រាជធានីភ្នំពេញ-បាងកក ៖ ជាមួយនឹងការរីកចម្រើនផ្នែកបចេ្ចកវិទ្យាជាយុគសម័យទំនើប វិស័យវេជ្ជសាស្ត្រ និងបច្ចេកវិទ្យាក៏បានវិវដ្តយ៉ាងខ្លាំងសម្រាប់ការព្យាបាលជំងឺធ្ងន់ធ្ងរ តួយ៉ាងការព្យាបាលជំងឺមហារីកជាដើម តាមរយៈការព្យាបាលបែបជឿនលឿនថ្មីមួយដែលហៅថា « Cancer Immunotherapy» ។
លោកវេជ្ជបណ្ឌិត អ៊ាវ សុខា ប្រធានផ្នែកមហារីក និងជំងឺឈាមនៃមន្ទីរពេទ្យកាល់ម៉ែត បានឲ្យដឹងថា វិធីថ្មីៗនេះ គឺពេញនិយមមែនទែននៅឆ្នាំ២០១៧ និង ២០១៨។ នៅលើពិភពលោកគេហៅ Earthquake of Immunotherapy ។ មានន័យថា Immunotherapy នឹងត្រូវបានគេប្រើឡើងរង្គើផែនដី ដោយសារតែវាជាការព្យាបាលបែបជឿនលឿនថ្មីមួយសម្រាប់អ្នកកើតជំងឺមហារីក ។
លោកវេជ្ជបណ្ឌិត អ៊ាវ សុខា មានប្រសាសន៍បញ្ជាក់ថា៖ «សម្រាប់ការព្យាបាលបែប Cancer Immunotherapy គឺថ្លៃខ្លាំងណាស់ ហើយគេទុកវាជាជម្រើសចុងក្រោយ ។ គឺថា គេមានឱសថមួយ ដែលអ្នកប្រាជ្ញទើបរកឃើញ ។ ជាក់ស្តែងការព្យាបាលជំងឺមហារីកថ្លើមជាដើម តាមរយៈការប្រើប្រាស់ Cancer Immunotherapy គឺពេលចាក់ចូលទៅក្នុងខ្លួនអ្នកជំងឺមហារីកថ្លើម វាជ្រាបចូលទៅក្នុងកោសិកាមហារីកថ្លើម ហើយវាទៅជាបង្កើតកម្មវិធីស្លាប់ឲ្យកោសិកាមហារីកថ្លើម ។ អញ្ចឹងកោសិកាមហារីកថ្លើម វានឹងស្លាប់ដូចកោសិកាធម្មតា ដូច្នេះក្នុងរយៈពេលមួយនោះ ៣ អាទិត្យ ឬក៏ ៣៦ ថ្ងៃ ក្រោយមក កោសិកាមហារីកវាស្លាប់ ហើយដល់ពេលវាស្លាប់ទៅ ដុំមហារីកវានឹងរួមតូច វាអត់អាចស្លាប់អស់ទេកោសិកាមហារីកថ្លើម ប៉ុន្តែវារួមតូច អញ្ចឹងអ្នកជំងឺរស់បានយូរ»។
លោកវេជ្ជបណ្ឌិតបញ្ជាក់ថា យ៉ាងណាមិញគេរកឃើញថា តាមរយៈការប្រើប្រាស់ការព្យាបាលបែបនេះ គឺមានអ្នកជំងឺខ្លះគេធ្វើការសិក្សាទៅគឺអាចរស់បាន ៥ ឆ្នាំ ទៅ១០ ឆ្នាំក៏មានដែរ ។ ការឆ្លើយតបជាមួយថ្នាំ គឺថ្នាំនេះជាឱសថទំនើបជាងគេបំផុតនៅឆ្នាំ ២០១៨ នេះ ហើយជាឱសថដែលថ្លៃមហាថ្លៃ។ ជាប្រភេទថ្នាំចាក់ ។
