ខេត្តប៉ៃលិន ៖ ដើម្បីកាត់បន្ថយការចំណាយទិញម្ហូបអាហារ និងត្រីសាច់នៅឯផ្សារប្រជាពលរដ្ឋមួយចំនួននាំគ្នាដើរចាប់ត្រី កំពឹស ក្តាម នៅតាមដីស្រែភក់ៗ ដែលគេកំពុងបើកបរម៉ាស៊ីនច្រូតស្រូវ ហើយក៏មានអ្នកខ្លះចាប់បានជាច្រើន ដើម្បីយកទៅធ្វើម្ហូបអាហារផ្គត់ផ្គង់ជីវភាពគ្រួសារ ។
ការដើរចាប់ត្រីនៅតាមវាលស្រែដែលរីងទឹកតិចៗនេះបានកើតឡើងកាលពីវេលារសៀលថ្ងៃទី២៤ ខែកក្កដា ឆ្នាំ២០១៨ ស្ថិតនៅក្បែរផ្លូវជាតិលេខ៥៩ ក្នុងភូមិកុយ ឃុំសាលាក្រៅ ស្រុកសាលាក្រៅ ។
ប្រភពព័ត៌មានពីស្ត្រីម្នាក់ ឈ្មោះ សុខ វី អាយុ៣៨ឆ្នាំ រស់នៅក្នុងភូមិភ្នំស្ពុង ឃុំសាលាក្រៅ ស្រុកសាលាក្រៅបានរៀបរាប់ឱ្យដឹងថា ដល់ពេលគេប្រមូលផលស្រូវប្រាំងម្តងៗ គាត់តែងតែនាំកូនរបស់ខ្លួនដើរចាប់ត្រីនៅតាមចង្អូរម៉ាស៊ីនច្រូតស្រូវ ដោយមានទឹកភក់ៗ ហើយក៏មានកំពឹស ត្រីក្រាញ់ ត្រីឆ្លូញ ត្រីផ្ទក់ ក្តាម ខ្យងជាដើម ។ គាត់បន្តទៀតថា កន្លែងខ្លះយកកូនកញ្ច្រែងទៅចូកបានជាច្រើន អ្នកខ្លះបានកន្លះធុង ខ្លះទៀតបាន១ធុង ដើម្បីយកទៅធ្វើម្ហូបអាហារផ្គត់ផ្គង់ក្រុមគ្រួសារ ដែលចៀសវាងទៅទិញម្ហូបអាហារនៅឯផ្សារផងដែរ ។
នៅក្នុងផ្សារសាលាក្រៅត្រី១គីឡូឈ្មួញលក់តម្លៃ១២០០០រៀល ទៅ១៤០០០រៀលឯណោះ ដោយពួកគាត់មួយចំនួនមិនសូវមានថវិកាចាយវាយគ្រប់គ្រាន់ឱ្យតែមានគេចុះច្រូតនៅតាមស្រែប្រាំងម្តងៗ ពួកគាត់ពិតជាសប្បាយរីករាយក្នុងការដើរចាប់ត្រីពុលនៅតាមទឹករាក់ៗនៅក្នុងស្រែ ។ មិនមែនតែគាត់ប៉ុណ្ណោះទេ សូម្បីតែអ្នកភូមិផ្សេងៗក៏នាំគ្នាទាំងក្មេងចាស់ប្រុសស្រីយកកញ្ច្រែង ធុង ដើរចាប់ប្រសាចពេញវាលស្រែពេលរថយន្តកំពុងច្រូតស្រូវ ដែលម្នាក់ប្រឡាក់ភក់ស្រមក តែក៏មានការសប្បាយរីករាយ ។ មិនត្រឹមតែត្រីតូចៗនោះទេ កន្លែងខ្លះទៀតក៏មានត្រីធំៗប៉ុន.កដៃមនុស្សចាស់ជាច្រើនក្បាលនៅក្នុងស្រែផងដែរ ។
គាត់បញ្ជាក់ថា ត្រីស្រែមិនមានសារធាតុគីមីនោះឡើយ គឺមានរសជាតិធម្មជាតិសុទ្ធសាធ ហើយពេលធ្វើម្ហូបដូចជា ស្ងោរ ស្ល និងអាំងហូបម្តងៗ មានរស់ជាតិឈ្ងុយឆ្ងាញ់ និងផ្អែមមាត់ មិនដូចត្រីងាប់ដែលគេដាក់លក់នៅក្នុងផ្សារនោះទេ ។
ចំណែកម្ចាស់ស្រែម្នាក់ឈ្មោះ ម៉ៅ ភេទប្រុស បានឱ្យដឹងថា មិនត្រឹមតែអ្នកភូមិដើរចាប់ត្រី ពេលគាត់ច្រូតស្រូវម្តងៗនោះទេ សូម្បីតែប្រពន្ធកូនរបស់គាត់ក៏នាំគ្នាដើរចាប់ត្រីយកទៅធ្វើម្ហូបទទួលទានផងដែរ ដោយមើលទៅពួកគេនាំគ្នាដេញចាប់ត្រីរត់ពេញវាលស្រែហាក់ដូចជាសប្បាយរីករាយ និងបានម្ហូបថែមទៀត ។ ប៉ុន្តែត្រូវមានឧបករណ៍ចាប់ត្រីដូចជា កញ្ច្រែងជ័រ កញ្ច្រែងឫស្សីជាដើម ព្រោះក្នុងស្រែ កន្លែងខ្លះនៅមានទឹកជ្រៅៗ ពិបាកក្នុងការចាប់នឹងដៃផ្ទាល់ ៕
ចែករំលែកព័តមាននេះ