ខេត្តបាត់ដំបង ៖ ពិធីបំពាក់ឋានន្តរសក្តិ និងប្រកាសតែងតាំងផ្លាស់ប្តូរមុខងារដល់នាយទាហានតំបន់ប្រតិបត្តិការសឹករងបាត់ដំបងចំនួន៦៨នាក់ ក្រោមអធិបតីភាពលោកឧត្តមសេនីយ៍ទោ អ៊ុក ឃ្នួច មេបញ្ជាការរងយោធភូមិភាគទី៥ មេបញ្ជាការតំបន់ប្រតិបត្តិការសឹករងបាត់ដំបង នៅវេលាព្រឹកថ្ងៃទី២៥ ខែកក្កដា ឆ្នាំ២០១៨ នៅក្នុងទីបញ្ជាការតំបន់ប្រតិបត្តិការសឹករងបាត់ដំបង ។
បន្ទាប់ពីលោកវរសេនីយ៍ទោ ប៉ុង ហោ នាយការិយាល័យទី១បានអានអនុក្រឹត្យសេចក្តីប្រកាស សេចក្តីសម្រេច ស្តីពីការតម្លើងឋានន្តរសក្កិ និងតែងតាំងផ្លាស់ប្តូរមុខងារដល់នាយទាហានរួចមកលោកឧត្តមសេនីយ៍ទោ អ៊ុក ឃ្នួច បានថ្លែងថា កម្មវិធីនេះបានធ្វើស្របពេលកំពុងមានយុទ្ធនាការឃោសនាបោះឆ្នោតដែលមាន២០គណបក្សបានចូលរួម តែគ្រប់សកម្មភាពការងារអ្វីៗទាំងអស់របស់កងទ័ព ត្រូវតែមានការកែទម្រង់ក្នុងអង្គភាពជាប្រចាំអំពីស្នាដៃរបស់បុគ្គលក្នុងអង្គភាពដែលបានអនុវត្តន៍ទៅតាមលក្ខន្តិកនៃកងយោធពលខេមរភូមិន្ទ ដោយយោងតាមលក្ខណៈសម្បត្តិ ការងារចាំបាច់ពីប្រវត្តិសាស្ត្រក្នុងគោលនយោបាយឈ្នះឈ្នះរបស់សម្តេចតេជោហ៊ុន សែន បានបង្រួបបង្រួមជាតិតាំងពីឆ្នាំ១៩៩៨រួចមកគឺ កងកម្លាំងប្រដាប់អាវុធទាំងអស់មកពីគ្រប់ភាគី ស្ថិតនៅក្រោមការរស់នៅរួមគ្នាក្នុងស្ថានភាពខ្មែរមានតែមួយ ដោយមានសិទ្ធទទួលស្គាល់តួនាទីការងារដដែលសិទ្ធរស់នៅសិទ្ធទទួលខុសត្រូវស្របច្បាប់កន្លងមកទើបកម្ពុជាយើងទទួលបានសុខសន្តិភាព សុវត្ថិភាព និងរួមគ្នាជំរុញវិស័យសេដ្ឋកិច្ច និងការអភិវឌ្ឍរីកចម្រើនបានរហូតដល់សព្វថ្ងៃនេះ ។
លោកឧត្តមសេនីយ៍ទោបានបន្តទៀតថា កន្លងមកកងទ័ពកម្ពុជាយើងធ្លាប់បានទទួលការវាយប្រហារថា ជាកងទ័ពអាយ៉ងរបស់អ្នកនេះអ្នកនោះ តែធាតុពិត គឺយើងបានរួមគ្នាអនុវត្តន៍តាមគោលនយោបាយស្របច្បាប់ដែលមានមតិជាតិ និងអន្តរជាតិបានទទួលស្គាល់ពាសពេញពិភពលោក ផ្តល់ភាពយុត្តិធម៌ប្រកបដោយនិរន្តភាព និងស្ថេរភាពបានយ៉ាងល្អប្រសើរ ។
ចុងក្រោយលោកមេបញ្ជាការបានផ្តាំផ្ញើថា សូមនាយទាហានទាំងអស់ខិតខំយកចិត្តទុកដាក់អនុវត្តន៍ការងារបម្រើប្រទេសជាតិជាបន្តទៅទៀត ដោយផ្តោតលើសក្តានុពលនយោបាយ សតិអារម្មណ៍ តាមបែបទំនើបកម្មដែលកំពុងមានសព្វថ្ងៃនៅក្នុងប្រទេសកម្ពុជាយើងឲ្យកាន់តែទទួលបានសុខសន្តិភាព ស្ថេរភាព និងការអភិវឌ្ឍ រីកចម្រើនជាបន្តទៅមុខទៀត ៕
ចែករំលែកព័តមាននេះ