រាជធានីភ្នំពេញ ៖ លោក Serge Mostura ឯកអគ្គរដ្ឋទូតបារាំងថ្មី បានថ្លែងថា គម្រោងបំភ្លឺនៅរាជធានីភ្នំពេញកន្លងមកបានចាប់ផ្តើមអនុវត្តជាបណ្តើៗហើយ ចំណែកគម្រោងធ្វើរថភ្លើងប្រើចរន្តអគ្គិសនី ដើម្បីកាត់បន្ថយការកកស្ទះចរាចរណ៍ក្នុងរាជធានីភ្នំពេញ និងរោងចក្រអគ្គិសនីប្រើដោយឧស្ម័ននឹងចាប់ផ្តើមនៅពេលអនាគតឆាប់ៗខាងមុខនេះ ។
រាជធានីភ្នំពេញ ៖ លោក Serge Mostura ឯកអគ្គរដ្ឋទូតបារាំងថ្មី បានថ្លែងថា គម្រោងបំភ្លឺនៅរាជធានីភ្នំពេញកន្លងមកបានចាប់ផ្តើមអនុវត្តជាបណ្តើៗហើយ ចំណែកគម្រោងធ្វើរថភ្លើងប្រើចរន្តអគ្គិសនី ដើម្បីកាត់បន្ថយការកកស្ទះចរាចរណ៍ក្នុងរាជធានីភ្នំពេញ និងរោងចក្រអគ្គិសនីប្រើដោយឧស្ម័ននឹងចាប់ផ្តើមនៅពេលអនាគតឆាប់ៗខាងមុខនេះ ។
លោកកុយ គួង អនុរដ្ឋលេខាធិការក្រសួងការបរទេសនិងសហប្រតិបត្តិការអន្តរជាតិបានឱ្យដឹងថា លោក Serge Mostura បានថ្លែងបែបនេះនាព្រឹកថ្ងៃទី៨ មេសា ក្នុងឱកាសដែលលោកចូលជួបសម្តែងការគួរសមនិងពិភាក្សាការងារជាមួយលោកឧបនាយករដ្ឋមន្ត្រី ហោ ណាំហុង រដ្ឋមន្ត្រីក្រសួងការបរទេសនិងសហប្រតិបត្តិការអន្តរជាតិ នៅ ទីស្តីការក្រសួង ខណៈពេលដែលលោកត្រូវបានតែងតាំងជាឯកអគ្គរដ្ឋទូតបារាំងថ្មីប្រចាំនៅកម្ពុជា ។
លោកឯកអគ្គរដ្ឋទូតថ្មីរូបនេះថ្លែងបន្តថា ដោយមើលឃើញការរីកចម្រើនល្អ ជាពិសេសរាជធានីភ្នំពេញ សន្ទុះនៃការរីកចម្រើនរបស់ប្រទេសកម្ពុជាគឺខ្លាំងក្នុងចំណោមបណ្តាប្រទេសអាស៊ាន ។ កន្លងមក ក្រុមហ៊ុនធំៗរបស់បារាំងបានចាប់ផ្តើមចូលមកដំណើការវិនិយោគនៅប្រទេសកម្ពុជាជាបណ្តើរៗ ដោយសារកម្ពុជាមានការរីកចម្រើនខ្លាំង មានស្ថិរភាពនយោបាយ សន្តិសុខសណ្តាប់ធ្នាប់ល្អ…។
