ខេត្តប៉ៃលិន ៖ ដោយមានការយកចិត្តទុកដាក់ពីសំណាក់អាជ្ញាធរខេត្ត ទើបនៅព្រឹកថ្ងៃទី៣១ ខែកក្កដា ឆ្នាំ២០១៨ មានការរៀបចំចុះសួរសុខទុក្ខ និងនាំយកអំណោយ ព្រមទាំងថវិកាឧបត្ថម្ភដល់ប្រជាពលរដ្ឋ ដែលកំពុងសម្រាកព្យាបាលជម្ងឺ…
ខេត្តប៉ៃលិន ៖ ដោយមានការយកចិត្តទុកដាក់ពីសំណាក់អាជ្ញាធរខេត្ត ទើបនៅព្រឹកថ្ងៃទី៣១ ខែកក្កដា ឆ្នាំ២០១៨ មានការរៀបចំចុះសួរសុខទុក្ខ និងនាំយកអំណោយ ព្រមទាំងថវិកាឧបត្ថម្ភដល់ប្រជាពលរដ្ឋ ដែលកំពុងសម្រាកព្យាបាលជម្ងឺ នៅក្នុងមន្ទីរពេទ្យបង្អែកខេត្ត ។
លោកនាយឧត្តមសេនីយ៍ អ៊ី ឈាន រដ្ឋលេខាធិការក្រសួងការពារជាតិ និង ជាប្រធានក្រុមការងារថ្នាក់ជាតិ ចុះមូលដ្ឋានខេត្តប៉ៃលិន បានណែនាំ និងអំពាវនាវដល់ប្រជាពលរដ្ឋ ក៏ដូចជាអ្នកជម្ងឺ ដែលកំពុងសម្រាកព្យាបាលនៅមន្ទីរពេទ្យបង្អែកខេត្តទាំងអស់ ត្រូវចេះថែទាំសុខភាពឱ្យបានល្អ ដោយចេះអនាម័យ ហូបស្អាត ផឹកស្អាត និងរស់នៅស្អាត ជាពិសេសកុមារតូចៗ នៅក្នុងរដូវវស្សានេះតែម្តង ។
លោកមានប្រសាសន៍លើកឡើងថា នៅរដូវនេះមានភ្លៀងធ្លាក់ច្រើន ដូច្នេះសូមប្រជាពលរដ្ឋទាំងអស់ មានការប្រុងប្រយ័ត្នខ្ពស់ ព្រោះអាចនឹងមានជម្ងឺផ្សេងៗកើតឡើង និងប្រុងប្រយ័ត្នចំពោះបាតុភូតនានាដូចជា ករណីខ្យល់កន្ត្រាក់ ទឹកជំនន់ រន្ទះបាញ់ជាដើម ដែលអាចបង្កជាបញ្ហាលំបាកដល់ក្រុមគ្រួសារ ជាពិសេសត្រូវថែទាំសុខភាព និងអនាម័យសម្រាប់កុមារតូចៗ ។
បើសង្កេតឃើញកូនៗណាម្នាក់មានសភាពក្តៅខ្លួនមិនស្រួលត្រូវនាំទៅមណ្ឌលសុខភាព ឬមន្ទីរពេទ្យបង្អែក ដែលនៅជិតផ្ទះបំផុតដើម្បីពិគ្រោះជាមួយគ្រូពេទ្យចៀសវាងទុកឲ្យកុមារមានសភាពធ្ងន់ធ្ងរ អាចបណ្តាលឱ្យប៉ះពាល់ដល់អាយុជីវិតផងដែរ ៕
ចែករំលែកព័តមាននេះ