រាជធានីភ្នំពេញ ៖ រថយន្តស៊ីនទ្រីដឹកសំរាមរបស់ក្រុមហ៊ុន ស៊ីន ទ្រី មួយគ្រឿងបានបើកគេចរថយន្តមួយគ្រឿងបត់ឆ្លងផ្លូវ ហើយជ្រុលចង្កូតទៅកៀររបាំងថ្ម បណ្តាលឲ្យវៀចចំនួន៣កង់ ។ គ្រោះថ្នាក់ចរាចរណ៍នេះបានកើតឡើងកាលពីវេលាម៉ោង១០និង១០នាទីព្រឹក ថ្ងៃទី២៦ ខែកក្កដា ឆ្នាំ២០១៨ នៅលើផ្លូវ៥៩៨ ភូមិទំនប់ សង្កាត់ភ្នំពេញថ្មី ខណ្ឌសែនសុខ ។
រថយន្តក្រុមហ៊ុនស៊ីនទ្រីបើកបរដោយ ឈ្មោះ ផុន ពៅ ភេទប្រុស អាយុ២៥ឆ្នាំ ស្នាក់នៅភូមិម័រ សង្កាត់ដង្កោ ខណ្ឌដង្កោ ។
តាមអ្នកបើកបរបានឲ្យដឹងថា មុនកើតហេតុរថយន្តគាត់បានត្រឡប់មកពីប្រមូលសំរាមវិញ ដោយធ្វើដំណើរតាមផ្លូវលេខ៥៩៨ ក្នុងទិសដៅពីជើងទៅត្បូង ។ នៅពេលមកដល់ចំណុចកើតហេតុមានរថយន្តប្រភេទទួរីស១២កៅអីមួយគ្រឿង បើកមុខចំហៀងខាងស្តាំ ហើយបតឆ្វេងឆ្លងផ្លូវកាត់មុខរថយន្តរបស់គាត់ ។ តាមអ្នកបើកបរបានឲ្យដឹងទៀតថា ខណៈនោះក៏បានទាញចង្កូតគេចកុំឲ្យបុកគូថរថយន្តនោះក៏ជ្រុលចង្កូតទៅបុក និងកៀររបាំងថ្មបណ្តាលឲ្យវៀចចំនួន៣កង់តែម្តង ។
បន្ទាប់ពីគ្រោះថ្នាក់នគរបាលក៏បានចុះទៅកន្លែងកើតហេតុនាំយករថយន្តទៅកាន់ការិយាល័យចរាចរណ៍ជើងគោកនៃស្នងការនគរបាលរាជធានីភ្នំពេញ ដើម្បីដោះស្រាយសងការខូចខាត ៕
ចែករំលែកព័តមាននេះ