រាជធានីភ្នំពេញ ៖ ជំងឺមហារីកសុដន់ ជាជំងឺមហារីកដែលកើតញឹកញាប់បំផុតលើស្ត្រីកម្ពុជា បន្ទាប់ពីជំងឺមហារីកមាត់ស្បូន ។ កន្លងមកក្រសួងសុខាភិបាល ក្រៅពីការផ្តល់សេវាពិគ្រោះពិនិត្យ និងថែទាំព្យាបាលជំងឺមហារីក ក៏មានសកម្មភាពផ្សេងទៀតដែលបានអនុវត្តពាក់ព័ន្ធនឹងបញ្ហាជំងឺមហារីកសុដន់ ដែលក្នុងនោះបានអប់រំស្ត្រីឲ្យ «ចេះពិនិត្យ និងសា្ទបដោះដោយខួ្លនឯង» ចំនួន 360,495នាក់ «ពិនិត្យដុំដោះ 2,744នាក់ និងបញ្ហាដោះផ្សេងៗទៀតចំនួន 1,607នាក់ ក្នុងឆ្នាំ២០១៧ កន្លងមក។
យោងតាមព័ត៌មានពីមន្ទីរពេទ្យកាល់ម៉ែត បានបញ្ជាក់ឲ្យដឹង ថាការស្រាវជ្រាវបែបវិទ្យាសាស្ត្របានបង្ហាញឲ្យឃើញថា ២៥% ទៅ ៣០% នៃជំងឺមហារីកសុដន់ គឺបណ្តាលមកពីការលើសហ្សែនម្យ៉ាងឈ្មោះថា HER 2 (HER 2 Overexpression) ។ ការព្យាបាលបែបទំនើប និងចំគោលដៅ ដែលមានបំណងសម្លាប់កោសិកាមហារីក និងទប់ស្កាត់ការរាលដាលនៃជំងឺមហារីកសុដន់ ដែលបណ្តាលការលើសហ្សែន HER 2 នេះគឺជាការព្យាបាលដែលមានប្រសិទ្ធភាពខ្ពស់បំផុតសម្រាប់អ្នកជំងឺមហារីកសុដន់។
យ៉ាងណាមិញ គ្រូពេទ្យជំនាញខាងជំងឺមហារីកបានអះអាងថា មន្ទីរពេទ្យពិសោធន៍វិភាគកោសិកាមហារីកនៃមន្ទីរពេទ្យកាល់ម៉ែត ជាមន្ទីរពិសោធន៍តែមួយគត់នៅក្នុងប្រទេសកម្ពុជាដែលបានបំពាក់បចេ្ចកវិទ្យា Immunohistochemistry ដើម្បីធ្វើតេស្ត រកការលើសហ្សែន HER 2 HER 2 ដែលបណ្តាលឲ្យកើតជំងឺមហារីកសុដន់ ។
វេជ្ជបណ្ឌិត អ៊ាវ សុខា ប្រធានផ្នែកមហារីកនិងជំងឺឈាមនៃមន្ទីរពេទ្យកាល់ម៉ែត ថ្លែងប្រាប់សារព័ត៌មានកោះសន្តិភាពឲ្យដឹងថា បើការបំភ្លឺ ក៏ដូចជាការពន្យល់របស់គ្រូពេទ្យបានអស់និង ច្បាស់លាស់ ជូនអ្នកជំងឺគឺជារឿងចំបាច់បំផុត ព្រោះនៅពេលអ្នកជំងឺបានយល់ហើយ ពេលនោះ តើយើងនឹងទទួលបានអីគេ0x017d7 ប្រាកដណាស់ គឺយើងទទួលបានការសហការគ្នាជិតដិតរវាងអ្នកជំងឺនិងគ្រូពេទ្យ ។ ហើយការសហការគ្នាល្អរវាងគ្រូពេទ្យនិងអ្នកជំងឺ មានន័យថាគ្រូពេទ្យនឹងបំពេញកតាព្វកិច្ចព្យាបាលជំងឺឲ្យគាត់ ហើយអ្នកជំងឺដឹងថា ការព្យាបាលឲ្យគាត់នោះគឺដើម្បីអី ហើយគាត់អ្នកជំងឺគាត់ដឹងថាគាត់ត្រូវធ្វើអី ហូបចុកយ៉ាងម៉េច»។