លោក រ៉ាតាភុង អាមហានវង់ (Ratapong Ambhanwong) អនុប្រធានមន្ទីរពេទ្យ Bangkok Hospital នៅទីក្រុងបាងកក ប្រទេសថៃ បានឲ្យដឹងដូចគ្នាផងដែរថា ក្រុមគ្រូពេទ្យជំនាញ មុននឹងសម្រេចចិត្តជ្រើសរើសការព្យាបាលបែប Cancer Immunotherapy គឺទាមទារឲ្យមានការតាមដាន និងប្រជុំគ្នាជាមួយនឹងគ្រូពេទ្យជំនាញៗជាច្រើនរូប ដើម្បីធ្វើការសម្រេចចិត្តថា ការព្យាបាលបែបនេះគួរតែធ្វើជូនអ្នកជំងឺដែលកើតមហារីកឬក៏យ៉ាងណា ។
លោក រ៉ាតាភុង អាមហានវង់ មានប្រសាសន៍បញ្ជាក់យ៉ាងដូច្នេះថា៖ «ប្រាកដណាស់ នៅមន្ទីរពេទ្យយើងខ្ញុំគឺមានការព្យាបាលតាមបែប Cancer Immunotherapy ។ ជាថ្មីម្តងទៀតគឺចង់បញ្ជាក់ថា រាល់ការព្យាបាលជំងឺមហារីក គឺអាស្រ័យលើដំណាក់កាលនៃជំងឺ ។ ជាទូទៅការព្យាបាលមហារីកតាមបែប Immunotherapy គឺជាជម្រើសចុងក្រោយបំផុត ក្នុងករណីគ្មានវិធីណាល្អទាល់តែសោះសម្រាប់ការព្យាបាលជំងឺមហារីក ។ ការព្យាបាលមហារីកតាមបែប Immunotherapy គឺត្រូវឆ្លងកាត់ការវាយតម្លៃយ៉ាងល្អិតល្អន់ពីក្រុមគ្រូពេទ្យជំនាញ។ ជាទូទៅគឺយើងនឹងរៀបចំការប្រជុំនូវគ្រូពេទ្យជំនាញផ្នែកដុំសាច់។
ប្រសិនបើករណីនោះសមនឹងមានលក្ខណៈនៃការព្យាបាលតាមបែប Immunotherapy បន្ទាប់មកយើងនឹងយកការសម្រេចិត្តនេះទៅពិភាក្សាជាមួយក្រុមគ្រួសារ និងអ្នកជំងឺ ឲ្យគាត់បានដឹងហើយធ្វើការសន្និដ្ឋានជាមួយគ្នាថា តើពួកគេចង់ធ្វើការព្យាបាលដោយប្រើ Immunotherapy ឬអត់នោះទេ?»។
សូមបញ្ជាក់ថា ប្រភេទនៃការព្យាបាលដោយប្រើ Immunotherapy មួយចំនួនក៏ត្រូវបានគេហៅថា ការព្យាបាលដោយជីវសាស្ត្រ ( biologic therapy) ផងដែរ។ ក្នុងប៉ុន្មានទសវត្សចុងក្រោយនេះ ការព្យាបាលដោយប្រើប្រព័ន្ធការពាររាងកាយបានក្លាយជាផ្នែកមួយដ៏សំខាន់នៃការព្យាបាលប្រភេទមួយចំនួននៃជំងឺមហារីក។ ការព្យាបាល Immunotherapy គឺជាការព្យាបាលមួយប្រភេទដោយប្រើថ្នាំដើម្បីពង្រឹងប្រព័ន្ធភាពស៊ាំនៃរាងកាយមនុស្សដែលហៅ Immune system ដើម្បីបញ្ឈប់ ឬក៏ពន្យឺតការរីកដុះដាលកោសិកាមហារីកឬក៏ទប់មិនអោយមហារីករាលដាល៕
អត្ថបទនេះនាំជូនមកដោយក្រុមហ៊ុនធានារ៉ាប់រងជីវិត AIA
ចែករំលែកព័តមាននេះ