រាជធានីភ្នំពេញ ៖ បច្ចុប្បន្ននេះ បើចង់ធ្វើដំណើរពីភ្នំពេញទៅប្រទេសថៃ លោកអ្នកមានពីរជម្រើស គឺតាមយន្ដហោះ និងរថយន្ដក្រុង ។ មធ្យោយបាយទាំងពីរនេះ ថ្វីដ្បិតតែមួយរត់លើគោក និងមួយលើវេហា តែវាមានគុណសម្បត្តិ និងគុណវិបត្តិដូចគ្នា ។ ដើម្បីផ្ដល់ជាគំនិតក្នុងការសម្រេចចិត្តជ្រើសមធ្យោបាយធ្វើដំណើររបស់លោកអ្នក យើងសូមលើកយកហេតុផលពីគុណសម្បត្តិ និងគុណវិបត្តិនៃមធ្យោបាយទាំងពីរនេះមកបង្ហាញជូនដូចខាងក្រោម ៖
I- គុណសម្បត្តិតាមផ្លូវអាកាស ៖ ពលរដ្ឋភាគច្រើនតែងគិតថា មិនហ៊ានជិះយន្ដហោះទេ ព្រោះវាមានលក្ខណៈស្មុគស្មាញ ចំណាយច្រើន ហើយជើងមិនជាប់ដីទៀត តែសូមទាញចំណាប់អារម្មណ៍ថា ការធ្វើដំណើរតាមផ្លូវអាកាសវាមិនពិបាកដូចការគិតនោះទេ គ្រាន់តែតឹងរ៉ឹងផ្នែកប្រព័ន្ធសន្ដិសុខ និងសុវត្ថិភាពជាងបន្ដិច ។
ការធ្វើដំណើរឆ្លងពីប្រទេសមួយទៅប្រទេសមួយ មិនថា ផ្លូវទឹក ផ្លូវគោក ផ្លូវដែក ឬផ្លូវអាកាសទេ គឺត្រូវបំពេញឯកសារដូចគ្នា ។ អ្វីដែលសំខាន់យើងមានលិខិតឆ្លងដែនដែលមានសុពលភាព និងសំបុត្រធ្វើដំណើរដូចជាសំបុត្រយន្ដហោះ ឬសំបុត្ររថយន្ដក្រុង និងមានបំពេញលិខិតស្នាមមួយចំនួនដូចគ្នា ហើយហេតុផលដែលគួរជិះយន្ដហោះនោះគឺ ៖
១-លឿន ៖ ការធ្វើដំណើរតាមផ្លូវអាកាសពិតជាលឿនទាន់ចិត្តមែន ។ បើអ្នកធ្វើដំណើរតាមរថយន្ដក្រុងត្រូវចំណាយពេលយ៉ាងតិច១០ម៉ោង ប៉ុន្ដែបើជិះយន្ដហោះយ៉ាងយូរត្រឹមតែ១ម៉ោងប៉ុណ្ណោះ ។
២- សុវត្ថិភាព ៖ ថ្វីដ្បិតតែជើងមិនជាប់ដី តែវាមានសុវត្ថិភាពជាងធ្វើដំណើរតាមផ្លូវគោក ពិសេសនៅប្រទេសយើងតែម្ដង ។ យោងតាមគេហទំព័រ Chance News ផ្សាយថា ការធ្វើដំណើរតាមផ្លូវអាកាសរយៈចម្ងាយ១.៦៩០គីឡូម៉ែត្រ គ្រោះថ្នាក់តិចជាងធ្វើដំណើរតាមផ្លូវគោកដែលមានរយៈចម្ងាយ១៦៩គីឡូម៉ែត្រ ។
៣-មានផាសុខភាព ៖ ពិតមែនហើយ ធ្វើដំណើរតាមផ្លូវអាកាសមិនត្រឹមតែមានអារម្មណ៍រំភើប អាចមើលទេសភាពទីក្រុង ព្រមទាំងឃើញដុំពពកសក្បុសប៉ុណ្ណោះទេ ថែមទាំងមានផាសុកភាពទៀតផង ។ នៅលើយន្ដហោះ បុគ្គលិកយកចិត្តទុកដាក់អ្នកដំណើរណាស់ ពិសេសគឺបដិសណ្ឋារកិច្ចល្អ ធ្វើឲ្យយើងមានភាពកក់ក្ដៅ ។
