ខេត្តកំពង់ធំ ៖ ករណីគ្រោះថ្នាក់ចរាចរណ៍ នៅតែជាឃាតកលាក់មុខ ដែលបានសម្លាប់ប្រជារដ្ឋខ្មែរគ្មានលស់ថ្ងៃណាឡើយ។ ជាក់ស្ដែងនៅស្រុកបារាយណ៍បានកើតឡើងជាហេតុបណ្ដាលឲ្យគ្រោះថ្នាក់ និងស្លាប់ជាបន្តបន្ទាប់។ ករណីទី១-បានកើតឡើងនៅវេលាម៉ោង៧ ណនិង៣០នាទីយប់ ថ្ងៃទី២៧ ខែកក្កដា ឆ្នាំ២០១៧ លើកំណាត់ផ្លូវលំក្រាលកៅស៊ូ ភូមិចើងដើង ឃុំចើងដើង ស្រុកបារាយណ៍ ខេត្តកំពង់ធំ។
សមត្ថកិច្ចប្រាប់ថា គ្រោះថ្នាក់ចរាចរណ៍ខាងលើកើតឡើងរវាងម៉ូតូ បុកអ្នកថ្មើរជើង ដើរឆ្លងកាត់ផ្លូវឈ្មោះ ផេន ឃាន ភេទប្រុស អាយុ៥២ឆ្នាំ នៅភូមិប្រនាគ ឃុំចើងដើង ស្រុកបារាយណ៍ បណ្តាលឲ្យរបួសធ្ងន់បាក់ជើងឆ្វេង។ ចំណែកអ្នកបើកម៉ូតូម៉ាកហុងដា សេ១២៥ ពណ៌ខ្មៅ ពាក់ស្លាកលេខ កំពង់ធំ 1J-7222 បើកបរដោយឈ្មោះ សុទ្ធ បូរិន ភេទប្រុស អាយុ២៦ឆ្នាំ នៅភូមិស្វាយកាល់ ឃុំកកោះ ស្រុកសន្ទុក បានដួលចូលក្រោមរថយន្តកំពុងបើកបរផ្ទុយទិសគ្នា កិនស្លាប់នៅកន្លែងកើតហេតុ។ ហើយរថយន្តម៉ាកសាំងយ៉ុង មិនស្គាល់លេខ មិនស្គាល់អត្តសញ្ញាណអ្នកបើកបរ បានបន្ថែមល្បឿនបើករថយន្តគេចខ្លួនបាត់។
ក្រោយពេលកើតហេតុ វត្ថុតាងម៉ូតូយកមករក្សាទុកនៅអធិការដ្ឋាននគរបាលស្រុកបារាយណ៍។ ករណីទី២. បានកើតឡើងនៅ វេលាម៉ោង៦ និង៣០នាទីល្ងាច ថ្ងៃទី២៧ ខែកក្កដា ឆ្នាំ២០១៨ នៅលើផ្លូវលំក្រាលកៅស៊ូក្នុងភូមិរូង ឃុំក្រវ៉ា ស្រុកបារាយណ៍ គ្រោះថ្នាក់ចរាចរណ៍រវាងម៉ូតូបុកម៉ូតូបើកឆ្លងកាត់ផ្លូវ បណ្តាលឲ្យស្លាប់ មនុស្សម្នាក់ របួសធ្ងន់០៣នាក់ និងរបួសស្រាល០១នាក់ ដែលបង្កឡើងដោយម៉ូតូហុងដាវ៉េវ ពណ៌ក្រហម គ្មានស្លាកលេខ (បើកបរឆ្លងកាត់ផ្លូវពីកើតទៅលិច) ដោយឈ្មោះ អ៊ី ខេង ភេទប្រុស អាយុ២២ឆ្នាំ នៅភូមិត្រពាំងទូក ឃុំបាក់ស្នា ស្រុកបារាយណ៍ របួសធ្ងន់ ហើយត្រូវបានស្លាប់នៅមន្ទីរពេទ្យ បង្អែកបារាយណ៍ សន្ទុក។
