ខេត្តស្ទឹងត្រែង ៖ ការិយាល័យបោះឆ្នោតចំនួន១០កន្លែងនៅស្រុកសៀមប៉ាងបានរងនូវផលប៉ះពាល់ដោយទឹកជំនន់ជន់លិច ហើយឃុំតាឡាត ស្រុកសេសាន អាចរៀបចំដំណើរការនៅទីតាំងចាស់ដោយសារកម្ពស់ទឹកបានស្រកចុះវិញ នេះបើតាមការអោយដឹងពីលោក ម៉ែន គង់ នាយករងរដ្ឋបាលសាលាខេត្តនិងជាអ្នកនាំពាក្យនៃសាលាខេត្តស្ទឹងត្រែងកាលពីរសៀលថ្ងៃទី២៧ កក្កដា ឆ្នាំ២០១៨។
លោក ម៉ែន គង់ បានបញ្ជាក់បន្ថែមថា ស្ថានភាពទឹកនៅកម្រិតធម្មតាបើធៀបកាលពីព្រឹកត្រឹម១២,៤០ម៉ែត្រ ចំណែកប្រជាពលរដ្ឋដែលបានជម្លៀសស្ថិតក្នុងស្ថិតិជាងមួយពាន់ពីររយគ្រួសារដដែល ។ លោកបន្តថាក្នុងករណីទឹកជំនន់នេះដែរមិនមានប្រជាពលរដ្ឋណាម្នាក់រងគ្រោះថ្នាក់ដល់អាយុជីវិតនោះឡើយ រួមទាំងសត្វពាហនៈ បន្ទាប់ពីជម្លៀសទៅកាន់ទីទួលសុវត្ថិភាពក្បែភូមិកររបស់ពួកគាត់នោះ។
លោកបន្តថា ការិយាល័យដែលជន់លិចកំពុងស្ថិតក្នុងការតាមដាន ប្រសិនបើការិយាល័យណាដែលប្រជាពលរដ្ឋអាចមានលទ្ធភាពទៅបោះបាននឹងសម្រួលទៅតាមនោះតែប្រសិនបើមិនអាចទៅបោះបាន គណៈ
កម្មាការនឹងស្នើរកទីតាំងដើម្បីដំណើរការបោះឬដាក់ការិយាល័យនៅទីទួលសុវត្ថិភាពនោះតែម្តង។
អធិការនគរបាលស្រុកសៀមប៉ាង លោកជឹម អេន បានអោយដឹងថា ប្រជាពលរដ្ឋដែលជម្លៀសទៅកាន់ទីទួលសុវត្ថិភាពមានជាងមួយពាន់ពីររយគ្រួសារនៅទីតាំងផ្សេងគ្នា ហើយអាជ្ញាធរខេត្តដឹកនាំដោយលោកអភិបាលខេត្តបានចុះជួយអន្តរាគមន៍ និងនាំអំណោយឃីតក្នុងមួយគ្រួសារទទួលបានមួយកញ្ចប់ ជាងនេះទៅទៀត មានក្រុមគ្រូពេទ្យស្ម័គ្រចិត្តចុះជួយផ្តល់ឱសថសម្លាប់មេរោគក្នុងទឹក ឱសថសំខាន់ៗ ព្រមទាំងមុងសុវត្ថិភាពផងដែរ។
លោក ហង់ កុង ប្រធានគណៈកម្មាការរៀបចំការបោះឆ្នោតខេត្តបានបញ្ជាក់ថាការិយាល័យបោះឆ្នោតនៅស្រុកសៀមប៉ាងសរុបចំនួន១០កន្លែងរងផលប៉ះពាល់ ក្នុងនោះ៤កន្លែងបានលិច និង៦កន្លែងទៀតត្រៀមលិច ។ លោកបន្តថា ក្នុងចំណោមការិយាល័យ៤កន្លែងដែលបានលិចនោះ រួមមានសាលារៀនកែងញ៉ៃការិយាល័យលេខ០០៦៩នៅឃុំសេកុងប្តូរទៅវត្តកែងញ៉ៃ សាលាឆទានចន្ទុ ឃុំសេកុងការិយាល័យលេខ០០៧៤ប្តូរទៅសាលារៀនចន្ទុ។ ឃុំសន្តិភាពសាលារៀនទាក់ទាមការិយាល័យលេខ០០៧៧ប្តូរទៅទីទួលសាលាឃុំ និងឃុំថ្មកែវ សាលារៀនខាន់ឌឿនការិយាល័យលេខ០០៩៥ពុំទាន់មានកន្លែងប្តូរនៅឡើយទេ។
ចំណែកការិយាល័យដែលត្រៀមលិចមានការិយាល័យលេខ០០៨៣, ០០៨៤, ០០៨៥, ០០៨០ស្ថិតក្នុងឃុំស្រែសំបូរ និងការិយាល័យលេខ០០៩១, ០០៩២ ស្ថិតក្នុងឃុំថ្មកែវ កំពុងរងការគំរាមកំហែងដោយកម្រិតទឹក។លោកបន្ថែមទៀត ថានៅឃុំតាឡាតការិយាល័យលេខ០០២៦ស្ថិតនៅសាលាបឋមសិក្សាខ្សាច់ថ្មីធំរងនូវការជន់លិចដែរ តែទឹកស្រកវិញអាចនឹងដំណើរការបានធម្មតា រីឯស្រុកសៀមបូកមានផ្លូវពីរខ្សែដែលប្រជាពលរដ្ឋធ្វើដំណើរទៅបោះឆ្នោតត្រូវទឹកជន់លិច។
តាមសេចក្តីប្រកាសរបស់អាជ្ញាធរខេត្តស្ទឹងត្រែងគិតត្រឹមម៉ោង១១និង៣០នាទីព្រឹកថ្ងៃទី២៧ ខែកក្កដា ឆ្នាំ២០១៨នេះ ទឹកទន្លេសេកុងបន្តហក់ឡើងកម្ពស់១២,៤៦ម៉ែត្រលើសកម្រិតប្រកាសអាសន្នជិតមួយម៉ែត្រ៕
ចែករំលែកព័តមាននេះ