រាជធានីភ្នំពេញ ៖ បុរសរងរបួសធ្ងន់ខណៈពេលបញ្ជូនទៅដល់មន្ទីរពេទ្យបានដាច់ខ្យល់ស្លាប់ និងបុរសបីនាក់ទៀតរងរបួសធ្ងន់ស្រាល ខណៈដែលពួកគេទាំងនោះបានជួបគ្រោះថ្នាក់ចរាចរណ៍រវាងម៉ូតូបុកនឹងម៉ូតូ កាលពីវេលាម៉ោង១០និង៣០នាទីយប់ថ្ងៃទី២៥ ខែកក្កដា ឆ្នាំ២០១៨ ទល់មុខនឹងមុខផ្ទះចៅសង្កាត់ស្ទឹងមានជ័យ១ ផ្លូវ២១៧…
រាជធានីភ្នំពេញ ៖ បុរសរងរបួសធ្ងន់ខណៈពេលបញ្ជូនទៅដល់មន្ទីរពេទ្យបានដាច់ខ្យល់ស្លាប់ និងបុរសបីនាក់ទៀតរងរបួសធ្ងន់ស្រាល ខណៈដែលពួកគេទាំងនោះបានជួបគ្រោះថ្នាក់ចរាចរណ៍រវាងម៉ូតូបុកនឹងម៉ូតូ កាលពីវេលាម៉ោង១០និង៣០នាទីយប់ថ្ងៃទី២៥ ខែកក្កដា ឆ្នាំ២០១៨ ទល់មុខនឹងមុខផ្ទះចៅសង្កាត់ស្ទឹងមានជ័យ១ ផ្លូវ២១៧ សង្កាត់ស្ទឹងមានជ័យ២ ខណ្ឌមានជ័យ ។
សពជនរងគ្រោះមានឈ្មោះ ម៉ូ ពុំសុផល ភេទប្រុស អាយុ៦០ឆ្នាំ មុខរបរបុគ្គលិកក្រុមហ៊ុនឯកជន ស្នាក់នៅភូមិឬស្សី សង្កាត់ស្ទឹងមានជ័យ២ ខណ្ឌមានជ័យ មានស្រុកកំណើត ភូមិប្រឡាយធំ ឃុំវាល ស្រុកកណ្តៀង ខេត្តពោធិ៍សាត់ ជិះម៉ូតូម៉ាកហុងដាឌ្រីម សេរីឆ្នាំ២០១០ ពណ៌ខ្មៅ ពាក់ស្លាកលេខ ពោធិ៍សាត់ 1A-1814 ។ ចំណែកភាគីបង្កម្ខាងទៀតមិនបានឲ្យស្គាល់អត្តសញ្ញាណនៅឡើយទេគ្រាន់តែដឹងថា ជិះម៉ូតូម៉ាកស៊ុយសុគីស្មាសវី ពណ៌ខ្មៅ ពាក់ស្លាកលេខ ភ្នំពេញ 1BG- 4308 ។
តាមប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុគេបានឃើញបុរសរងគ្រោះខាងលើបានជិះម៉ូតូម៉ាកហុងដាឌ្រីម សេរីឆ្នាំ២០១០ ពណ៌ខ្មៅធ្វើដំណើរតាមផ្លូវ២១៧ ក្នុងទិសដៅពីជើងទៅត្បូង ខណៈមកដល់ចំណុចកើតហេតុបានបត់ឆ្វេងឆ្លងកាត់ទទឹងផ្លូវចូលទៅតាមផ្លូវបេតុង ហើយស្របពេលដែលម៉ូតូរងគ្រោះឆ្លងបានពាក់កណ្តាលផ្លូវក៏ស្រាប់តែមាន បុរសបីនាក់ទៀតវ័យជាង២០ឆ្នាំ បានជិះម៉ូតូម៉ាកស៊ុយសុគីស្មាសវី ពណ៌ខ្មៅ បានធ្វើដំណើរតាមផ្លូវ២១៧ ក្នុងទិសដៅបញ្ច្រាសទិសគ្នាពីត្បូងទៅជើងក្នុងល្បឿនលឿនដូចហោះបានជ្រុលទៅបុកចំពាក់កណ្តាលម៉ូតូជនរងគ្រោះដែលជិះម្នាក់ឯងយ៉ាងពេញទំហឹងបណ្តាលឲ្យហោះប្លោងជិត១០ម៉ែត្រ ជនរងគ្រោះពីកន្លែងកើតហេតុបោកក្បាលទៅផ្លូវ ហូរឈាមជោគជាំ ហើយភ្លាមៗនោះដែរ ជនរងគ្រោះត្រូវរថយន្តសង្គ្រោះបានមកដឹកយកទៅសង្គ្រោះនៅគ្លិនិកឯកជន តែពេលទៅគ្លិនិក ស្រាប់ជនរងគ្រោះបានដាច់ខ្យល់ស្លាប់បាត់ទៅហើយ ។
ដោយឡែកខាងម៉ូតូបង្ករដែលជិះដោយបុរសបីនាក់អ្នកវិញ អ្នកបើកម៉ូតូរងរបួសបែកមាត់ ហើយអ្នកអង្គុយខាងក្រោយរងរបួសរលាត់ដៃរលាត់ជើងទាំងបីនាក់ត្រូវបានរថយន្តសង្គ្រោះបានមកដឹកយកទៅសង្គ្រោះនៅគ្លិនិកផងដែរ ។
ក្រោយពេលកើតហេតុ សមត្ថកិច្ចមូលដ្ឋានបានចុះទៅកន្លែងកើតហេតុ រួចហើយបានធ្វើទំនាក់ទំនងហៅសាច់ញាតិឲ្យមកទទួលយកសពជនរងគ្រោះយកទៅតម្កល់ធ្វើបុណ្យនៅវត្តសំបួរមាស ខណ្ឌដង្កោ ចំណែកម៉ូតូទាំងពីរគ្រឿងត្រូវបានសមត្ថកិច្ចជំនាញបានមកធ្វើការវាស់វែងយកទៅរក្សានៅការិយាល័យចរាចរណ៍ជើងគោករាជធានីភ្នំពេញ ដើម្បីរង់ចាំធ្វើការដោះស្រាយ ៕
ចែករំលែកព័តមាននេះ