វេជ្ជបណ្ឌិត អ៊ាវ សុខា មានប្រសាសន៍បញ្ជាក់ថា៖ «ការសហការល្អអញ្ចឹង គឺចុងក្រោយបំផុតផ្តល់ឲ្យនូវលទ្ធផលនៃការព្យាបាល ល្អខ្ពស់បំផុត តាមការប្រាថ្នារបស់យើង ។ ហើយការសិក្សាវិទ្យាសាស្ត្រ ក៏រកឃើញថា កាលណាអ្នកជំងឺនិងគ្រូពេទ្យមានការសហការគ្នាជិតដិត គឺអ្នកជំងឺនោះហើយដែលមានអត្រាជាសះខ្ពស់បំផុត» ។
វេជ្ជបណ្ឌិត អ៊ាវ សុខា លើកទឹកចិត្តឲ្យអ្នកជំងឺសាកសួរនូវសំណួរសំខាន់ មួយចំនួនទៅគ្រូពេទ្យជំនាញក្រោយពីលោកអ្នវបានធ្វើរោគវិនិច្ឆ័យរកឃើញថា កើតជំងឺមហារីក ហើយកុំមានការភ័យខ្លាចអី ៖
១ – តើលោកគ្រូខ្ញុំឈឺអីពិតប្រាកដ? ខ្ញុំមានមហារីកប្រភេទណា?
២ – ហេតុអីខ្ញុំឈឺអានឹង?
៣- តើមហារីកសុដន់របស់ខ្ញុំធ្ងន់ធ្ងរ ឬស្ថិតក្នុងដំណាក់កាលណា?
៤- តើខ្ញុំនឹងត្រូវការធ្វើតេស្តបន្ថែមទៀតទេ?
៥- តើការព្យាបាលមហារីកមានអ្វីខ្លះ?
៦- ហើយធ្វើការព្យាបាលអញ្ចឹងផ្តល់ផលប្រយោជន៍អីឲ្យខ្ញុំខ្លះ?
៧- ការព្យាបាលអាចព្យាបាលជំងឺមហារីករបស់ខ្ញុំបានទេ?
៨- ប្រសិនបើជំងឺមហារីករបស់ខ្ញុំមិនអាចព្យាបាលបានតើខ្ញុំអាចរំពឹងអ្វីខ្លះពីការព្យាបាល?
៩- តើអ្វីជាផលប៉ះពាល់នៃការព្យាបាលនីមួយៗ?
១០- តើការចំណាយសម្រាប់ការព្យាបាលនេះយ៉ាងណាខ្លះ?
១១- តើខ្ញុំត្រូវការចាប់ផ្តើមការព្យាបាលភ្លាមប៉ុណ្ណា?
១២- តើការព្យាបាលនឹងប៉ះពាល់ដល់ជីវិតប្រចាំថ្ងៃរបស់ខ្ញុំយ៉ាងដូចម្តេច?
១៣ – តើខ្ញុំអាចបន្តធ្វើការក្នុងកំឡុងពេលព្យាបាលបានដែររឺទេ?
១៤- បើសិនខ្ញុំមានបញ្ហាសុខភាពផ្សេងទៀត។ តើខ្ញុំអាចគ្រប់គ្រងវាបានយ៉ាងដូចម្តេចនៅពេលព្យាបាលជំងឺមហារីករបស់ខ្ញុំ?
១៥- តើមានការរឹតបន្តឹង ឬការតមណាមួយដែលខ្ញុំត្រូវអនុវត្តតាមឬទេ?
