ខេត្តព្រៃវែង ៖ ដោយសារតែបញ្ហាជីវភាព និងការធ្វេសប្រហែសរបស់ឪពុកម្តាយបានធ្វើឲ្យកុមារីអាយុ៧ឆ្នាំម្នាក់បានលង់ទឹកស្លាប់យ៉ាងអាណោចអាធម៌ នៅក្នុងពេលកំពុងដើររើសពងទា នៅក្បែមាត់បឹង ។ ហេតុការណ៍នេះបានកើតឡើង កាលពីវេលាម៉ោង១០និង៣០នាទីព្រឹកថ្ងៃទី២៤ ខែកក្កដានេះ នៅចំណុចបឹងអន្លង់តូច ខាងជើងភូមិតាហ៊េល(ខ) ចម្ងាយ៤០០ម៉ែត្រ ស្ថិតក្នុងឃុំរាធរ ស្រុកព្រះស្តេច ខេត្តព្រៃវែង ។
កុមារីរងគ្រោះមានឈ្មោះ រ៉ាត់ ដានី អាយុ៧ឆ្នាំ មានទីលំនៅក្នុងភូមិកើតហេតុ មានឪពុកឈ្មោះ អុល រ៉ាត់ អាយុ៣១ឆ្នាំ និងម្តាយឈ្មោះ ព្រិន ណន អាយុ៣៧ឆ្នាំ មានមុខរបរជាអ្នកចិញ្ចឹមទាយកពង នៅចំណុចកើតហេតុខាងលើ ។
ប្រភពព័ត៌មានពីក្រុមគ្រួសារកុមារីរងគ្រោះបានឲ្យដឹងថា នៅមុនពេលកើតហេតុ ខណៈពេលដែលឪពុកម្តាយកំពុងរវល់ធ្វើកិច្ចការនៅក្នុងផ្ទះកុមារីរងគ្រោះបានចេញពីផ្ទះទៅដើររើសពងទាម្នាក់ឯងនៅចំណុចមាត់បឹងកន្លែងកើហេតុ ដោយឪពុកម្តាយមិនបានដឹង ហើយពេលដើររើសនោះបានរអិលជើងធ្លាក់ចូលក្នុងបឹងដែលមានទឹកជ្រៅ ហើយគ្មានអ្នកណាបានឃើញ និងជួយទាន់ទើបបណ្តាលឲ្យលង់ស្លាប់តែម្តង ។
ចំណែកឪពុកម្តាយជាងមួយម៉ោងក្រោយមកទើបដឹងថា បាត់កូនហើយក៏នាំគ្នាដើររកលុះរកមកដល់ក្បែមាត់បឹងក៏ឃើញកន្ត្រកពងទា ទើបដឹងថា កូនធ្លាក់ចូលក្នុងបឹង ហើយក៏ចុះរាវរកឃើញស្រង់យកមកជួយធ្វើចលនាសង្គ្រោះនៅលើគោក តែជាអកុសលកុមារីរងគ្រោះបានស្លាប់បាត់បង់ជីវិតបាត់ទៅហើយ ៕
ចែករំលែកព័តមាននេះ