ខេត្តបន្ទាយមានជ័យ ៖ ឆាកប្រយុទ្ធគ្នា២ឈុត បានកើតឡើងទាំងព្រឹកថ្ងៃ០២ សីហា នៅច្រកទ្វារអន្តរជាតិប៉ោយប៉ែត រវាងស្ត្រីខ្មែរម្នាក់តាមវាយស្ត្រីថៃរឿងជំពាក់ប្រាក់ ប៉ះចំរទេះលក់ផ្លែមៀន បណ្តាលឱ្យកំពប់រាយប៉ាយពេញដី ក៏បន្តរាលដាលដល់អ្នកម៉ូតូឌុប…
ខេត្តបន្ទាយមានជ័យ ៖ ឆាកប្រយុទ្ធគ្នា២ឈុត បានកើតឡើងទាំងព្រឹកថ្ងៃ០២ សីហា នៅច្រកទ្វារអន្តរជាតិប៉ោយប៉ែត រវាងស្ត្រីខ្មែរម្នាក់តាមវាយស្ត្រីថៃរឿងជំពាក់ប្រាក់ ប៉ះចំរទេះលក់ផ្លែមៀន បណ្តាលឱ្យកំពប់រាយប៉ាយពេញដី ក៏បន្តរាលដាលដល់អ្នកម៉ូតូឌុប វាយគ្នាផ្អើលដូចឈុតគេថតរឿងកុន ។
ទោះជាយ៉ាងណាក្តី គូជម្លោះទាំង២ឈុតនេះ មិនត្រូវបានគេស្គាល់អត្តសញ្ញាណឡើយ ដោយគ្រាន់តែដឹងនិងស្តាប់ឮថា គូទី១ គឺស្ត្រីខ្មែរជាអាជីវករលក់ទូរស័ព្ទនៅផ្សាររុងក្លឿ និងជាអ្នករស់នៅក្រុងប៉ោយប៉ែត បានវាយស្ត្រីថៃម្នាក់អាយុជាង៣០ឆ្នាំ ជាអ្នករស់នៅស្រុកអារញ្ញ ខេត្តស្រះកែវ រឿងជំពាក់ប្រាក់៦ម៉ឺនបាតរយៈពេល២ឆ្នាំមកហើយចេះតែគេចមុខរហូត មិនព្រមសងសោះ ។
ក្នុងជម្លោះ ស្ត្រីខ្មែររូបនោះបានព្រមានទៅស្ត្រីថៃនោះថា បើមិនព្រមសងប្រាក់៦ម៉ឺនបាតនោះទេ ជួបពេលណានឹងត្រូវ(វ៉ៃ)ទៀត ហើយអត់ឱ្យនាងឯងស្រួលខ្លួនទេ ។ ស្ត្រីខ្មែរម្ចាស់បំណុលនិយាយខ្លាំងៗថា គាត់តាមរកមុខច្រើនថ្ងៃមកហើយ ដែលស្ត្រីថៃរូបនេះ ឃើញចេញចូលលេងល្បែងនៅកាស៊ីណូ តែងគេចមុខពីគាត់មិនព្រមសងសោះ ។
ដោយសារតែរឿងជួយឃាត់គូជម្លោះទី១ មិនឱ្យឈ្លោះគ្នា ធ្វើឱ្យអ្នករត់ម៉ូតូឌុប២នាក់ឌឺដងដាក់គ្នា ម្នាក់ថា ឱ្យម្នាក់ ម៉េចមិនជួយឃាត់ ខណៈម្នាក់ទៀតនិយាយថា បើខ្លួនមិនឃាត់ ម្លេ៉ះជម្លោះនេះមិនទាន់បញ្ចប់ទេ ប្រហែលវ៉ៃគ្នាស្រាតមិនខាន ។ អ្នកម៉ូតូឌុបទាំង២ សង្ស័យយល់ច្រឡំសំដីរៀងខ្លួន ក៏ផ្ទុះជាជម្លោះហក់ចូលវ៉ៃគ្នាផ្អើលច្រកទ្វារព្រំដែន បណ្តាលឱ្យចោមរោមមើលកកស្ទះចរាចរណ៍ទាំងព្រឹក ៕
ចែករំលែកព័តមាននេះ