រាជធានីភ្នំពេញ ៖ ដោយសារតែមានការបញ្ជាទិញអង្ករពីខាងក្រៅច្រើន អាជីវករក្នុងវិស័យស្រូវអង្ករកម្ពុជា បានបង្ហាញនូវសុទិដ្ឋិនិយមលើតម្លៃស្រូវអង្ករឆ្នាំនេះថា វានឹងល្អប្រសើរ ហើយតម្លៃនឹងកើនឡើងជាបន្តបន្ទាប់ទៀត ស្របពេលរាជរដ្ឋាភិបាលកម្ពុជា ក៏បានត្រៀមទុនបម្រុងសម្រាប់ជួយស្រោចស្រង់លើតម្លៃស្រូវនេះផងដែរ ។
បើតាមលោក យ៉ន សុវណ្ណ ប្រធានក្រុមហ៊ុនអង្ករបាយ័ន សៀរៀល (Bayon Cereal) ដែលជាអ្នកជំនួញក្នុងវិស័យស្រូវអង្ករឆ្នើមមួយរូបនៅកម្ពុជា បានបង្ហាញពីទស្សនៈរបស់លោកផ្ទាល់ថា នៅឆ្នាំនេះ តម្លៃស្រូវរបស់ប្រជាកសិករ នឹងកើនឡើងខ្ពស់ជាងឆ្នាំមុន ស្របពេលមានការបញ្ជាទិញច្រើនពីខាងក្រៅប្រទេស ដូចជា មកពីប្រទេសនានាក្នុងតំបន់អាស៊ាន និងប្រទេសមួយចំនួននៅសហគមន៍អឺរ៉ុប ។
លោកបន្តថា នៅឆ្នាំនេះ បណ្ដាទីផ្សារប្រទេសដែលមានតម្រូវការអង្ករបានកើនឡើងច្រើនដូចជា នៅម៉ាឡេស៊ី សិង្ហបុរី និងបណ្ដាប្រទេសនៅសហគមន៍អឺរ៉ុប ជាដើម ។ ដូចនេះ បើសិនជាតម្រូវការកើនឡើងនោះ តម្លៃអាចនឹងល្អប្រសើរឡើងជាងឆ្នាំមុន ។ លោកថា ៖«បច្ចុប្បន្ន ការបញ្ជាទិញអង្ករ គ្រាន់តែពីក្រុមហ៊ុនខ្ញុំមួយ មានបរិមាណជាង៣ពាន់តោនទៅហើយ តែសម្រាប់ស្រូវដែលខ្ញុំបានទិញពីកសិករមកវិញ គឺបានត្រឹមតែជាង២ពាន់តោនប៉ុណ្ណោះ ។ ទាំងនេះ វាបានបង្ហាញយ៉ាងច្បាស់ពីតម្រូវការក្រៅប្រទេស និងតម្រូវការពីប្រជាពលរដ្ឋក្នុងប្រទេសផងដែរ ។ ម្យ៉ាងទៀត នៅលើពិភពលោក អ្នកទទួលទានអង្ករមានរាប់ពាន់លាននាក់ តែអង្ករដែលផលិតបានតែជាង៧០០លានតោនប៉ុណ្ណោះក្នុង១ឆ្នាំ ហើយអង្ករល្អដូចនៅកម្ពុជា ក៏មានតិចតួចទៅទៀត » ។
លោកបន្ថែមថា កម្ពុជា គឺជាប្រទេសដែលមានសណ្ឋានដីអំណោយផលខ្ពស់ដល់ដំណាំស្រូវល្អបំផុតនៅលើពិភពលោក ។ ជាក់ស្ដែង កន្លងមក អង្ករកម្ពុជាបានយកទៅប្រកួតប្រជែងជាមួយបណ្ដាប្រទេសផលិតស្រូវជាច្រើន ហើយអង្ករកម្ពុជាទទួលបានចំណាត់ថ្នាក់ជាអង្ករឆ្ងាញ់ និងមានគុណភាពជាងគេ ។ ចាប់តាំងពីពេលនោះមក ទីផ្សារអង្កររបស់កម្ពុជាក៏កាន់តែល្បីឡើងៗពីមួយឆ្នាំទៅមួយឆ្នាំ ជាពិសេស អង្ករសែនក្រអូប ហើយរាជរដ្ឋាភិបាលក៏បានជំរុញឲ្យកសិករផលិតអង្ករនេះបានកាន់តែច្រើនផងដែរសម្រាប់ផ្គត់ផ្គង់ទីផ្សារ ។