៤-តម្លៃ ៖ ជាធម្មតា តម្លៃសំបុត្រយន្ដហោះមានការឡើងចុះ និងមានកម្មវិធីប្រម៉ូសិនពិសេសជាដើម ។ បើសិនជាអ្នកនឹកឃើញទៅភ្លាម តម្លៃសំបុត្រក៏ថ្លៃតាមហ្នឹងដែរ ប៉ុន្ដែបើមានគម្រោងមុន ឬធ្វើដំណើរចំរដូវកាលក្រុមហ៊ុនមានប្រម៉ូសិនបញ្ចុះតម្លៃ ពិតជាប្រពៃណាស់ ។ តាមធម្មតា សំបុត្ររថយន្ដក្រុងទៅមក និងថ្លៃសេវាបំពេញលិខិតស្នាមមួយចំនួន អ្នកត្រូវចំណាយជាង៥០ដុល្លារ តែបើអ្នកជិះយន្ដហោះចំពេលបញ្ចុះតម្លៃ ឬកក់មុន២ឬ៣ខែ តម្លៃសំបុត្រទៅមក អាចនៅចន្លោះពី៧០ទៅជាង១០០ដុល្លារប៉ុណ្ណោះ។
បើទោះបីជាការធ្វើដំណើរតាមយន្ដហោះមើលទៅចំណេញពេលវេលាច្រើន និងមានផាសុកភាព បង្ហាញពីភាពថ្លៃថ្នូរ និងស៊ីវិល័យ ដូចការលើកឡើងខាងលើមែន តែក៏មានគុណវិបត្តិខ្លះដែរ ពិសេសគឺអ្វីៗត្រូវធ្វើជាដំណាក់ៗ ទម្រាំបានអង្គុយក្នុងយន្ដហោះពិតជាខាំចិត្តមែនទែន ហើយពេលមកដល់ប្រទេសវិញ ក៏មិនអាចចាកចេញដោយស្រួលៗដែរ គឺត្រូវបំពេញបែបបទដើម្បីបញ្ជាក់ថា យើងពិតជាបានចូលប្រទេសវិញតាមពេលកំណត់។
II គុណវិបត្តិតាមផ្លូវអាកាស ៖
១-បំពេញបែបបទច្រើន ៖ មិនត្រឹមតែមកដល់ព្រលានឲ្យបានមុន២ម៉ោងប៉ុណ្ណោះទេ អ្នកត្រូវcheck-in និងត្រួតពិនិត ព្រមទាំងបំពេញបែបបទច្រើន ។ បើអ្នកជាមនុស្សធ្វើដំណើរតាមយន្ដហោះលើកទី១ អ្នកត្រូវសួរនាំអ្នករួមដំណើរខ្លះ ឬមន្ត្រីប្រចាំការនៅព្រលានជួយ ។
២-អីវ៉ាន់មួយចំនួនត្រូវហាមឃាត់ ៖ ពិតមែនហើយរបស់របរមួយចំនួនដែលអាចបង្កហានិភ័យដល់ប្រព័ន្ធសុវត្ថិភាពនៃយន្ដហោះ គឺត្រូវបានហាមឃាត់ដាច់ខាត ពិសេសគ្រឿងងាយបង្កឆាបឆេះ ឬផ្ទុះ ។ ចំណែកទម្ងន់ត្រូវបានកំណត់ បើសិនជាលើសត្រូវគិតលុយតាមគីឡូក្រាម ។
៣- តម្លៃ ៖ តម្លៃសំបុត្រយន្ដហោះពិតជាថ្លៃជាងមែន ពិសេសពេលទិញសំបុត្រភ្លាមៗដែលធ្វើឲ្យពលរដ្ឋមួយចំនួនពុំអាចមានលទ្ធភាព។
