ក្រសួងកសិកម្មជប៉ុនបានបង្ហាញពីថ្លៃកសិផលនៅក្នុងប្រទេសកាលពីសប្ដាហ៍កន្លងមកថាស្ពៃក្ដោបក្នុងទីផ្សារនៅក្រុងតូក្យូក្នុងមួយគីឡូក្រាមថ្លៃ១២៩យ៉េន ឬ១,២ដុល្លារកាលពីថ្ងៃទី២៣ កក្កដា ២០១៨ កើនឡើងប្រហែល៦៥ភាគរយនៃថ្លៃធម្មតានៅចុងខែកក្កដាក្នុងរយៈពេល៥ឆ្នាំកន្លងមក ។
អង្គភាពដែលពាក់ព័ន្ធបានទទួលស្គាល់ថាទិសដៅថ្លៃទំនិញផ្នែកកសិផលក្នុងមួយរយៈនេះនឹងមានស្ថានភាពបែបណាគឺអាស្រ័យលើអាកាសធាតុ ។ ចំណែកក្រុមហ៊ុន«អ៊ីមូរ៉ាយ៉ា» (Imuraya) ផ្នែកមួយក្នុងចំណោមអ្នកផលិតនំដ៏ចំណាស់របស់ជប៉ុនបានបង្ហាញថាអត្រានៃការលក់ការ៉េមសណ្ដែកក្រហម និងការ៉េមវ៉ានីឡា(Vanilla) កើនឡើងជិត១០ភាគរយ ។
ស្ថានភាពនៃបម្រែបម្រួលលើថ្លៃទំនិញកសិផលរបស់ជប៉ុនជាទូទៅបានអាស្រ័យទៅតាមរដូវកាល ឬខែជារៀងរាល់ឆ្នាំ ។ ម្យា៉ងទៀតក្នុងមួយរយៈពេលនេះជប៉ុនកំពុងជួបនឹងគ្រោះមហន្តរាយទឹកជំនន់ រួមទាំងមានអាកាសធាតុក្ដៅជាហេតុផលបង្កឲ្យមានស្ថានភាពបែបនេះ ។
ម្យ៉ាងទៀតចំពោះប្រទេសជិតខាងជប៉ុន រួមមានកូរ៉េខាងត្បូងបានជួបនឹងឥទ្ធិពលព្យុះកម្តៅដូចជប៉ុនបង្កឲ្យមានអ្នកស្លាប់ចំនួន១៤នាក់ ខណៈពេលលោកប្រធានាធិបតីមូន ជេអ៊ីន (Moon Jae-In)បានថ្លែងថាស្ថានការណ៍ដែលកើតឡើងគឺជា «គ្រោះធម្មជាតិ» រួមទាំងបង្ហាញពីក្ដីបារម្ភថាថ្លៃទំនិញប្រើប្រាស់ ពិសេសអគ្គិសនី ទឹក និងបន្លែនឹងឡើងថ្លៃខ្ពស់បន្ត ៕
ចែករំលែកព័តមាននេះ