រាជធានីភ្នំពេញ ៖ ស្របពេលដែលគណៈកម្មាធិការជាតិអូឡាំពិកកម្ពុជា ក៏ដូចជាក្រសួងអប់រំ យុវជន និងកីឡា កំពុងតែផ្ដោតការយកចិត្តទុកដាក់យ៉ាងខ្លាំងទៅលើគ្រប់ប្រភេទកីឡាជាតិ ធ្វើយ៉ាងណាឱ្យការប្រកួតកីឡាស៊ីហ្គេមលើកទី៣២ ឆ្នាំ២០២៣ ដែលកម្ពុជាទទួលធ្វើជាម្ចាស់ផ្ទះទទួលបានជោគជ័យ។…
រាជធានីភ្នំពេញ ៖ ស្របពេលដែលគណៈកម្មាធិការជាតិអូឡាំពិកកម្ពុជា ក៏ដូចជាក្រសួងអប់រំ យុវជន និងកីឡា កំពុងតែផ្ដោតការយកចិត្តទុកដាក់យ៉ាងខ្លាំងទៅលើគ្រប់ប្រភេទកីឡាជាតិ ធ្វើយ៉ាងណាឱ្យការប្រកួតកីឡាស៊ីហ្គេមលើកទី៣២ ឆ្នាំ២០២៣ ដែលកម្ពុជាទទួលធ្វើជាម្ចាស់ផ្ទះទទួលបានជោគជ័យ។
ប៉ុន្តែបើក្រឡេកមើលប្រភេទកីឡាប្រដាល់សាកលបច្ចុប្បន្នវិញកំពុងតែជួបបញ្ហាប្រឈមមួយចំនួនដែលត្រូវរកដំណោះស្រាយជាបន្ទាន់ដោយសារតែមានការលេចឮពីគ្រូបង្វឹកមួយចំនួនថា ការហ្វឹកហាត់ប្រដាល់សាកលសព្វថ្ងៃបានត្រឹមតែហាត់ចោលប៉ុណ្ណោះមិនអាចវាស់ស្ទង់កម្រិតបច្ចេកទេសកីឡាករ-កីឡាការិនីបានទេដោយសារពួកគេគ្មានឱកាសឡើងសង្វៀនប្រកួតទាល់តែសោះនារយៈពេលប៉ុន្មានឆ្នាំចុងក្រោយនេះ។
ជាធម្មតាគ្រប់ប្រភេទកីឡាទាំងអស់ទាមទារឱ្យកីឡាករ-កីឡាការិនីប្រឹងប្រែងហ្វឹកហាត់យ៉ាងយកចិត្តទុកដាក់បំផុតដើម្បីបង្កើនសមត្ថភាពបច្ចេកទេសរបស់ខ្លួនគួបផ្សំនឹងការទទួលបានឱកាសឡើងប្រកួតនៅលើសង្វៀនទើបពួកគេអាចរកឃើញចំណុចខ្លាំងនិងចំណុចខ្សោយរបស់ខ្លួនឃើញ ។ ប៉ុន្តែតាមការពិនិត្យជាក់ស្ដែង ការហ្វឹកហាត់របស់បានត្រឹមតែហ្វឹកហាត់ប៉ុណ្ណោះព្រោះក្រោយពីហ្វឹកហាត់រួចពួកគេពុំដែលបានឡើងសង្វៀនប្រកួតដើម្បីវាស់ស្ទង់កម្រិតបច្ចេកទេសរបស់ខ្លួនថាឈានដល់កម្រិតណានោះទេ។
ជាក់ស្ដែងគ្រូបង្វឹកទាំងគ្រូកម្រិតថ្នាលក៏ដូចជាគ្រូឈុតធំផ្នែកប្រដាល់សាកលបានបង្ហាញអារម្មណ៍ស្រដៀងគ្នាថា ពួកគាត់បានយកអស់ពីកម្លាំងកាយចិត្តក្នុងការបង្ហាត់បង្រៀនសិស្សដើម្បីឱ្យពួកគេក្លាយជាកីឡាករខ្លាំងពូកែដែលជាធនធានដ៏ល្អរបស់ជាតិ។ ប៉ុន្តែពួកគាត់បាននិយាយថា