រាជធានីភ្នំពេញ ៖ រដ្ឋបាលរាជធានីភ្នំពេញ មានការិយាល័យច្រកចេញចូលតែមួយ នៅក្នុងអង្គភាពរបស់ខ្លួន ដើម្បីបម្រើសេវាសាសាធារណៈ ជូនប្រជាពលរដ្ឋឲ្យបានកាន់តែលឿន និងមានតម្លាភាព។ ក្នុងកិច្ចប្រជុំប្រកាសដាក់ឲ្យដំណើរការ អង្គភាពច្រកចេញចូលតែមួយ…
រាជធានីភ្នំពេញ ៖ រដ្ឋបាលរាជធានីភ្នំពេញ មានការិយាល័យច្រកចេញចូលតែមួយ នៅក្នុងអង្គភាពរបស់ខ្លួន ដើម្បីបម្រើសេវាសាសាធារណៈ ជូនប្រជាពលរដ្ឋឲ្យបានកាន់តែលឿន និងមានតម្លាភាព។ ក្នុងកិច្ចប្រជុំប្រកាសដាក់ឲ្យដំណើរការ អង្គភាពច្រកចេញចូលតែមួយ របស់រដ្ឋបាលរាជធានីភ្នំពេញ កាលពីល្ងាចថ្ងែទី២៤ កក្កដា នៅសាលារាជធានី លោក ឃួង ស្រេង អភិបាលរាជធានីភ្នំពេញបានមានប្រសាសន៍ថា៖
ដើម្បីបង្ខិតសេវាសាធារណៈឲ្យកាន់តែខិតជិតនឹងប្រជាជននោះ រដ្ឋបាលរាជធានីភ្នំពេញ បានបង្កើតការិយាល័យច្រកចេញចូលតែមួយ នៅសាលារាជធានីភ្នំពេញ ដើម្បីជំរុញការអនុវត្ត លើការងារបម្រើសេវានេះ ជូនប្រជាពលរដ្ឋឲ្យបានកាន់តែល្អប្រសើរ និងមានតម្លាភាពចៀសវាងមានការថ្នាំងថ្នាក់ពីសំណាក់ប្រជាពលរដ្ឋ ដែលតែងតែកើតមានកន្លងមក ខណៈដែលការិយាល័យច្រកចេញចូលតែមួយ នៅតាមបណ្តាខណ្ឌមួយចំនួនមិនទាន់បម្រើសេវាជូនប្រជាពលរដ្ឋបានល្អប្រសើរនៅឡើយ ដែលបញ្ហានេះ តម្រូវឲ្យមន្ត្រីត្រូវពិនិត្យពីការងាររបស់ខ្លួនឡើងវិញ។
លោកអភិបាលបញ្ជាក់ថា ការផ្តល់សេវាសាធារណៈ លើលិខិតស្នាម ឯកសារផ្សេងៗជូនប្រជាពលរដ្ឋនេះ វាជារឿងសំខាន់ និងចាំបាច់ ដូចជាការផ្តល់សៀវភៅ ស្នាក់នៅ អត្តសញ្ញាណប័ណ្ណ និងការផ្លាស់ប្តូរទីលំនៅដ្ឋានជូនប្រជាពលរដ្ឋជាដើម។ ដូច្នេះ ក្នុងនាមមន្ត្រីដែលអ្នកទទួលការផ្តល់សេវា ជូនប្រជាពលរដ្ឋនេះ ត្រូវអនុវត្តឲ្យបានល្អចៀសវាងការយកកម្រៃសេវាខាងក្រៅពីប្រជាពលរដ្ឋ។
សូមបញ្ជាក់ថា៖ ការិយាល័យច្រកចេញចូលតែមួយ និងការិយាល័យប្រជាពលរដ្ឋ ត្រូវបានបង្កើតឡើង តាមរយៈប្រកាសរបស់ក្រសួងមហាផ្ទៃ នៅក្នុងរចនាសម្ព័ន្ធរបស់សាលាក្រុង ស្រុក ខណ្ឌគោលដៅ ដោយផ្អែកលើសេចក្ដីសម្រេចរបស់រាជរដ្ឋាភិបាល លេខ ១២ សសរ ចុះថ្ងៃទី៣០ ខែមិថុនា ឆ្នាំ២០០៨។ ការបង្កើតការិយាល័យទាំងពីរនេះ មានគោលដៅលើកកម្ពស់ប្រសិទ្ធភាព នៃការផ្ដល់សេវារដ្ឋបាល ជូនប្រជាពលរដ្ឋ នៅថ្នាក់មូលដ្ឋាន ឲ្យបានឆាប់រហ័សតាមនីតិវិធីសាមញ្ញ ប្រកបដោយតម្លាភាព គុណភាព គណនេយ្យភាព និងអភិបាលកិច្ចល្អ៕
ចែករំលែកព័តមាននេះ