ជាការឆ្លើយតប លោកឧបនាយករដ្ឋមន្ត្រីហោ ណាំហុង បានសម្តែងនូវកិច្ចស្វាគមន៍ចំពោះលោក Serge Mostura ដែលត្រូវបានតែងតាំងជាឯកអគ្គរដ្ឋទូតថ្មីនៃសាធារណរដ្ឋបារាំងប្រចាំនៅកម្ពុជា ។ លោកឧបនាយករដ្ឋមន្ត្រីសង្ឃឹមថា វត្តមានរបស់លោកឯកអគ្គរដ្ឋទូតថ្មីនឹងធ្វើឱ្យប្រទេសទាំងពីរកម្ពុជា-បារាំង កាន់តែពង្រឹងទំនាក់ទំនងកិច្ចសហប្រតិបត្តិការលើគ្រប់វិស័យ។ លោកឧបនាយករដ្ឋមន្ត្រី បានសម្តែងនូវការអរគុណដល់រដ្ឋាភិបាលបារាំង ដែលកន្លងមករដ្ឋាភិបាលបារាំងបានផ្តល់ជំនួយផ្សេងៗ ជាពិសេសលើវិស័យវប្បធម៌ អប់រំ សុខាភិបាល ដល់កម្ពុជា ក៏ដូចជាទំនាក់ទំនងរវាងកម្ពុជា-បារាំង រវាងរដ្ឋាភិបាលនិងរដ្ឋាភិបាល ហើយបារាំងមានអង្គការមិនមែនរដ្ឋាភិបាលមួយចំនួននៅកម្ពុជា ។ ទន្ទឹមនេះ លោកឧបនាយករដ្ឋមន្ត្រីបានអរគុណភាគីបារាំងដែលចាប់ពីឆ្នាំ២០០៥ មកដល់បច្ចុប្បន្ន បានជួយផ្តល់ហិរញ្ញវត្ថុដល់សាលាក្តីខ្មែរក្រហមប្រមាណជា៧លានអឺរ៉ូ។
ចំពោះសំណួរពាក់ព័ន្ធនឹងបញ្ហារថភ្លើងប្រើចរន្តអគ្គិសនីនៅរាជធានីភ្នំពេញ លោកកុយ គួង បញ្ជាក់ថា ក្រសួងពាក់ព័ន្ធកំពុងពិភាក្សាអំពីបច្ចេកទេស ។ គម្រោងនេះ ភាគីបារាំងនិងភាគីកម្ពុជាបានព្រមព្រៀងចុះហត្ថលេខាអនុវត្តចាប់ពីខែមករា ឆ្នាំ២០១៣ រវាងក្រុមហ៊ុនបារាំងជាមួយសាលារាជធានីភ្នំពេញ ហើយកំពុងសិក្សាបណ្តើរៗ ។នៅព្រឹកថ្ងៃដដែលនោះដែរ នៅទីស្តីការក្រសួង លោកអ៊ុច បូររិទ្ធ រដ្ឋលេខាធិការក្រសួងការបរទេសនិងសហប្រតិបតិ្តការអន្តរជាតិ បានជួបពិភាក្សាជាមួយលោកជំទាវ Patti Londono អនុរដ្ឋមន្ត្រីក្រសួងការបរទេសប្រទេសកូឡុំប៊ី ។ នៅក្នុងកិច្ចពិភាក្សានោះ លោករដ្ឋលេខាធិការអុ៊ច បូររិទ្ធ បានរៀបរាប់ពីការរីកចម្រើនរបស់ប្រទេសកម្ពុជាខាងវិស័យនយោបាយ សេដ្ឋកិច្ច ហើយនិងកិច្ចសហប្រតិបត្តិការរវាងប្រទេសកូឡុំប៊ី ជាមួយកម្ពុជា ក្នុងផ្នែកដោះមីន ព្រោះកន្លងមកប្រទេសកូឡុំប៊ីបានបញ្ចូនក្រុមដោះមីនកូឡុំប៊ីចំនួន១០នាក់ មកហ្វឹកហាត់ក៏ដូចជាចែករំលែកបទពិសោធន៍ពីកម្ពុជាដែរ ។
