ខេត្តបន្ទាយមានជ័យ ៖ បុរសម្នាក់បានស្លាប់ភ្លាមៗនៅនឹងកន្លែងកើតហេតុដោយសារគ្រោះថ្នាក់ចរាចរណ៍រវាងរថយន្តបុកជាមួយម៉ូតូ នៅចំណុចផ្លូវបំបែកជាបួន លើដងផ្លូវបេតុង ក្នុងភូមិបាលិលេយ្យ១ សង្កាត់ប៉ោយប៉ែត និងក្រុងប៉ោយប៉ែត កាលពីវេលាម៉ោងជាង៥ព្រឹកថ្ងៃទី២៧ កក្កដា…
ខេត្តបន្ទាយមានជ័យ ៖ បុរសម្នាក់បានស្លាប់ភ្លាមៗនៅនឹងកន្លែងកើតហេតុដោយសារគ្រោះថ្នាក់ចរាចរណ៍រវាងរថយន្តបុកជាមួយម៉ូតូ នៅចំណុចផ្លូវបំបែកជាបួន លើដងផ្លូវបេតុង ក្នុងភូមិបាលិលេយ្យ១ សង្កាត់ប៉ោយប៉ែត និងក្រុងប៉ោយប៉ែត កាលពីវេលាម៉ោងជាង៥ព្រឹកថ្ងៃទី២៧ កក្កដា ២០១៨ ។
ជនរងគ្រោះឈ្មោះហេង ភេទប្រុស អាយុ២០ឆ្នាំ ស្នាក់នៅក្នុងភូមិកើតហេតុ ។ ជនរងគ្រោះជិះម៉ូតូមួយគ្រឿងម៉ាកឌ្រីមសង់ ធុនសេ១២៥ ពណ៌ខ្មៅ ពាក់ស្លាកលេខ បន្ទាយមានជ័យ ១D-៣៤៨៩ ។
តាមប្រភពព័ត៌មានបានឱ្យដឹងថា បុរសម្នាក់ជិះម៉ូតូមួយគ្រឿងធ្វើដំណើរក្នុងទិសដៅពីជើងទៅត្បូង លុះដល់ផ្លូវបំបែកជាបួនចំណុចកើតហេតុ ស្រាប់តែត្រូវរថយន្តមិនស្គាល់ម៉ាកមួយគ្រឿងដែលបើកបោះពួយយ៉ាងលឿនមកពីទិសខាងកើតបុកម៉ូតូពេញទំហឹង បណ្តាលឲ្យអ្នកបើកបរម៉ូតូដួលបោកក្បាលស្លាប់នៅនឹងកន្លែងតែម្តង ចំណែកម៉ូតូបានរងការខូចខាតមួយកំណាត់មុខ។ រីឯរថយន្តបង្កបានបើកគេចបាត់ស្រមោល ។
សពជនរងគ្រោះត្រូវបានសាច់ញាតិយកទៅធ្វើបុណ្យតាមប្រពៃណីនៅវត្តសូរិយាមរង្សី ហៅវត្តថ្មីក្នុងភូមិកើតហេតុ ។ ចំណែកម៉ូតូរបស់ជនរងគ្រោះដែលរងការខូចខាតមួយកំណាត់មុខត្រូវបានសមត្ថកិច្ចយកទៅរក្សាទុកនៅអធិការដ្ឋាននគរបាលក្រុងប៉ោយប៉ែតដើម្បីបន្តនិតិវិធី។ សមត្ថកិច្ចបានប្រាប់ថា មកទល់ពេលនេះមិនទាន់ស្គាល់អត្តសញ្ញាណអ្នកបើកបររថយន្តបង្កនៅឡើយទេ ប៉ុន្តែសមត្ថកិច្ចកំពុងស្រាវជ្រាវយ៉ាងដុតដៃដុតជើង៕
ចែករំលែកព័តមាននេះ