលប្រទាញប្រទង់ចាប់ទាញចង្កេះខោបុរសសម្បុរខ្មៅជាប្តីបានអះអាងនៅចំពោះមុខមហាជនថា ខ្ញុំជាប្រពន្ធដើមរបស់គាត់ រស់នៅខេត្តកំពង់ចាម បានដើររកគាត់ជាប្តីអស់រយៈ២ឆ្នាំមកហើយក្រោយបាត់ពីផ្ទះ មិនដឹងទៅដល់ទីណា ប៉ុន្តែបែរជាមកប្រទះឃើញដឹកស្រីនៅស្ទឹងត្រែងធ្វើព្រងើយ។ខ្ញុំមិនធ្វើអ្វីគាត់នោះទេ ខ្ញុំត្រូវតែឱ្យគាត់ទៅផ្ទះវិញ ។ ចំណែកបុរសជាប្តី បានបដិសេធដាច់ខាតថាគាត់មិនព្រមទៅវិញទេ ព្រោះការជ្រើសយកស្ត្រីក្រោយបានជាមានកូនមានចៅទៅហើយ មិនអាចបោះបង់គេបានទេ ។
រឿងរ៉ាវខាងលើធ្វើឱ្យមជ្ឍដ្ឋាននានារិះរកដំណោះស្រាយមិនចេញ ដោយម្ខាងជាប្រពន្ធដើមរីឯម្ខាងទៀតជាប្រពន្ធចុង ។ ទោះយ៉ាងណាស្ត្រីជាប្រពន្ធដើមមិនផ្ទុះកំហឹងទៅលើស្ត្រីជាប្រពន្ធចុងនោះទេ ខណៈប្រពន្ធចុងនៅអង្គុយបីកូនលើរ៉ឺម៉កម៉ូតូ ដោយគ្មានវាចាមួយម៉ាត់ឡើយ ៕
ចែករំលែកព័តមាននេះ