ខេត្តបន្ទាយមានជ័យ ៖ ប្រជាកសិករបាននាំគ្នាចាប់អារម្មណ៍ដាំដំឡូង (ចិនរឺកៃប៉ឹង)ជាមុខរបបកសិកម្មថ្មី តែលក់បានទីផ្សាក្នុងស្រុក ដែលដាំនៅក្នុងឃុំអូរប្រាសាទ ស្រុកមង្គលបូរី ។ ជាក់ស្តែងគេឃើញប្រជាកសិករក្រៅពីធ្វើស្រែ គឺនាំគ្នាចាប់អារម្មធ្វើចម្ការដោយដាំដំឡូង(ចិនរឺកៃប៉ឹង)ឃើញមានដាំច្រើនមាននៅឃុំអូរប្រាសាទ…
ខេត្តបន្ទាយមានជ័យ ៖ ប្រជាកសិករបាននាំគ្នាចាប់អារម្មណ៍ដាំដំឡូង (ចិនរឺកៃប៉ឹង)ជាមុខរបបកសិកម្មថ្មី តែលក់បានទីផ្សាក្នុងស្រុក ដែលដាំនៅក្នុងឃុំអូរប្រាសាទ ស្រុកមង្គលបូរី ។
ជាក់ស្តែងគេឃើញប្រជាកសិករក្រៅពីធ្វើស្រែ គឺនាំគ្នាចាប់អារម្មធ្វើចម្ការដោយដាំដំឡូង(ចិនរឺកៃប៉ឹង)ឃើញមានដាំច្រើនមាននៅឃុំអូរប្រាសាទ ក្នុងស្រុកមង្គលបូរី ក្នុងគ្រួសារដាំមានប្រមាណពី១ទៅ២រ៉ៃ អ្នកដែលមានលទ្ធភាពផ្ទៃដីធំ មានខ្លះដាំបានពី១ទៅ២ហិតា កាលពីឆ្នាំ២០១៧កន្លងទៅ ដោយដាំទទួលផលលក់បានទីផ្សាក្នុងស្រុក ហើយក្នុង១គីឡូក្រាមប្រមូលផលដំបូងតម្លៃ២.៥០០រៀល ក្រោយពេលប្រមូលផលច្រើន១គីឡូក្រាមតម្លៃ១.០០០ ទៅ១.៥០០រៀល ។
ប្រជាកសិករភូមិគោកអំពិលបានប្រាប់ពីរបៀបដាំដំឡូង(ចិនរឺកៃប៉ឹង)នេះគេភ្ចួរដីហាលឲ្យបាន១ទៅ២ថ្ងៃ ហើយរាស់ឲ្យដីម៉ត់ រួចហើយពូនជារង កាយដោយដៃ ឬម៉ាស៊ីនឲ្យបានទទឹងជាងកន្លះម៉ែត្រ និងរងកម្ពស់៣តឹក ហើយចិតដាំ១មើមប៉ុនកដៃ ពុះជាពីរចម្រៀកកាត់ទទឹង៥ហ៊ុន រួចទៅប្រឡាក់ផេះយកទៅដាំ១តឹកកន្លះកប់សើរៗឲ្យជិត រួចយកចំបើងក្របពីលើតិចៗឲ្យជិតការពារស្មៅដោះ ។
ប្រជាកសិករបានបញ្ជាក់ថា ដំឡូង (ចិនរឺកៃប៉ឹង) ដាំហើយលាស់ចេញត្រួយ២តឹក រយៈពេល១ខែកន្លះ បើមានស្មៅដកចេញក្របលើរង ហើយដាក់ជីចំចន្លោះកណ្តាលដើម ហើយបោះត្រួយវែង១ទៅ២ម៉ែត្ររយៈពេល៣ខែបាញ់ថ្នាំពៅមើម រហូតដល់៦ទៅ៧ខែចាប់ផ្តើមជីកប្រមូលផលក្នុង១រ៉ៃ ស្មើ១.៦០០ម៉ែត្រការ៉េទទួលផលជាមធ្យម៤ទៅ៥តោន គឺទទួលផលប្រសើរជាងធ្វើស្រែ ។
ប្រជាកសិករបានបញ្ជាក់ថា ដំឡូង (ចិនរឺដំឡូងកៃប៉ឹង) ជាមើមវែង បើល្អមាន១មើមមានទម្ងន់មាន២ទៅ៣គីឡូក្រាម និងមានរស់ជាតិផ្អែម គេទិញភាគច្រើនទៅខេត្តសៀមរាបយកទៅធ្វើម្ហូបជនជាតិបរទេស ហើយស្លការី និងស្លលក់ ១គីឡូក្រាមតម្លៃ៣.០០០ទៅ៤.០០០រៀល ។
អ្នកយកព័ត៌មានបានទំនាក់ទំនងទៅលោក ប៉ាង វណ្ណាសេដ្ឋ ប្រធានកសិកម្មរុក្ខាប្រមាញ់ និងនេសាទខេត្តបន្ទាយមានជ័យដែរ តែមិនអាចធ្វើទំនាក់ទំនងបាន ហើយលោក រុន សុផាន់ណារ៉ា មន្ត្រីកសិកម្មរុក្ខាប្រម៉ាញ់និងនេសាទខេត្តបានប្រាប់ថា ដំឡូង (ចិនរឺកៃប៉ឹង) នេះខាងជំនាញដូចជា មិនបានស្គាល់ច្បាស់នៅឡើយទេ តែដឹងថា ប្រភេទដំឡូងនេះ គឺប្រជាកសិករកំពុងពេញនិយមដាំនៅក្នុងឃុំអូរប្រាសាទស្រុកមង្គលបូរី ។
ហើយទទួលផលបានលក់ក្នុងទីផ្សាក្នុងស្រុក និងនាំចេញទៅខេត្តសៀមរាបដែលឈ្មួញទិញយកទៅធ្វើអាហារជនជាតិបរទេសភាគច្រើន ព្រោះថា ដំឡូង(ចិនរឺកៃប៉ឹង)មានរស់ជាតិផ្អែមអាចយកធ្វើបង្អែមឬស្លការី ៕
ចែករំលែកព័តមាននេះ