វេជ្ជបណ្ឌិត អ៊ាវ សុខា មានប្រសាសន៍ថា៖ «ក្នុងនាមជាគ្រូពេទ្យអ្វីដែលខ្ញុំព្រួយបារម្មណ៍បំផុតនោះ គឺពេលខ្ញុំពិនិត្យហើយ ខ្ញុំពន្យល់ហើយ ខ្ញុំសួរថាតើបងយល់អត់ ហើយគាត់ឆ្លើយថា «អត់អីទេលោកគ្រូ!» លឺអញ្ចឹង ខ្ញុំភ័យ ព្រោះខ្ញុំដឹងថាគេអត់យល់។ តែខ្ញុំសប្បាយចិត្តណាស់ បើសិនជាគេសួរសំនួរដេញជើង សួរហើយសួរទៀត។ គ្រូពេទ្យពេញចិត្តនឹងឆ្លើយគ្រប់សំនួរ លើកលែងតែសំនួរខ្លះគ្រូពេទ្យស្តាប់ហើយ ពេទ្យគិតថា បើឆ្លើយនូវចម្លើយនឹងប្រាប់ទៅ វាអត់មានផ្តល់ផលចំនេញអីដល់អ្នកជំងឺ តែបែរជាផ្តល់ផលពិបាកធ្ងន់ធ្ងរដល់អ្នកជំងឺ នោះពេទ្យនឹងមិនឆ្លើយឬក៏ឆ្លើយវាង» ។
លោកវេជ្ជបណ្ឌិត ក៏បានសំណូមទៅប្រជាពលរដ្ឋថា៖ «ហើយខ្ញុំសុំផ្តាំហើយផ្តាំទៀត សុំឲ្យបងប្អូនលុបអាផ្នត់គំនិតថា កុំប្រាប់អ្នកឈឺឲ្យគាត់ដឹងអីខ្លាចគាត់ភ័យ ហើយនាំគ្នាលាក់គាត់ ហើយនាំគ្នាខ្សឹបខ្សៀវ។ អ្នកជំងឺគាត់ឆ្លាត តើគាត់មើលតែទឹកមុខគាត់ដឹង អញ្ចឹងនាំឲ្យគាត់ពិបាកចិត្ត ដេកអត់លក់ ហូបអត់បាន សម្រាន្តអត់ស្រួល អញ្ចឹងសុខភាពថយចុះ ។ អញ្ចឹងអ្នកជំងឺក្នុងស្ថានភាពបែបនេះហើយ ដែលមានអត្រាស្លាប់ខ្ពស់» ។
អញ្ចឹងផ្ទុយទៅវិញ អ្នកជំងឺដែលក្រុមគ្រួសារព្យាយាមលាក់ កុហក បោកប្រាស់គាត់នឹង គឺអ្នកជំងឺនេះហើយដែលប្រឈមមុខនឹងការស្លាប់ខ្ពស់បំផុត មកពីគាត់អត់បានយល់ច្បាស់។ អញ្ចឹងសុំបងប្អូនផ្លាស់ប្តូរនូវផ្នត់គំនិតនេះទៅ។
ហើយក្នុងនាមជាពេទ្យនេះ ពេទ្យដឹងណាស់ថា ព័ត៌មានណាដែលគួរជម្រាប់ជូនអ្នកជំងឺ ព័ត៌មានណាដែលពេទ្យមិនគួរជម្រាបជូនអ្នកជំងឺ និងគ្រួសារអ្នកជំងឺ ។ ពេលខ្លះពេទ្យក៏អត់ប្រាប់ព័ត៌មានទៅគ្រួសារអ្នកជំងឺដែរ ព្រោះអីយល់ឃើញថា ប្រាប់ទៅខ្លាចជ្រួលច្របល់ វាប៉ះពាល់ដល់អារម្មណ៍អ្នកជំងឺ ពេទ្យបានដឹងមែនទែន៕
អត្ថបទនេះនាំជូនមកដោយក្រុមហ៊ុនធានារ៉ាប់រងជីវិត AIA
ចែករំលែកព័តមាននេះ