រាជធានីភ្នំពេញ ៖ នៅព្រឹកថ្ងៃទី០១ ខែសីហា ឆ្នាំ២០១៨ ត្រូវនឹងថ្ងៃទី៣ ក្រោយការបោះឆ្នោតជ្រើសតាំងតំណាងរាស្ត្រតំណាងរាស្ត្រនីតិកាលទី៦ សម្តេចតេជោ ហ៊ុន សែន…
រាជធានីភ្នំពេញ ៖ នៅព្រឹកថ្ងៃទី០១ ខែសីហា ឆ្នាំ២០១៨ ត្រូវនឹងថ្ងៃទី៣ ក្រោយការបោះឆ្នោតជ្រើសតាំងតំណាងរាស្ត្រតំណាងរាស្ត្រនីតិកាលទី៦ សម្តេចតេជោ ហ៊ុន សែន នាយករដ្ឋមន្ត្រីកម្ពុជាបានបង្ហាញខ្លួនជាសាធារណៈលើកដំបូង ហើយអ្វីដែលកាន់តែអស្ចារ្យសម្រាប់វត្តមានរបស់សម្តេចតេជោ នោះ គឺកាដូរសម្រាប់ប្រជាពលរដ្ឋក្នុងការជិះកាណូតទៅមកពីភ្នំពេញ-តាខ្មៅ ក៏ដូចជា ការជិះរថភ្លើងពីភ្នំពេញ-ប៉ោយប៉ែត ឬប៉ោយប៉ែត-ភ្នំពេញ ដោយមិនគិតប្រាក់ផងដែរ ។
ថ្លែងប្រាប់អ្នកសារព័ត៌មាន និងប្រជាពលរដ្ឋខ្មែរនាឱកាសអញ្ជើញសម្ពោធដាក់ឲ្យប្រើប្រាស់ចំណតនាវាដឹកអ្នកដំណើរនៅក្នុងខណ្ឌឬស្សីកែវ រាជធានីភ្នំពេញ សម្តេចតេជោ ហ៊ុន សែន ដែលជាប្រធានគណបក្សប្រជាជនកម្ពុជាផងនោះ បានថ្លែងបញ្ជាក់ថា កាដូនៃការធ្វើដំណើរតាមផ្លូវទឹក និងផ្លូវរថភ្លើងនេះ គឺមានសុពលភាពរហូតដល់ខែមករា ឆ្នាំ២០១៩ ឯណោះ ។
សម្តេចតេជោដែលនឹងក្លាយជានាយករដ្ឋមន្ត្រីកម្ពុជាសម្រាប់អាណាត្តិថ្មីនេះបានថ្លែងបញ្ជាក់យ៉ាងដូច្នេះថា ៖ «ដូច្នេះព្រឹកនេះ ខ្ញុំសម្រេចថា សម្រាប់ការប្រើប្រាស់នូវការជិះកាណូតតពីទីនេះទៅកាន់តាខ្មៅ ដែលគ្រោងថា យកប្រាក់នៅថ្ងៃនេះឥឡូវនេះ គឺសុំពន្យារហូតដាច់ឆ្នាំ២០១៨ សម្រាប់ប្រជាជនជិះដោយមិនចាំបាច់បង់ថ្លៃ» ។
តើអ្វីនៅពីក្រោយនៃការផ្តល់ជូនកាដូនេះ? ប្រាកដណាស់ នេះមិនមែនទើបជាកាដូដែលសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាបានផ្តល់ជូនប្រជាពលរដ្ឋខ្មែរនោះទេ ។ ជាក់ស្តែងកន្លងមករាជរដ្ឋាភិបាលក៏អនុញ្ញាតិឲ្យកម្មករ-កម្មការិនី សិស្ស-និស្សិតធ្វើដំណើរដោយមិនគិតប្រាក់សម្រាប់សេវារថយន្តក្រុងសាធារណៈ ។
ជាមួយគ្នានោះផងដែរសម្តេចក៏បានបញ្ជាក់ជូនអ្នកសារព័ត៌មាននៅព្រឹកថ្ងៃទី០១ ខែសីហានេះថា ៖ «អញ្ចឹងនេះ គឺជាកាដូមួយសម្រាប់ប្រជាពលរដ្ឋរបស់យើង ដើម្បីអបអរសារទរចំពោះឆ្នាំំដែលជាឆ្នាំជោគជ័យសម្រាប់សេដ្ឋកិច្ចសង្គម និងនយោបាយកម្ពុជា» ។
ប្រាកដណាស់កម្ពុជាបានសម្រេចជោគវាសនាប្រទេសជាតិ តាមរយៈការបោះឆ្នោតដោយសេរីត្រឹមត្រូវ និងយុត្តិធម៌តាមរយៈលទ្ធផលបឋមនៃការបោះឆ្នោតជ្រើសតាំងតំណាងរាស្ត្រនីតិកាលទី៦ កាលពីថ្ងៃទី២៩ កក្កដា ២០១៨ កន្លងទៅនេះ ដែលមានពលរដ្ឋខ្មែរបានចេញទៅបោះឆ្នោតចំនួន៨២.៨៩% នៃចំនួនអ្នកបោះឆ្នោតសរុប ៨,៣៨០,២១៧ និងមានគណបក្សនយោបាយចំនួន (២០) បានចូលរួម គឺបានបង្ហាញច្បាស់ថា ពលរដ្ឋកម្ពុជាច្រើនលើសលុបបំផុតគាំទ្រការបោះឆ្នោតតាមបែបលទ្ធិប្រជាធិបតេយ្យសេរីពហុបក្ស ដែលជាបំណងប្រាថ្នាដ៏ធំបំផុតរបស់ពលរដ្ឋខ្មែរ ហើយដែលត្រូវបានចែងច្បាស់នៅក្នុងរដ្ឋធម្មនុញ្ញដែលជាច្បាប់កំពូលរបស់ជាតិ ។
តាមរយៈសន្លឹកឆ្នោតបឋមក៏បានបង្ហាញផងដែរថា គណបក្សប្រជាជនកម្ពុជាដែលមានសម្តេចតេជោ ហ៊ុន សែន ជាប្រធានបក្ស គឺបានឈ្នះភ្លូកទឹកភ្លូកដី ហើយអាចនឹងទទួលបានអាសនៈទាំង១២៥ នៅរដ្ឋសភាផងដែរ ៕
ចែករំលែកព័តមាននេះ