រាជធានីភ្នំពេញ ៖ នៅក្នុងសន្និសីទកាសែតនាល្ងាចថ្ងៃទី២៩ កក្កដានេះ សមាគមគ្រឹះស្ថានឧត្តមសិក្សា កម្ពុជា ការបោះឆ្នោតជ្រើសរើសតំណាងរាស្ត្រ នីតិកាលទី៦ ឆ្នាំ២០១៨ សមាគមគ្រឹះស្ថានឧត្តមសិក្សា កម្ពុជា ដែលមានគ្រឹះស្ថានសិក្សាឯកជនចំនួន១០៣ ជាសមាជិក បានចាត់តាំងសមាជិកចំនួន ២.៥៩៥នាក់ ដែលជានិស្សិត សាស្ត្រាចារ្យ បញ្ញាវន្ត គណៈគ្រប់គ្រងគ្រឹះស្ថានសិក្សា គ្របដណ្តប់តាមការិយាល័យបោះឆ្នោតទាំង២៥ខេត្ត-ក្រុង ទូទាំងប្រទេសជាលក្ខណៈចល័ត និងអចល័ត ដើម្បីធ្វើជាអ្នកសង្កេតការណ៍ជាតិសម្រាប់ការបោះឆ្នោត។
តាមការសង្កេតយ៉ាងយកចិត្តទុកដាក់ ហ្មត់ចត់ និងប្រកបដោយការទទួលខុសត្រូវ ទៅលើការបោះឆ្នោតជ្រើសរើសតំណាងរាស្ត្រ នីតិកាលទី៦នេះ សមាគមគ្រឹះស្ថានឧត្តមសិក្សាកម្ពុជា សូមថ្លែងការណ៍ដូចតទៅ៖ ១-ការសង្កេតឃើញថា៖ ១-ការចុះឈ្មោះអ្នកបោះឆ្នោត ការពិនិត្យមើលឈ្មោះអ្នកបោះឆ្នោត អញ្ជើញទៅបោះឆ្នោត ពេលតម្រង់ជួរ ពេលចូលទៅបោះឆ្នោត និងត្រឡប់ចេញវិញ គឺដោយស្ម័គ្រចិត្ត គ្មានការបង្ខិតបង្ខំ ប្រកបដោយទឹកមុខរីករាយ។ ២-ការចុះឈ្មោះគណបក្ស ការបើកទីស្នាក់ការគណបក្ស ការលើកស្លាកគណបក្ស ការចុះឈ្មោះភ្នាក់ងារគណបក្ស និងអ្នកសង្កេតការជាតិ-អន្តរជាតិ និងសកម្មភាពឃោសនា រកសំឡេងឆ្នោត សកម្មភាពរបស់អ្នកសង្កតការណ៍ អ្នកសារពត៌មាន បានប្រព្រឹត្តិទៅដោយរលូន គ្មានហិង្សា គ្មានការជេរប្រមាថ គ្មានសម្លុតគំរាមកំហែងគ្នា និង គ្មានការលក់ដូរសន្លឹកឆ្នោត។
៣-ស្ថានភាពរស់នៅប្រចាំថ្ងៃរបស់ប្រជាពលរដ្ឋមានលក្ខណៈធម្មតា គ្មានភ័យខ្លាច មិនទិញអង្ករទុក មិនចាក់សាំងទុកក្នុងយាន្តជំនិះ មិនបញ្ជូនគ្រួសារទៅបរទេស មិនដកប្រាក់ពីធនាគារ ក្រុមហ៊ុននៅតែទិញលក់ជំពាក់គ្នាជាធម្មតា ពន្ធនៅតែបង់ធម្មតា…។ល។ ៤-អាជ្ញាធរដែនដីនៅតែគ្រប់គ្រងរដ្ឋជាធម្មតា គ្រប់គ្រងថែរក្សាសន្តិសុខសង្គមដោយមិនរើសអើងគណបក្ស ឬប្រជាពលរដ្ឋ។ ៥-ស្ថាប័នជាតិគ្រប់លំដាប់ថ្នាក់ នៅតែបន្តភារកិច្ចរបស់ខ្លួនជាធម្មតា មានចិត្តនឹងន អញ្ជើញមកបោះឆ្នោតដោយស្ម័គ្រចិត្តដូចពលរដ្ឋដទៃដោយគ្មានការបង្ខឹតបង្ខំ។ ៦-អ្នកនយោបាយ ដែលឈរឈ្មោះបោះឆ្នោត បានចុះទៅមូលដ្ឋាននានាដើម្បីឃោសនារកសំឡេងឆ្នោត ដោយគោរព ទៅតាមច្បាប់បោះឆ្នោត។
២-ការសន្និដ្ឋាន៖ ១-ការបោះឆ្នោតជ្រើសរើសតំណាងរាស្ត្រ នីតិកាលទី៦ ឆ្នាំ២០១៨ នេះ ពិតជាបានប្រព្រឹត្តិទៅដោយរលូន គោរពច្បាប់ គោរពសិទ្ធមនុស្ស គ្មានការបង្ខិតបង្ខំ គ្មានហិង្សា គ្មានការភ័យខ្លាច គ្មានការលក់ដូរសន្លឹកឆ្នោត ស្ងប់ស្ងាត់ មានសណ្តាប់ធ្នាប់ល្អ និងស្ថិតនៅក្នុងបរិយាកាសនយោបាយប្រជាធិបតេយ្យ សេរី និងពហុបក្ស។ ២-ស្ថាប័ន គ.ជ.ប ជាស្ថាបនតែមួយគត់របស់ជាតិ បានអនុវត្តការបោះឆ្នោតជ្រើសរើសតំណាងរាស្ត្រ នីតិកាលទី៦ ឆ្នាំ២០១៨ នេះ ស្របទៅតាមច្បាប់បោះឆ្នោត និងលិខិតបទដ្ឋានគតិយុត្តិ និងបានប្រកាន់យកជំហរអព្យាក្រិត្យ យុត្តិធម៌ ស្អាតស្អំ និងតម្លាភាព៕
ចែករំលែកព័តមាននេះ