រាជធានីភ្នំពេញ ៖ រដ្ឋសភានៃព្រះរាជាណាចក្រកម្ពុជាបានសេចក្តីថ្លែងការណ៍សម្តែងការខកចិត្តចំពោះតំណាងរាស្ត្រអាមេរិកបានអនុម័តច្បាប់ប្រជាធិបតេយ្យឆ្នាំ២០១៨ កាលពេលថ្មីកន្លែងមកនេះ ។
យោងតាមសេចក្តីថ្លែងការណ៍របស់រដ្ឋសភាកម្ពុជាចេញផ្សាយនៅថ្ងៃទី២៧ ខែកក្កដា ឆ្នាំ២០១៨ បានសម្តែងការខកចិត្តចំពោះសភាតំណាងរាស្ត្រអាមេរិកដែលបានអនុម័តច្បាប់ «ច្បាប់ប្រជាធិបតេយ្យកម្ពុជាឆ្នាំ២០១៨» ដើម្បីវាយប្រហារលើរាជរដ្ឋាភិបាលកម្ពុជា ។
សេចក្តីថ្លែងការណ៍រដ្ឋសភាបានសរសេរថា រដ្ឋសភានៃព្រះរាជាណាចក្រកម្ពុជាសម្តែង នូវការខកចិត្តយ៉ាងខ្លាំងដែលសភាតំណាងរាស្ត្រអាមេរិកបានអនុម័ត «ច្បាប់ប្រជាធិបតេយ្យកម្ពុជាឆ្នាំ២០១៨» កាលពីថ្ងៃទី២៥ ខែកក្កដា ឆ្នាំ២០១៨ ។ នេះសបញ្ជាក់ពី «ទង្វើនៃការបំពាន» ដោយស្តង់ដា «អ្នកធំមិនចេះខុស» ហើយទង្វើនេះស្មើនឹងការប្រកា សនូវអរិយភាពប្រឆាំងនឹងរដ្ឋាភិបាលស្របច្បាប់នៃប្រទេសមួយដែលមិនអាចសះជាបាន ។
រដ្ឋសភាកម្ពុជាបានបញ្ជាក់ថា ៖ «នយោបាយការបរទេសរបស់កម្ពុជាបានចាក់ឫសយ៉ាងជ្រៅទៅក្នុងគោលការណ៍សន្តិសហវិជ្ជមាន ហើយយើងតែងតែស្វែងរកមិត្ត និង មិនចងសត្រូវជាមួយប្រទេសណាមួយនោះទេ ។ ផ្ទុយទៅវិញ ដូចបណ្តារដ្ឋអធិបតេយ្យនានាដែររាជរដ្ឋាភិបាលកម្ពុជាបានបញ្ជាក់ជំហរមិនងាករេក្នុងការការពារសន្តិភាព អធិបតេយ្យភាព និងឯករាជ្យភាពរបស់កម្ពុជា ប្រឆាំងនឹងការបំពារបំពាន ឬការជ្រៀតជ្រែកពីសំណាក់ស្ថាប័នបរទេសទោះបីជាក្រោមលេសណាមួយឬកាលៈទេសៈណាក៏ដោយ» ។
ថ្លែងការណ៍បន្តទៀតថា ច្បាប់នេះគឺជាគម្រោងការមួយទៀតដែលបានរៀបចំទុកជាមុនរបស់សភាអាមេរិក និងសម្ព័ន្ធមិត្តរបស់ខ្លួនដើម្បីវាយប្រហារជាប្រព័ន្ធប្រឆាំងនឹងរាជរដ្ឋាភិបាលកម្ពុជាដែលកើតឡើងពីការបោះឆ្នោតតាមគោលការណ៍លទ្ធិប្រជាធិបតេយ្យហើយដែលបានបដិសេធមិនដើរតាមភូមិសាស្ត្រនយោបាយរបស់អាមេរិក ។ ការវាយប្រហារនេះមានគោលដៅដាក់ទណ្ឌកម្មចំពោះរដ្ឋឯករាជ្យដែលមានឥរិយាបទមិនគោរពតាមការបញ្ជារបស់ពួកគេហើយបំផ្លាញនូវភាពជឿជាក់លើការបោះឆ្នោតជាសកលនៅកម្ពុជាដែលនឹងរៀបចំក្នុងពេលប៉ុន្មានថ្ងៃខាងមុខទៀតនេះ ៕
ចែករំលែកព័តមាននេះ