រាជធានីភ្នំពេញ ៖ បន្ទាប់ពីរាជរដ្ឋាភិបាលកម្ពុជាដំឡើងពន្ធលើរថយន្តថ្មីៗ និងបន្តអនុញ្ញាតឲ្យរថយន្តជជុះ ឬរថយន្តមួយទឹក ពីប្រទេសក្រៅមកកាន់ទីផ្សារប្រទេសកម្ពុជា ការលក់រថយន្តថ្មីៗពីបណ្ដាក្រុមហ៊ុននាំចូលនានា ហាក់ជួបបញ្ហាជាមួយនឹងតម្លៃឡើងខ្ពស់ជាងមុន ដែលធ្វើឲ្យការលក់មានកំណើនតិចតួច ប៉ុន្តែទោះជាយ៉ាងណា…
រាជធានីភ្នំពេញ ៖ បន្ទាប់ពីរាជរដ្ឋាភិបាលកម្ពុជាដំឡើងពន្ធលើរថយន្តថ្មីៗ និងបន្តអនុញ្ញាតឲ្យរថយន្តជជុះ ឬរថយន្តមួយទឹក ពីប្រទេសក្រៅមកកាន់ទីផ្សារប្រទេសកម្ពុជា ការលក់រថយន្តថ្មីៗពីបណ្ដាក្រុមហ៊ុននាំចូលនានា ហាក់ជួបបញ្ហាជាមួយនឹងតម្លៃឡើងខ្ពស់ជាងមុន ដែលធ្វើឲ្យការលក់មានកំណើនតិចតួច ប៉ុន្តែទោះជាយ៉ាងណា នៅតែកើនឡើងដដែល ។
លោក ងន សាំង អគ្គនាយកក្រុមហ៊ុន អ អិម អេ ខេមបូឌា និងជាសមាជិករបស់សហព័ន្ធឧស្សាហកម្មយានយន្តកម្ពុជា បានឲ្យដឹងថា ចំពោះតួលេខលក់រថយន្តជារួមសម្រាប់ប្រទេសកម្ពុជា នៅតែមិនទាន់ទទួលបានទេ ក៏ប៉ុន្តែសម្រាប់ អ អិម អេ ខេមបូឌា ដែលជាក្រុមហ៊ុនលក់រថយន្តប្រណីតៗ និងថ្មីៗនៅលើទីផ្សារកម្ពុជាជាច្រើនម៉ាកនោះ នៅតែមានកំណើនល្អប្រសើរដដែល ប៉ុន្តែក៏មានបញ្ហាមួយចំនួនផងដែរ ។
លោកបន្តថា សម្រាប់ក្រុមហ៊ុន អ អិម អេ ខេមបូឌា ក្នុងរយៈពេលជាងកន្លះឆ្នាំនេះ មានកំណើនប្រមាណ២០ទៅ៣០% បើធៀបនឹងឆ្នាំមុន ក៏ប៉ុន្តែលោកទទួលស្គាល់ថា ចាប់តាំងពីរាជរដ្ឋាភិបាលបានអនុវត្តពន្ធថ្មី បានធ្វើឲ្យអតិថិជនហាក់រារែកលើការសម្រេចចិត្តភ្លាមៗក្នុងការទិញរថយន្តថ្មីៗប្រើប្រាស់ ។ លោកថា ៖« វាហាក់ដូចជាពិបាកលក់ជាងឆ្នាំមុនបន្តិច ព្រោះអតិថិជនរបស់យើងហាក់មានចិត្តរារែក ដោយសារតែតម្លៃរថយន្តក៏បានឡើងថ្លៃ ពីព្រោះពន្ធបានឡើងថ្លៃជាងមុន » ។
លោកបន្ថែមថា អ្វីដែលជាកង្វល់ និងជាបញ្ហាប្រកួតប្រជែងនៅលើទីផ្សាររថយន្តក្នុងប្រទេសកម្ពុជានោះ គឺការបន្តអនុញ្ញាតឲ្យមានការនាំចូលរថយន្តជជុះ ឬរថយន្តមួយទឹក មកកាន់ទីផ្សារនេះកាន់តែច្រើន ។ កត្តាទាំងនេះ វាមិនមែនមានបញ្ហាសម្រាប់តែពាណិជ្ជកម្មក្នុងវិស័យរថយន្តថ្មីៗនោះទេ តែវាក៏ជាបញ្ហាសម្រាប់ប្រទេសទាំងមូលផងដែរ ។
