ខេត្តកណ្តាល ៖ ជនសង្ស័យម្នាក់ត្រូវបានសមត្ថកិច្ចនគរបាលចាត់ទុកថាជាមុខសញ្ញាដែលមានជំនាញបំផុតខាងលួចកាច់សោ.កម៉ូតូដែលកន្លងមក ធ្លាប់ធ្វើសកម្មភាពលួចបានមិនតិចគ្រឿងនោះឡើយ និងធ្លាប់ជាប់ពន្ធនាគារថែមទៀតផងប៉ុន្តែមិនរាងចាល ។ លុះចុងក្រោយនេះ ក៏ត្រូវនគរបាលព្រហ្មទណ្ឌ ស្រុកអង្គស្នួលចាប់ខ្លួនបាន ក្រោយពេលជននេះលួចម៉ូតូ១គ្រឿង…
ខេត្តកណ្តាល ៖ ជនសង្ស័យម្នាក់ត្រូវបានសមត្ថកិច្ចនគរបាលចាត់ទុកថាជាមុខសញ្ញាដែលមានជំនាញបំផុតខាងលួចកាច់សោ.កម៉ូតូដែលកន្លងមក ធ្លាប់ធ្វើសកម្មភាពលួចបានមិនតិចគ្រឿងនោះឡើយ និងធ្លាប់ជាប់ពន្ធនាគារថែមទៀតផងប៉ុន្តែមិនរាងចាល ។ លុះចុងក្រោយនេះ ក៏ត្រូវនគរបាលព្រហ្មទណ្ឌ ស្រុកអង្គស្នួលចាប់ខ្លួនបាន ក្រោយពេលជននេះលួចម៉ូតូ១គ្រឿង ។មិនតែប៉ុណ្ណោះ នគរបាលក៏ឈានទៅឃាត់ខ្លួនជន សង្ស័យម្នាក់ទៀត ដែលជាអ្នកទទួលទិញម៉ូតូ នៅពេលចោរម្នាក់នេះលួចបានយកទៅលក់ឲ្យដោយជាប់ ចោទពីបទទទួលផលចោរកម្ម ។
ការចាប់ខ្លួនជនសង្ស័យទាំង២នាក់នេះ បានធ្វើឡើងកាលពីវេលាម៉ោង១និង១៥នាទីរសៀលថ្ងៃទី៥ ខែសីហា ក្រោយពីជនសង្ស័យធ្វើសកម្មភាពលួចម៉ូតូ១គ្រឿង ពីមុខបន្ទប់ជួលមួយកន្លែង ស្ថិតក្នុងភូមិព្រៃរកា ឃុំឆក់ឈើនាង ស្រុកអង្គស្នួល ។ជនសង្ស័យទាំង២នាក់នេះ ម្នាក់ឈ្មោះ ផូង កុសល អាយុ២៩ឆ្នាំ ជាកម្មករសំណង់ មានទីលំនៅក្នុងឃុំបឹងត្រាញ់ខាងជើង ស្រុកសំរោងខេត្តតាកែវ ។ ជននេះធ្លាប់ជាប់ពន្ធនាគារព្រៃសម្ដងរយៈពេល១ឆ្នាំ ពីបទលួច និងបានចេញមកវិញកាលពីអំឡុងឆ្នាំ២០១៦ ។ ប៉ុន្តែក្រោយពេលចេញពីពន្ធនាគារក៏ធ្វើសកម្មភាពលើសដើម ដែលគ្រាន់តែចម្លើយសារភាពត្រួសៗគឺលួចកាច់សោ.កម៉ូតូបានសម្រេចជាច្រើនលើករាប់មិនអស់ទេ រាប់ភ្លេច ។
ចំណែកម្នាក់ទៀតឈ្មោះ សែត ផុល អាយុ៤៥ឆ្នាំ ជាអ្នកទទួលទិញម៉ូតូពីឈ្មោះផូង កុសល (ទទួលផលចោរកម្ម) និងមានមុខរបររត់ម៉ូតូឌុប មានទីលំនៅក្នុងភូមិព្រែកហូរលិច ឃុំព្រែកហូរ ក្រុងតាខ្មៅ ខេត្តកណ្តាល ។ជននេះធ្លាប់ទិញម៉ូតូដែលជនសង្ស័យលួចបានចំនួន៨គ្រឿងមកហើយ ហើយនៅលើកចុងក្រោយជនសង្ស័យឈ្មោះផូង កុសល បានធ្វើសកម្មភាពកាច់សោ.កម៉ូតូ១គ្រឿងម៉ាកហុងដាឌ្រីមសេ១២៥ ស៊េរីឆ្នាំ២០១៧ ពណ៌ខ្មៅ ពាក់ផ្លាកលេខ កំពង់ស្ពឺ ១K-៨៩២៥ ជារបស់ស្ត្រីឈ្មោះភិន ខេត អាយុ៥៥ឆ្នាំ ជាកសិករ មានទីលំនៅក្នុងភូមិព្រៃមៀន ឃុំរស្មីសាមគ្គី ស្រុកឱរ៉ាល់ខេត្តកំពង់ស្ពឺ ប៉ុន្តែម៉ូតូនេះត្រូវនគរបាលដកហូតយកមកវិញបាន ។
ក្រៅពីនេះ នគរបាលបានដកហូតវត្ថុតាងមួយចំនួនទៀតដូចជា កន្ត្រៃ២ ដែកចុងស្រួច១ ម៉ូតូហុងដាឌ្រីម សេ១១០ស៊េរីឆ្នាំ២០១២ ពណ៌ខ្មៅ ពាក់ផ្លាកលេខ កណ្តាល ១D-៨៨២៦ និងម៉ូតូស៊ុយហ្សុ៊យគីណិច ពណ៌ស ពាក់ផ្លាកលេខភ្នំពេញ ១CT-៤២៨៩ និងសោសម្រាប់ដោះគ្រឿងម៉ូតូមួយចំនួន ។ មន្ត្រីនគរបាលនិយាយថា មុនពេលកើតហេតុជនរងគ្រោះបានទុកម៉ូតូនៅមុខបន្ទប់ជួលខាងក្រោមដោយចាក់សោ.កត្រឹមត្រូវ រួចហើយឡើងទៅសម្រាកនៅជាន់ទី២ ។ ខណៈនោះជនសង្ស័យឈ្មោះ ផូង កុសល បានធ្វើសកម្មភាពកាច់សោ.កម៉ូតូ រួចជិះទៅកាន់បន្ទប់ជួលរបស់មិត្តភក្តិស្ថិតក្នុងភូមិព្រៃទា សង្កាត់ចោមចៅ៣ ខណ្ឌពោធិ៍សែនជ័យ រាជធានីភ្នំពេញ សម្ងំដោះផ្លាកលេខម៉ូតូចេញ ក៏ត្រូវនគរបាលតាមទាន់ចាប់ខ្លួនបានរួចនាំទៅសាកសួរ ៕
ចែករំលែកព័តមាននេះ