លោកជំទាវ Patti Londono បានថ្លែងអំណរគុណចំពោះបដិសណ្ឋារកិច្ចដែលរាជរដ្ឋាភិបាលកម្ពុជាបានទទួលគណៈប្រតិភូ ។ ទន្ទឹមនេះ លោកជំទាវអនុរដ្ឋមន្ត្រី ក៏បានលើកបញ្ហាមួយចំនួនពាក់ព័ន្ធនឹងកិច្ចសហប្រតិបត្តិការរវាងប្រទេសទាំងពីរកម្ពុជា-កូឡុំប៊ី ។ ពាក់ព័ន្ធនឹងបញ្ហានេះ លោកអ៊ុច បូររិទ្ធ មានប្រសាសន៍ថា សូមកូឡុំប៊ី ពិចារណាការពង្រឹងពង្រីកវិស័យទេសចរណ៍ ព្រោះវិស័យទេសចរណ៍កម្ពុជាមានការរីកចម្រើនច្រើន ។ កម្ពុជាមានប្រាង្គប្រាសាទ រមណីយដ្ឋានធម្មជាតិ ទេសចរណ៍ធម្មជាតិដែលជាទីទាក់ទាញអារម្មណ៍ភ្ញៀវទេសចរអន្តរជាតិមកទស្សនាកម្ពុជា ។
ពាក់ព័ន្ធនឹងបញ្ហានេះ លោកជំទាវអនុរដ្ឋមន្ត្រីការបរទេសកូឡុំប៊ី បានប្រកាសភ្លាមថា ភាគីកូឡុំប៊ីមានការរីករាយណាស់ ហើយនឹងបញ្ជូនមកកម្ពុជា នូវមគ្គុទ្ទេសក៍ទេសចរណ៍មួយក្រុមដែលជំនាញខាងទេសចរណ៍ ខាងភាសាអេស្បា៉ញមកកម្ពុជាក្នុងឆមាសទី២ឆ្នាំ២០១៣ នេះ ជួយបង្ហាត់បង្ហាញមគ្គុទ្ទេសក៍ទេសចរណ៍កម្ពុជា ដែលនិយាយភាសាអេស្បា៉ញក្នុងរយៈពេល៦ខែ ។ នៅក្នុងការស្នាក់នៅគឺខាងភាគីកូឡុំប៊ីជាអ្នកចេញទាំងអស់ ។
លោកជំទាវមានប្រសាសន៍បន្ថែមថា កូឡុំប៊ីមានបញ្ហាខ្លាំងណាស់ក្នុងការប្រយុទ្ធប្រឆាំងគ្រឿងញៀន តែមកដល់ឥឡូវនេះកូឡុំប៊ីបានទទួលជោគជ័យជាបន្តបន្ទាប់ ។ ជោគជ័យដ៏ត្រចះត្រចង់នោះគឺកូឡុំប៊ីបានកម្ទេចទាំងស្រុងនូវក្រុមទុច្ចរិត ការដឹកជញ្ជូនក៏ដូចជាការផលិតគ្រឿងញៀន ។ កូឡុំប៊ីត្រៀមខ្លួនសហការជាមួយកម្ពុជាក្នុងការចែករំលែកនូវបទពិសោធន៍ក្នុងការប្រយុទ្ធប្រឆាំងគ្រឿងញៀន ។
ក្នុងឱកាសនោះដែរ លោកអ៊ុច បូររិទ្ធ និងលោកជំទាវ Patti Londono ក៏បានចុះហត្ថលេខាលើអនុស្សរណៈយោគយល់គ្នាក្នុងកិច្ចសហប្រតិបត្តិការស្តីពីការបង្កើតកិច្ចពិគ្រោះយោបល់ នយោបាយ រវាងប្រទេសទាំងពីរកម្ពុជា-កូឡុំប៊ី។ ភាគីទាំងពីរបានឯកភាពគ្នាថា ការពិភាក្សានឹងធ្វើជារៀងរាល់ឆ្នាំ ឬក៏មួយឆ្នាំ២ដងទៅតាមភាពជាក់ស្តែង មិនកំណត់ឱ្យបានច្បាស់លាស់ទេ ប៉ុន្តែទោះជាយ៉ាងណាក៏ដោយត្រូវអនុវត្តឱ្យមានប្រសិទ្ធភាពនូវអ្វីដែលភាគីទាំងពីរកម្ពុជា-កូឡុំប៊ីបានពិភាក្សាជាមួយគ្នា ៕
ចែករំលែកព័តមាននេះ