ខេត្តបន្ទាយមានជ័យ ៖ បើតាមសេចក្តីរាយការណ៍បានឱ្យដឹងថា កម្លាំងជំនាញប្រឆាំងគ្រឿងញៀននៃអធិការដ្ឋាននគរបាលក្រុងប៉ោយប៉ែត ដឹកនាំផ្ទាល់ដោយលោកវរសេនីយ៍ឯក ធិន ស៊ិនដេត ជាអធិការបានធ្វើការឆ្មក់ចូលបង្ក្រាបករណីជួញដូរ និងប្រើប្រាស់ថ្នាំញៀនមួយកន្លែងកាលពីយប់ថ្ងៃទី03 សីហា…
ខេត្តបន្ទាយមានជ័យ ៖ បើតាមសេចក្តីរាយការណ៍បានឱ្យដឹងថា កម្លាំងជំនាញប្រឆាំងគ្រឿងញៀននៃអធិការដ្ឋាននគរបាលក្រុងប៉ោយប៉ែត ដឹកនាំផ្ទាល់ដោយលោកវរសេនីយ៍ឯក ធិន ស៊ិនដេត ជាអធិការបានធ្វើការឆ្មក់ចូលបង្ក្រាបករណីជួញដូរ និងប្រើប្រាស់ថ្នាំញៀនមួយកន្លែងកាលពីយប់ថ្ងៃទី03 សីហា 2018 ស្ថិតនៅភូមិ និងសង្កាត់ប៉ោយប៉ែត ដោយឃាត់ខ្លួនជនសង្ស័យជាជនជាតិថៃ3នាក់។
ជនសង្ស័យទាំង៣ខាងលើ រួមមាន 1-ឈ្មោះ អាក់ ខារ៉ាក់ដេត ភេទប្រុស អាយុ44ឆ្នាំ 2-ឈ្មោះ ឆាលួយ ខូកថង ភេទប្រុស អាយុ50ឆ្នាំ និង3-ឈ្មោះ ជិរ៉ាក់ ផាន់ជីរ៉ាក់សិនប៉ាក់វ៉ាត់ ភេទប្រុសអាយុ43ឆ្នាំ។ ការបង្ក្រាបនេះសមត្ថកិច្ចដកហូតបានវត្ថុតាងជាច្រើនដូចជា ម្សៅក្រាមពណ៌សថ្លាសង្ស័យមានសារធាតុញៀនចំនួន15កូនថង់តូច, ថ្នាំគ្រាប់ពណ៌ផ្ទៃមេឃចំនួន01គ្រាប់សង្ស័យ (ថ្នាំគ្រវី), ថ្នាំញៀនប្រភេទមេតំហ្វេតាមីន ពណ៌ផ្កាឈូក WY ចំនួន410គ្រាប់, ជញ្ជីងថ្លឹង01និងឧបករណ៍សម្រាប់វេចខ្ចប់ប្រើប្រាស់ថ្នាំញៀនមួយចំនួនធំទៀត។
លោកវរសេនីយ៍ឯក ធិន ស៊ិនដេត អធិការនគរបាលក្រុងប៉ោយប៉ែត ប្រាប់ថា ករណីបង្ក្រាបជាក់ស្តែងនេះ គឺធ្វើឡើងក្រោយពីមានសេចក្តីរាយការណ៍ពីពលរដ្ឋសង្ស័យមនុស្សមួយក្រុមដែលជួលបន្ទប់លេខ67 ជាន់ទី3 ស្នាក់នៅក្នុងភូមិ-ឃុំកើតហេតុខាងលើ ប្រើប្រាស់ថ្នាំញៀន។ ក្រោយមកលោកក៏ដឹកនាំកម្លាំងជំនាញចុះទៅពិនិត្យជាក់ស្តែង។
លោកអធិការបន្តថា លុះឃាត់មកសួរនាំ និងឆែកឆេរ ស្រាប់តែឃើញសុទ្ធតែថ្នាំញៀនទាំងនេះតែម្តង។ ចំណែកជនសង្ស័យ និងវត្ថុតាង បានកសាងសំណុំរឿងបញ្ជូនទៅការិយាល័យជំនាញនៃស្នងការដ្ឋាននគរបាលខេត្ត ដើម្បីចាត់ការបន្តតាមនីតិវិធីច្បាប់៕
ចែករំលែកព័តមាននេះ