ការហ្វឹកហាត់បែបនេះបើសិនជាបានឡើងសង្វៀនប្រកួតញឹកញាប់ទៀតទើបជាការល្អ យ៉ាងហោចណាស់ក៏មួយខែ២ទៅ៣ដងដែរ ។ ការឡើងសង្វៀនប្រកួតគឺជាម៉ែត្រដើម្បីវាស់ស្ទង់កម្រិតបច្ចេកទេសរបស់កីឡាករ ផ្ទុយទៅវិញសព្វថ្ងៃនេះទាំងកីឡាករនិងកីឡាការិនីបានត្រឹមតែហ្វឹកហាត់ចោលតែប៉ុណ្ណោះព្រោះមិនដែលទទួលបានឱកាសឡើងសង្វៀនប្រកួតទាល់តែសោះ។
លោកវេជ្ជបណ្ឌិត ឆឹង យ៉ៅយ៉េន ប្រធានសហព័ន្ធកីឡាប្រដាល់សាកលកម្ពុជា បានមានប្រសាសន៍ពាក់ព័ន្ធនឹងបញ្ហាខាងលើថា សព្វថ្ងៃលោកកំពុងតែយកចិត្តទុកដាក់យ៉ាងខ្លាំងជុំវិញបញ្ហានេះ តាមរយៈការស្វែងរកដៃគូសហការឧបត្ថម្ភដើម្បីជួយដល់វិស័យកីឡាប្រដាល់សាកលឱ្យមានការរីកចម្រើន ។
លោកក៏ធ្លាប់ស្នើទៅដល់បណ្ដាស្ថានីយទូរទស្សន៍មួយចំនួន ឱ្យគេជួយដាក់ប្រដាល់សាកលក្នុងមួយសប្ដាហ៍បានមួយគូឬពីរគូនៅក្នុងកម្មវិធីប្រកួតរបស់ពួកគេដែរ តែសំណើរបស់យើងគ្មាននរណាអើពើទេ ។ មិនអើពើប្រហែលជារាល់កម្មវិធីប្រកួតរបស់គេគឺមានកំណត់ម៉ោងត្រឹមត្រូវសម្រាប់តែប្រដាល់គុនខ្មែរដែលទទួលការពេញនិយមជាងក៏មិនដឹងបានជាពួកគេធីបប្រដាល់សាកលចោលបែបនេះ ។
ជាដំណោះស្រាយក្នុងនាមរូបលោកជាប្រធានសហព័ន្ធ លោកមានគំនិតមួយគឺស្វែងរកការជួយឧបត្ថម្ភពីសប្បុរសជនខាងក្រៅដើម្បីរៀបចំការប្រកួតនៅនឹងកន្លែងហ្វឹកហាត់តែម្ដង យ៉ាងហោចណាស់មួយខែឱ្យបាន២ឬទៅ៣ដងដែរ ដោយមានប្រាក់រង្វាន់តិចតួចសម្រាប់លើកទឹកចិត្តដល់កីឡាករ-កីឡាការិនី ។
លោកថា ប្រដាល់សាកលជាប្រភេទកីឡាដែលពុំសូវមានការពេញនិយមប៉ុន្មានឡើយនៅក្នុងស្រទាប់មហាជនខ្មែរ តែកុំភ្លេចថា វាជាប្រភេទកីឡាអូឡាំពិកដែលមានការទទួលស្គាល់ជាសាកល ។ ដូច្នេះ ក្នុងនាមរូបលោកជាថ្នាក់ដឹកនាំសហព័ន្ធគឺមិនអាចឈរឱបដៃមើលបានឡើយ ទោះបីជាជួបការវិបាកធំប៉ុនណាក៏ដោយក៏លោកនឹងប្រឹងប្រែងឱ្យអស់ពីសមត្ថភាពដែលខ្លួនមានដើម្បីជំរុញឱ្យវិស័យកីឡាប្រដាល់សាកលមានការរីកចម្រើន សម្រាប់ត្រៀមប្រកួតកីឡាស៊ីហ្គេមលើកទី៣២ឆ្នាំ២០២៣ឱ្យទទួលបានជោគជ័យ៕
ចែករំលែកព័តមាននេះ