ខេត្តបន្ទាយមានជ័យ ៖ យោងតាមការចុះផ្សាយរបស់គេហទំព័រក្នុងស្រុកថៃមួយបានឲ្យដឹងថា ស្ត្រីខ្មែរម្នាក់បានឈឺពោះសម្រាលកូននៅកណ្តាលសមុទ្រ ក្រោយពីដឹកចេញពីកោះស្មាច់នៅខេត្តរ៉ាក់យ៉ង ប្រទេសថៃ ប៉ុន្តែត្រូវគេបញ្ជូនតាមទូកម៉ាស៊ីនទាន់ពេល ខណៈទារកបានកើតទៅហើយ ។
ហេតុការណ៍ខាងលើ បានកើតឡើងកាលពីវេលាម៉ោងជាង៣ទៀបភ្លឺថ្ងៃទី១ ខែសីហា នៅកោះស្មាច់ នៃខេត្តរ៉ាក់យ៉ងប្រទេសថៃ ។ ដោយមានទំនាក់ទំនងពីចម្ងាយ សមត្ថកិច្ចថៃនិងក្រុមជួយសង្គ្រោះបានទៅរង់ចាំនៅកំពង់ផែទូកភ្លាមៗ ដើម្បីជួយស្ត្រីជាពលករដែលឈឺពោះឆ្លងទន្លេនេះ។ នៅពេលចូលដល់កំពង់ផែ អ្នកបើកទូកស្រែកឱ្យប្រញាប់ចុះមកជួយ ព្រោះទារកកើតចេញមកស្ទើរទាំងអស់ទៅហើយ ទើបក្រុមជួយសង្គ្រោះ និងសមត្ថកិច្ចថៃប្រញាប់ប្រញាល់លើកស្ត្រីជាម្តាយដាក់លើរថយន្តដឹកចេញភ្លាមៗ ។
សមត្ថកិច្ចថៃមួយរូប ដែលមានបទពិសោធន៍ក្នុងការបង្កើតកូនជាង៦០នាក់ហើយនោះ បានប្រើពេលត្រឹមតែ១៥នាទីទារកក៏កើតចេញមក ដោយសុវត្ថិភាពនៅលើរថយន្ត និងមានរាងកាយរឹងមាំទាំងអស់ និងមានទម្ងន់២,៦៦គីឡូក្រាម ។ ទាំងម្តាយនិងកូន មានសុវត្ថិភាពទាំងអស់ និងបានបញ្ជូនទៅមន្ទីរពេទ្យរ៉ាក់យ៉ង ដើម្បីសម្រាកព្យាបាល ។
តាមការសាកសួរសាច់ញាតិដែលមកជាមួយបានឲ្យដឹងថា ស្ត្រីពលករខ្មែររូបនេះឈ្មោះ សែមសម្បត្តិ អាយុ២៧ឆ្នាំ ធ្វើការនៅរីសតមួយកន្លែងលើកោះស្មាច់ បានឈឺពោះឆ្លងទន្លេភ្លាមៗគឺជាការកើតមុនកំណត់ ព្រោះទើបមានផ្ទៃពោះ៨ខែ ដូច្នេះហើយទើបមិនបានត្រៀមជាមុន ។ ការសម្រាលកូនលើទូកម៉ាស៊ីនដែលមិនធ្លាប់មានពីមុននេះ ធ្វើឲ្យពលករខ្មែរមួយចំនួន ពិសេសជនជាតិថៃចាត់ទុកថា ជាទូកនាំសំណាង ។
មិនតែប៉ុណ្ណោះ អ្នកខ្លះយកលេខទូកម៉ាស៊ីននោះ០៤៩ ស្លាកលេខទូក០២៧៣ និងទម្ងន់របស់ទារក២,៦៦គីឡូក្រាម យកទៅចាក់ឆ្នោតថៃព្រោងព្រាតផងដែរ ដែលត្រូវចេញនៅថ្ងៃទី១ ខែសីហា ថែមទៀត ៕
ចែករំលែកព័តមាននេះ