ជាក់ស្ដែង ដូចដែលបានឃើញស្រាប់ហើយ រថយន្តខ្លះកំពុងតែរត់សុខៗ បែរជាមានបញ្ហាបច្ចេកទេស, ឆេះរថយន្ត បញ្ហាទៅលើប្រព័ន្ធហ្វ្រាំង និងបញ្ហាផ្សេងៗជាច្រើនទៀត ដែលបណ្ដាលឲ្យមានគ្រោះថ្នាក់ចរាចរណ៍នៅតាមដងផ្លូវ និងការបុករះ ជាដើម។ លោកនិយាយថា ៖« ក្នុងនាមជាសហព័ន្ធឧស្សាហកម្មយានយន្តកម្ពុជា តែងតែស្នើ និងអំពាវនាវដល់រាជរដ្ឋាភិបាលឲ្យមានចំណាត់ការលើការនាំចូលរថយន្តជជុះមកកាន់ទីផ្សារប្រទេសកម្ពុជា » ។
លោក ប៉ែន ពិសិដ្ឋ នាយកគ្រប់គ្រងក្រុមហ៊ុនលក់រថយន្ត Chevrolet នៅកម្ពុជា ក៏បានឲ្យដឹងផងដែរថា ចាប់តាំងពីដើមឆ្នាំ ២០១៨នេះមក ការលក់រថយន្ត Chevrolet គ្មានបញ្ហាអ្វីគួរឲ្យកត់សម្គាល់ទេ បើទោះបីជាឆ្នាំនេះ កម្ពុជាបានរៀបចំព្រឹត្តិការណ៍បោះឆ្នោតថ្នាក់ជាតិក៏ដោយ ក៏ប៉ុន្តែកំណើននេះ បើធៀបនឹងឆ្នាំមុន មិនសូវជាច្រើនប៉ុន្មានទេ ។ ជាក់ស្ដែង ការលក់រថយន្ត Chevrolet ក្នុងទីផ្សារកើនឡើងតែប្រមាណពី១៥ទៅ២០%ប៉ុណ្ណោះ ។
លោកបន្តថា អ្វីជាបញ្ហាសម្រាប់ការលក់រថយន្តនៅឆ្នាំ២០១៨នេះ គឺកត្តាពន្ធបានឡើងថ្លៃ ហើយលោកក៏ស្នើឲ្យរាជរដ្ឋាភិបាលពិចារណាលើការបញ្ចុះពន្ធឲ្យនៅទាប ដើម្បីឲ្យពលរដ្ឋមានលទ្ធភាពទិញរថយន្តថ្មីៗ និងមានគុណភាពប្រើប្រាស់បានច្រើន ពីព្រោះការប្រើប្រាស់រថយន្តថ្មី វាសន្សំសំចៃខ្ពស់ និងអាចជួយការពារបរិស្ថានបានល្អផងដែរ ។
អ្នកស្រី អ៊ុន កញ្ញា អ្នកគ្រប់គ្រងទូទៅនៃក្រុមហ៊ុន HGB ក៏បានឲ្យដឹងផងដែរថា ការលក់រថយន្តថ្មីឆ្នាំនេះ ខុសពីឆ្នាំមុន ដោយឆ្នាំនេះ ការលក់ហាក់មានកំណើនតិចតួច ពីព្រោះរថយន្តត្រូវលក់ក្នុងតម្លៃខ្ពស់ជាងឆ្នាំមុន ។ ដូចនេះ ទើបអតិថិជនដែលចង់ផ្លាស់ប្តូរស៊េរីរថយន្ត ឬអតិថិជនចង់ទិញរថយន្តថ្មីប្រើប្រាស់ គឺនៅស្ទាក់ស្ទើរ ៕
ចែករំលែកព័តមាននេះ