៤-ចង្អៀតបន្ដិច ៖ នៅលើយន្ដហោះ គ្រប់កន្លែងគឺចង្អៀតបន្ដិចហើយទាំងផ្លូវដើរ, កៅអី និងបន្ទប់ទឹក យើងមិនអាចបំលាស់ខ្លួនបានស្រួលដូចលើគោកទេ ។
៥-មិនអាចឈប់ ឬចុះចតគ្រប់ទីកន្លែងដូចរថយន្ដទេ ៖ ការធ្វើដំណើរតាមរថយន្ដក្រុង អ្នកអាចឈប់ត្រង់ណាក៏បានដែរ តែតាមផ្លូវអាកាស លើកលែងតែមានករណីចាំបាច់បំផុតត្រូវបង្ខំចុះចត ។
៦-មិនអាចទៅដល់គោលដៅចុងក្រោយ ៖ ការធ្វើដំណើរតាមយន្ដហោះ អ្នកត្រូវចំណាយថែមទៀតទៅលើតាក់ស៊ី ឬរថភ្លើង ។
៧-ឧបទ្ទវហេតុធ្លាក់ ៖ បើទោះបីជាការសិក្សារកឃើញថា វាមានសុវត្ថិភាពខ្ពស់ជាងច្រើនតែយូរៗម្ដងមានធ្លាក់ ឬបាត់ដានមួយៗដែរ ។
ដោយឡែកការធ្វើដំណើរតាមរថយន្ដក្រុងក៏ដូចគ្នាដែរ អ្វីៗគ្រប់យ៉ាងវាមិនរលូនទាំងអស់នោះទេ គឺមានទាំងគុណសម្បតិ្ដ និងគុណវិបត្តិ ដែលយើងសូមលើកមកបង្ហាញជូនដូចខាងក្រោម ៖
I- ចំពោះគុណសម្បត្តិ ៖ ការធ្វើដំណើរតាមរថយន្ដក្រុងពិតជាចំណាយតិចជាង តាមផ្លូវអាកាស , នីតិវិធីចេញចូលនៅច្រកទ្វារអន្តរជាតិមិនស្មុគស្មាញច្រើន , បុគ្គលិកក្រុមហ៊ុនជួយបំពេញឯកសារផ្សេងៗដល់អ្នកដំណើរ , អាចមើលទេសភាពតាមដងផ្លូវ , មើលជីវភាពរស់នៅរបស់ប្រជាជននៃប្រទេសទាំងពីរ, ស្គាល់ទីតាំងភូមិសាស្ត្របានច្រើន ពិសេសគឺទៅដល់គោលដៅចុងក្រោយតែម្ដង ។
II- គុណវិបត្តិ ៖ ទោះបីជាការធ្វើដំណើរតាមរថយន្ដក្រុងមានគុណសម្បត្តិច្រើនក្ដី តែវាពិតជាធុញថប់ជាមួយនឹងការចំណាយពេលយូរនៅលើរថយន្ដ, ស្ទះចរាចរណ៍ និងបារម្ភពីគ្រោះថ្នាក់ច្រើនទៀតផង ។ ប្រសិនបើក្នុងរថយន្ដមានអ្នកដំណើរពុលក្អួតចង្អោរទៀតនោះ វាកាន់តែពិបាកទ្រាំ និងរាងចាលថែមទៀត ។
សរុបមកវិញ មធ្យោបាយទាំងពីរនេះសុទ្ធតែល្អដូចគ្នា ។ អ្វីដែលសំខាន់សូមជ្រើសរើសឲ្យសមស្របនឹងពេលវេលា កញ្ចប់ថវិកា និងចំណង់ចំណូលចិត្តរបស់អ្នក ។ ជាការផ្ដល់មតិ ប្រសិនបើលោកអ្នកមានលទ្ធភាពគ្រប់គ្រាន់ លោកអ្នកគួរតែធ្វើដំណើរតាមផ្លូវអាកាស វាជាជម្រើសមួយល្អប្រសើរ ៕
អត្ថបទនេះនាំជូនមកដោយក្រុមហ៊ុនធានារ៉ាប់រងជីវិត AIA
ចែករំលែកព័តមាននេះ