ខេត្តស្ទឹងត្រែង ៖ នៅរសៀលថ្ងៃទី២៥ ខែកក្កដា ឆ្នាំ២០១៨ នេះកម្លាំងកងទ័ពកំពុងជម្លៀស ប្រជាពលរដ្ឋចេញពីលំនៅដ្ឋានទៅកាន់ទីទួលសុវត្ថិភាពក្នុងស្រុកសៀមប៉ាង ដែលរងផលប៉ះ ពាល់ពីទឹកជំនន់ ដោយសារបាក់ទំនប់វារីអគ្គិសនី សេ ពាន សេណាមណយ ស្ថិតនៅខេត្តអត្តពឺ ប្រទេសឡាវ មានចំងាយប្រមាណ៧០គីឡូម៉ែត្រពីព្រំដែនកម្ពុជា-ឡាវ ។
តាមការបញ្ជាក់ពីក្រសួងធនធានទឹក និងឧតុនិយមនារសៀលថ្ងៃទី២៥ ខែកក្កដានេះទឹកជំនន់ដែលហូរធ្លាក់ពីប្រទេសឡាវបានបន្តជនលិចចូលភូមិឋាន ប្រជាពលរដ្ឋបន្ថែមទៀតដែលស្ថិតនៅតំបន់ព្រំដែនឡាវ ក្នុងស្រុកសៀមប៉ាង ខេត្តស្ទឹងត្រែង គិតត្រឹមម៉ោង១៣និង០០នាទី ទឹក មានកម្ពស់១,៣៨ម៉ែត្រ (កម្រិតប្រកាសអាសន្នឱ្យប្រុងប្រយ័ត្ន១១,៥០ម៉ែត្រ) ទោះបីជាខណៈវេលារសៀលថ្ងៃទី២៥ ខែកក្កដានេះ អាជ្ញាធរនៅតែគ្រប់គ្រងស្ថានការបាននៅឡើយក៏លោក ម៉ុម សារឿន អភិបាលខេត្តស្ទឹងត្រែងកំពុងដឹកនាំក្រុមការងារនៅមូលដ្ឋានផ្ទាល់ក្នុងស្រុកសៀមប៉ាង ខេត្តស្ទឹងត្រែង ដើម្បីតាមដានសភាពការទឹកជំនន់ដែលកំពុងកើនឡើងជាលំដាប់ ។
ដោយលោកអភិបាលខេត្តបានបញ្ជាកងកម្លាំងប្រដាប់អាវុធបន្តជម្លៀសប្រជាពលរដ្ឋដែលកំពុងរងគ្រោះ និងរងដោយសារទឹកជំនន់ ហើយគិតត្រឹមព្រឹកថ្ងៃទី២៥ កក្កដា ជម្លៀសប្រជាពលករដ្ឋចេញពីភូមិបានចំនូន៥៥៧គ្រួសារ ។
អ្នកនាំពាក្យរដ្ឋបាលខេត្តស្ទឹងត្រែងបានឱ្យដឹងថា កម្លាំងដែលជួយសង្គ្រោះប្រជាពលរដ្ឋមានកម្លាំងយោធាកងពលលេខ១២៨ ចំនួន២៤០នាក់ កម្លាំងប្រតិបត្តិការសឹករងខេត្តចំនួន៤០នាក់ កម្លាំងមន្ត្រីបរិស្ថានចំនួន៣០នាក់ កម្លាំងនគរបាល៨៩នាក់ និងសម្ភារជួយសង្គ្រោះជាច្រើនទៀត ។
តាមព័ត៌មានស្ពានបេតុងមួយកន្លែងនៅតាមបន្ទាត់ព្រំដែនខ្មែរ-ឡាវ ឆ្លងកាត់ទន្លេសេកុង ស្ថិតក្នុងឃុំសន្តិភាព ស្រុកសៀមប៉ាង បានរងការស្រុតបាក់តាមត្រចៀកក្បាលស្ពានពីចំហៀងខាងកើត កាលពីយប់មិញថ្ងៃទី២៥ គ្រាដែលទឹកនៅទន្លេសេកុងនៃប្រទេសឡាវបានហូរចូលមកយ៉ាងច្រើនសន្ធឹកសន្ធាប់ ។
ស្ពាននេះទើបតែបញ្ចប់ការកសាងកាលពីដើមខែឧសភាកន្លងទៅថ្មីៗនេះ ដែលកសាងឡើងដោយកម្លាំងកងវិស្វកម្ម ដើម្បីបម្រើឲ្យប្រយោជន៍ជូនប្រជាពលរដ្ឋធ្វើដំណើរឆ្លងកាត់ និងដើម្បីតភ្ជាប់ផ្លូវពីខេត្តមួយទៅខេត្តមួយទៀតផងដែរ ៕
ចែករំលែកព័តមាននេះ