ខេត្តបន្ទាយមានជ័យ ៖ យោងតាមការចុះផ្សាយរបស់គេហទំពរ័ក្នុងស្រុករបស់ថៃមួយបានឲ្យដឹងថា ស្ត្រីខ្មែរម្នាក់បានឈឺពោះប្រុងសម្រាលកូនកណ្តាលសមុទ្រក្រោយដឹកចេញពីកោះស្មាច់នៅខេត្តរ៉ាក់យ៉ង ប្រទេសថៃ ប៉ុន្តែត្រូវបានគេបញ្ជូនតាមទូកប្រើម៉ាស៊ីនទាន់ពេលវេលា ។ ហេតុការណ៍ខាងលើបានកើតឡើងកាលពីវេលាម៉ោងជាង៣ទៀបភ្លឺឈានចូលព្រឹកថ្ងៃទី១ ខែសីហា ឆ្នាំ២០១៨ នៅកោះស្មាច់នៃខេត្តរ៉ាក់យ៉ង ប្រទេសថៃ។
ដោយមានការទំនាក់ទំនងពីចម្ងាយ សមត្ថកិច្ចថៃ និងក្រុមជួយសង្គ្រោះបានទៅរង់ចាំនៅបរិវេណមាត់កំពង់ផែទូកភ្លាមៗដើម្បីជួយស្ត្រីជាពលករដែលឈឺពោះបម្រុងសម្រាលកូននោះ។ នៅពេលចូលដល់កំពង់ផែ អ្នកបើកទូកស្រែកឲ្យប្រញាប់ចុះមកជួយ ព្រោះក្បាល និងដងខ្លួនទារកលិចចេញមកស្ទើរតែទាំងអស់ ទើបក្រុមជួយសង្គ្រោះ និងសមត្ថកិច្ចថៃប្រញាប់ប្រញាល់លើកស្ត្រីដែលឈឺពោះសម្រាលកូនដាក់លើរថយន្តដឹកចេញភ្លាមៗ។
សមត្ថកិច្ចថៃម្នាក់ ដែលមានបទពិសោធន៍ក្នុងការបង្កើតកូនជាង៦០នាក់ហើយ ប្រើពេលត្រឹមតែ១៥នាទី ទារកក៏កើតចេញមកដោយសុវត្ថិភាពលើរថយន្ត គឺជាកូនប្រុស មានរាងកាយរឹងមាំទាំងអស់ មានទម្ងន់២,៦៦គីឡូក្រាម មានសុវត្ថិភាពទាំងម្ដាយ និងកូន ។ បន្ទាប់មកក៏បញ្ជូនបន្តទៅមន្ទីរពេទ្យរ៉ាក់យ៉ងដើម្បីសម្រាកព្យាបាលបន្តទៀត។
សាកសួរសាច់ញាតិដែលមកជាមួយបានឲ្យដឹងថា ស្ត្រីដែលឈឺពោះសម្រាលកូនឈ្មោះ សែម សម្បត្តិ អាយុ២៧ឆ្នាំ សញ្ជាតិខ្មែរ ធ្វើការនៅរីសតមួយកន្លែងនៅលើកោះស្មាច់ ឈឺពោះកើតភ្លាមៗ គឺជាការកើតមុនកំណត់ ព្រោះទើបមានផ្ទៃពោះ៨ខែ ដូច្នេះហើយទើបមិនបានត្រៀមជាមុន ។ ការសម្រាលកូនលើទូកម៉ាស៊ីនដែលពីមុនមិនធ្លាប់មាននេះបានធ្វើឲ្យពលករខ្មែរមួយចំនួន ពិសេសជនជាតិថៃចាត់ទុកថាជាទូកនាំសំណាង ៕
ចែករំលែកព័តមាននេះ