លោកបញ្ជាក់ថា ពាក់ព័ន្ធនឹងតម្លៃស្រូវនៅកម្ពុជា កាលពីប៉ុន្មានឆ្នាំមុន ហាក់ស្ថិតនៅកម្រិតមួយទាប ក្រោយមក រាជរដ្ឋាភិបាលក៏បានបញ្ចេញថវិកាសម្រាប់ទប់ទល់ជាមួយនឹងតម្លៃស្រូវកុំឲ្យធ្លាក់ទាប ទើបធ្វើឲ្យតម្លៃស្រូវហក់ងើបឡើងវិញ ជាពិសេស ទីផ្សារស្រូវនៅតំបន់ព្រំដែនកម្ពុជា-ថៃ ។ ចំពោះឆ្នាំនេះក៏ដូចគ្នាដែរ តម្លៃស្រូវនឹងល្អប្រសើរជាងឆ្នាំមុនៗ ហើយវានឹងងើបឡើងបន្តទៀត ស្របតាមតម្រូវការទីផ្សារទាំងក្នុង និងក្រៅស្រុក ។ លោកថា ៖« បច្ចុប្បន្ន តម្លៃស្រូវដែលលោកទិញចូល គឺប្រមាណពី៧ទៅ៩បាតទៅហើយ ឬស្មើនឹងជិត១.០០០រៀល ឬលើសនេះ ក្នុង១គីឡូក្រាម » ។
គួររំឭកថា ថ្មីៗនេះ រាជរដ្ឋាភិបាលក៏បានប្រកាសបង្វិលទុនចំនួន៥០លានដុល្លារ ក្នុងនោះ៤៣លានដុល្លារជាកញ្ចប់ថវិកាពិសេសរបស់រដ្ឋ និង៧លានដុល្លារផ្សេងទៀតជាថវិកាមូលនិធិរបស់ធនាគារអភិវឌ្ឍន៍ជនបទ ។
បើតាមការលើកឡើងរបស់លោក កៅថាច អគ្គនាយកធនាគារអភិវឌ្ឍន៍ជនបទថា កញ្ចប់ថវិកានេះ គឺដើម្បីទុកទម្លាក់ទៅតាមរោងម៉ាស៊ីនកិនស្រូវសម្រាប់ប្រមូលទិញស្រូវពីប្រជាកសិករ ។ ដូចនេះ តម្លៃស្រូវរបស់កសិករឆ្នាំនេះ មិនចោទជាបញ្ហាទេ យ៉ាងហោចណាស់ ក៏កសិករទទួលបានតម្លៃតាមទីផ្សារដែរ ។
គួរបញ្ជាក់ថា ប្រធានសហព័ន្ធស្រូវអង្ករកម្ពុជា លោក សុខ ពុទ្ធីវុធ ក៏តែងតែអំពាវនាវដល់ប្រជាកសិករឲ្យដាំប្រភេទស្រូវណាដែលមានទីផ្សារនៅក្រៅប្រទេស និងអាចលក់បានតម្លៃខ្ពស់ ។ ជាក់ស្ដែង ស្រូវសែនក្រអូប គឺជាប្រភេទស្រូវដែលកំពុងមានទីផ្សារខ្ពស់នៅក្រៅប្រទេស។ ដូចនេះ លោកសូមឲ្យកសិករទាំងអស់ងាកមកផលិតស្រូវនេះឲ្យបានច្រើន ដើម្បីលើកកម្ពស់ជីវភាពគ្រួសារ ៕
ចែករំលែកព័តមាននេះ