បាត់ខ្លួន២ថ្ងៃ ស្រាប់តែប្រទះឃើញទើរជាប់នៅក្បែរស្ពានថ្ម
- ប៉ៃលិន
ខេត្តប៉ៃលិន ៖ សពបុរសចំណាស់ម្នាក់ត្រូវបានគេប្រទះឃើញអណ្តែតទឹកស្ទឹងបរយ៉ាខាទៅទើរជាប់នៅក្បែរស្ពានថ្ម ខណៈក្រុមគ្រួសារបានបាត់បុរសជាជនរងគ្រោះអស់រយៈពេល២ថ្ងៃមកហើយ ។ ហេតុការណ៍នេះបង្កឱ្យមានការភ្ញាក់ផ្អើលដល់ប្រជាពលរដ្ឋជាច្រើនដែលបើកបរម៉ូតូ និងរថយន្តធ្វើដំណើរឆ្លងកាត់ស្ពានមួយកន្លែងនេះបាននាំគ្នាឈប់មើលកាលពីវេលាម៉ោង៥និង៥០នាទីល្ងាចថ្ងៃទី៩ ខែសីហា ឆ្នាំ២០១៨ ស្ថិតនៅក្នុងភូមិបរតាំងស៊ូ…
ជនរងគ្រោះដែលស្លាប់ឈ្មោះខាន់ សុខុន ភេទប្រុស អាយុ៦៤ឆ្នាំ ។
ប្រភពព័ត៌មានបានឱ្យដឹងថា ជនរងគ្រោះមានជំងឺសរសៃប្រសាទជាយូរមកហើយ ទោះបីក្រុមគ្រួសារខំយកទៅព្យាបាល និងមើលថែយ៉ាងណា ក៏មិនជាសះស្បើយដែរ ។ ស្រាប់តែបុរសចំណាស់ខាងលើបានបាត់ខ្លួនកាលពីវេលាម៉ោង៦និង១៥នាទីយប់ថ្ងៃទី៧ ខែសីហា ឆ្នាំ២០១៨ នៅចំណុចខាងក្រោយក្រុមហ៊ុនទឹកស្អាត ស្ថិតក្នុងភូមិបរហ៊ុយត្បូង សង្កាត់បរយ៉ាខា ក្រុងប៉ៃលិន ហើយការបាត់ខ្លួនបុរសចំណាស់ខាងលើនេះ ត្រូវបានក្រុមគ្រួសារ និងសាច់ញាតិនាំគ្នាស្វះស្វែងរកយ៉ាងណាក៏រកមិនឃើញ ។
ប្រភពព័ត៌មានបានបន្តទៀតថា ក្រោយមកស្រាប់តែមានគេប្រាប់ថា ប្រទះឃើញសពបុរសម្នាក់អណ្តែតក្នុងទឹកស្ទឹងបរយ៉ាខា ភ្លាមៗនោះក្រុមគ្រួសារ និងប្រជាពលរដ្ឋបានសហការជាមួយប្រជាការពារភូមិចុះទៅស្រង់សពជនរងគ្រោះដាក់លើគោក ហើយពេលកម្លាំងជំនាញមកធ្វើកោសល្យវិច្ច័យសព បានរកឃើញថា ជនរងគ្រោះពិតជាបានស្លាប់ដោយសារលង់ទឹកស្ទឹងប្រាកដមែន ។
ពាក់ព័ន្ធនឹងករណីខាងលើនេះ បន្ទាប់ពីសមត្ថកិច្ចធ្វើកោសល្យវិច្ច័យរួចរាល់ សពជនរងគ្រោះត្រូវបាននគរបាលជំនាញប្រគល់ជូនទៅក្រុមគ្រួសារ ដើម្បីដឹកយកទៅធ្វើបុណ្យតាមប្រពៃណី ៕
ចែករំលែកព័តមាននេះ