អ្នករួមដំណើរជាមួយចំនួន០២នាក់មាន ១-ឈ្មោះ ផន ផេន ភេទប្រុស អាយុ៣៥ឆ្នាំ នៅភូមិឃុំ កើតហេតុខាងលើ(របួសស្រាល និងទី២. ឈ្មោះ សៀម លីសា ភេទស្រី អាយុ១០ ឆ្នាំ នៅភូមិឃុំកើតហេតុខាងលើ(របួសធ្ងន់) ចំណែកភាគីម្ខាងទៀតបើកម៉ូតូម៉ាកហុងដា សេ១២៥ ពណ៌ខ្មៅ ស្លាកលេខ កំពង់ធំ1G-0818 (បើកបរផ្លូវត្រង់ពីត្បូងទៅជើង) ដោយឈ្មោះ អៀន ភេទប្រុស អាយុ១៩ឆ្នាំ នៅភូមិពង្រលីង ឃុំក្រវ៉ា ស្រុកបារាយណ៍ របួសធ្ងន់ និងអ្នករួមដំណើរជាមួយ ឈ្មោះ ផន ទុំ ភេទប្រុស អាយុ១៨ឆ្នាំ រស់នៅភូមិជាមួយគ្នារងរបួសធ្ងន់ផងដែរ។ ករណីនេះ មូលហេតុ ដោយសារអ្នកបើកបរម៉ូតូហុងដាវ៉េវ ឈ្មោះ អ៊ី ខេង បើកបរឆ្លងកាត់ផ្លូវខ្ជីខ្ជាខ្វះការប្រុងប្រយ័ត្ន។
ក្រោយពេលកើតហេតុ វត្ថុតាងត្រូវបានសមត្ថកិច្ចរក្សាទុកនៅអធិការដ្ឋាននគរបាលស្រុកបារាយណ៍។ ករណីទី៣.បានកើតឡើងនៅវេលាម៉ោង១២ និង១០នាទីយប់ ថ្ងៃទី២៨ ខែកក្កដា ឆ្នាំ២០១៨ នៅលើកំណាត់ផ្លូវជាតិលេខ០៦ ចន្លោះគីឡូម៉ែត្រលេខ១១០-១១១ ភូមិថ្នល់ ឃុំទ្រៀល ស្រុកបារាយណ៍ មានករណីគ្រោះថ្នាក់ចរាចរណ៍កើតឡើងរវាងម៉ូតូ បុករថយន្តកំពុងចតនៅលើទ្រូងផ្លូវ ក្នុងទិសដៅស្របគ្នា(ពីត្បូងទៅជើង) បណ្តាលឲ្យស្លាប់មនុស្ស ០១នាក់ របួសធ្ងន់០២នាក់។
រថយន្តម៉ាកហ៊ីយ៉ាន់ដាយ ពណ៌ស ស្លាកលេខ កំពង់ធំ 3A-0091 អ្នកបើកបរមិនស្គាល់ អត្តសញ្ញាណ(គេចខ្លួនបាត់) ចំណែកម៉ូតូម៉ាកហុងដា សេ១២៥ ពណ៌ខ្មៅ ពាក់ស្លាកលេខ កណ្តាល 1J-2194 បើកបរដោយឈ្មោះ ញឹប ហៀប ភេទប្រុស អាយុ៣៦ឆ្នាំ នៅភូមិស៊ីវត្ថា ឃុំប្រាសាទ ស្រុកសន្ទុក (ស្លាប់នៅកន្លែងកើតហេតុ) ពាក់មួកសុវត្ថិភាព អ្នករួមដំណើរជាមួយចំនួន០២នាក់៖ ទី១- ឈ្មោះ ខេង ហួយ ភេទស្រី អាយុ៣៧ឆ្នាំ ត្រូវជាប្រពន្ធអ្នកបើកបរម៉ូតូ (របួសធ្ងន់ បាក់កដៃស្តាំ) (ពាក់មួកសុវត្ថិភាព) និង២-ឈ្មោះ ខេង ប៉ាន ភេទស្រី អាយុ៤០ឆ្នាំ នៅភូមិឃុំជាមួយគ្នា (របួសធ្ងន់ មិនពាក់មួកសុវត្ថិភាព)។
វត្ថុតាងម៉ូតូយកមករក្សាទុកនៅអធិការដ្ឋាននគរបាលស្រុកបារាយណ៍ ចំណែករថយន្តរក្សាទុកនៅកន្លែង កើតហេតុ (ពីព្រោះរថយន្តខូច)។ មូលហេតុជាបឋមបង្កឡើងដោយរថយន្តចតលើទ្រូងផ្លូវគ្មានដាក់សញ្ញា និងគ្មានភ្លើងបំភ្លឺ រួមផ្សំនឹងអ្នកបើកបរម៉ូតូមានល្បឿនលឿន៕
ចែករំលែកព័តមាននេះ