រាជធានីភ្នំពេញ៖ រ៉ន ចាន់ឌីន នៅមិនទាន់មានកិច្ចសន្យាជាមួយផលិតកម្មហង្សមាស ក្នុងនាមជាតារាចម្រៀងទេ បើទោះជានាងតែងតែមានឱកាសឡើងឆាករបស់ហង្សមាស ក្នុងកម្មវិធី ធំៗញឹកញាប់ក្តី ។ ទោះជាយ៉ាងណាក្តីរ៉ន ចាន់ឌីន ថាផលិតកម្មហង្សមាសបានប្រកាសចេញបទចម្រៀងឲ្យនាងរួចហើយ ដោយក្នុងពេលដ៏ខ្លីខាងមុខនាងនឹងមានបទចម្រៀងផ្ទាល់ខ្លួន ។
រ៉ន ចាន់ឌីន បានវិវឌ្ឍខ្លួនជាតារាចម្រៀងពេញមុខក្រោយពីបានបញ្ចប់ការប្រឡងក្នុងកម្មវិធីឌឹវ៉យ ឃីតមក ។ មួយរយៈនេះក្មេងស្រីដែលធ្វើឲ្យគេចាប់ចិត្តព្រោះមានសំឡេងពីរោះចាន់ឌីន បានលេចមុខមាត់ជាបន្តបន្ទាប់តាមកញ្ចក់ទូរទស្សន៍។ អ្វីដែលពិសេសចាន់ឌីនគ្រោងចេញចម្រៀងផ្ទាល់ខ្លួនក្នុងផលិតកម្មធំប្រចាំប្រទេសដោយនោះកាន់តែរុញនាងឲ្យល្បីឈ្មោះខ្លាំងឡើង ។
ក្នុងឈុតសម្លៀកបំពាក់យេយេទាន់សម័យជាមួយទឹកមុខស្រស់ថ្លាកុមារីរ៉ន ចាន់ឌីនដែលមានវ័យ១៣ឆ្នាំ មានទឹកដមសំឡេងពីរោះរណ្តំចិត្តបានចូលរូលរួមជាតារាកិត្តិយសក្នុងកម្មវិធីប្រគំតន្ត្រីផ្សាយបន្តផ្ទាល់របស់ស្ថានីយទូរទស្សន៍ប៉ុស្តីលេខ៥កាលពីពេល ថ្មីៗកន្លងមក ។
នាពេលនោះនាងរៀបរាប់ថា«ខ្ញុំត្រៀមខ្លួនថតចម្រៀងផ្ទាល់ខ្លួនប្រមាណជា២បទដោយខាងផលិតកម្មគាត់ឲ្យត្រៀមទុកជាមុន ថែរក្សាសុខភាពឲ្យល្អថតសំឡេងចេញឌីស។
ដ្បិតតែបានច្រៀងជូនផលិតកម្មហង្សមាសមែន តែការទទួលចុះកុងត្រានៅមិនទាន់ច្បាស់នៅឡើយទេ គ្រាន់តែក្នុងចិត្តសប្បាយរីករាយ។ ក្រោយពីនាងខ្ញុំបានប្រឡងជាប់ដល់វគ្គផ្តាច់ព្រ័ត្រមកឃើញថាមិនត្រឹមតែរូបនាងខ្ញុំមានឱកាសចេញមុខតាមវេទិកាចម្រៀងនោះទេ សូម្បីតែសមាជិកប្រឡងក៏ខាងទូរទស្សន៍ជួយឲ្យមានទីផ្សារសិល្បៈទាំងអ្នកជាប់ និងអ្នកធ្លាក់ ។ អ្វីដែលនាងខ្ញុំខំប្រឹងមានតែព្យាយាមហាត់ពត់លត់ដំសំឡេងឲ្យមានភាពកាន់តែប្រសើរជាងនេះ ដើម្បីបម្រើអារម្មណ៍ប្រិយមិត្តទស្សនិកជនដែលចូលចិត្តស្រឡាញ់គាំទ្ររូបនាងខ្ញុំ ។
គ្រប់យ៉ាងគឺមានសភាពច្បាស់លាស់អស់ហើយ ដោយខាងហង្សមាសបានប្រកាសប្រាប់នាងខ្ញុំមិនឲ្យហក់លោតទៅណា និងរង់ចាំហាត់បទចម្រៀង២បទដើម្បីចេញលក់ផ្លូវការនោះផង ។ ហង្សមាស បានរៀបចំបទចម្រៀងចំនួន២បទឲ្យនាងខ្ញុំ ហើយបានទាំងប្រាប់នាងខ្ញុំថាបើបទចម្រៀង២បទស្ទាបស្ទង់របស់នាងខ្ញុំទទួលជោគជ័យ នោះទើបឈានដល់ចំណុចចុះកុងត្រាតែម្ដង »។
រ៉ន ចាន់ឌីន មិនទាន់រំពឹងថាឱកាសចេញបទចម្រៀងនៅក្នុងផលិតកម្មហង្សមាស នឹងជួយឲ្យនាងទទួលបានកេរ្តិ៍ឈ្មោះបន្ថែមកម្រិតណានោះទេ ប៉ុន្តែនាងនឹងប្រឹងឲ្យអស់ពីសមត្ថភាពដោយសារតែនាងចង់ក្លាយជាតារាចម្រៀងហង្សមាស នាពេលអនាគត ៕
ចែករំលែកព័តមាននេះ