អភិបាលខេត្តអំពាវនាវឲ្យចូលរួមទប់ស្កាត់ឲ្យបានគ្រប់គ្នា
- កំពង់ចាម
ខេត្តកំពង់ចាម ៖ ក្នុងពេលអញ្ជើញចូលរួមគោរទង់ជាតិនៅសាលាបឋម និងវិទ្យាល័យសំបួរមាស សង្កាត់សំបួរមាស ក្រុងកំពង់ចាម នាព្រឹកថ្ងៃទី២៤ ខែកក្កដា ឆ្នាំ២០១៨ លោក…
ខេត្តកំពង់ចាម ៖ ក្នុងពេលអញ្ជើញចូលរួមគោរទង់ជាតិនៅសាលាបឋម និងវិទ្យាល័យសំបួរមាស សង្កាត់សំបួរមាស ក្រុងកំពង់ចាម នាព្រឹកថ្ងៃទី២៤ ខែកក្កដា ឆ្នាំ២០១៨ លោក គួច ចំរើន អភិបាលខេត្តកំពង់ចាមបានធ្វើការអំពាវនាវដល់លោកគ្រូ-អ្នកគ្រូនៅគ្រប់សាលារៀនទូទាំងខេត្តត្រូវធ្វើការណែនាំ និងបញ្ជ្រាបអំពីបញ្ហាគ្រឿងញៀន និងបញ្ហាគ្រោះថ្នាក់ចរាចរណ៍គ្រប់ពេលគោរពទង់ជាតិ ដើម្បីឲ្យសិស្សានុសិស្សមានការយល់ដឹង និងចូលរួមទប់ស្កាត់ឲ្យបានគ្រប់គ្នា ។
លោក គួច ចំរើន ថ្លែងទៅកាន់សិស្សានុសិស្សក្នុងពេលគោរពទង់ជាតិទាំងនោះថា លោកគ្រូ-អ្នកគ្រូ គឺជាអ្នកមានគុណរបស់យើងទី២ បន្ទាប់ពីអាណាព្យាបាលដោយបានខិតខំប្រឹងប្រែងបង្ហាត់បង្រៀនផ្តល់នូវដំបូន្មានល្អៗការអប់រំចំណេះវិជ្ជាស្មារតីដោយមិនគិតចង់អ្វីតបស្នងមកវិញពោល គឺធ្វើយ៉ាងណាឲ្យតែសិស្សានុសិស្សទទួលបានចំណេះដឹងខ្ពង់ខ្ពស់អាចប្រកបមុខរបរចិញ្ជឹម ឬយកទៅអនុវត្តន៍ការងារជាប្រចាំថ្ងៃកាន់តែរីកចម្រើន ។
ដូច្នោះក្នុងនាមសិស្សានុសិស្សគួរតែស្តាប់ការអប់រំណែនាំរបស់លោកគ្រូ-អ្នកគ្រូ និងចូលរួមការងាររបស់សង្គមក្នុងពេលធ្វើដំណើរត្រូវតែពាក់មួកសុវត្ថិភាពចេះអធ្យាស្រ័យគ្នាក្នុងពេលបើកបរកុំប្រើប្រាស់គ្រឿងញៀន កុំសេពគ្រឿងស្រវឹងជាដើម ក្នុងពេលកំពុងបើកបរ ដើម្បីបញ្ជៀសនូវគ្រោះថ្នាក់តាមដងផ្លូវ និងលុបបំបាត់អ្នកញៀនសារធាតុញៀនផងដែរ ។
លោក គួច ចំរើន មានប្រសាសន៍ទៀតថា សិស្សានុសិស្សត្រូវរួមគ្នាថែរក្សាជីវិតខ្លួនឯងផង និងប្រជាពលរដ្ឋផងដែរ ហើយមិនត្រូវខឹងនឹងការអនុវត្តន៍នូវច្បាប់ចរាចរណ៍របស់សមត្ថកិច្ចឡើយ គឺដើម្បីកាត់បន្ថយអត្រាស្លាប់ ដោយគ្រោះថ្នាក់ចរាចរណ៍នៅលើដងផ្លូវ ។ លោកបញ្ជាក់ថាយុវជន គឺជាឆ្អឹងខ្នងនៃប្រទេសជាតិ ដើម្បីចូលរួមអភិវឌ្ឍន៍កសាងប្រទេសឲ្យមានភាពរុងរឿងរីកចម្រើនជាបន្តបន្ទាប់ទៀត ដោយត្រូវជៀសឆ្ងាយពីគ្រឿងញៀនត្រូវយល់ដឹងអំពីផលប៉ះពាល់ដោយខ្លួនឯង និងសង្គមជាតិផងដែរ ៕
ចែករំលែកព័តមាននេះ