សារព័ត៌មានបរទេសកាលពីពេលថ្មីៗកន្លងមកផ្សាយថា លោក Walter Carr បុគ្គលិករបស់ក្រុមហ៊ុនដឹកជញ្ជូន «ប៊ែលហប់» (Bellhops) បានសម្រេចចិត្តដើរទៅធ្វើការក្នុងចម្ងាយផ្លូវ៣២គីឡូម៉ែត្រជារៀងរាល់ថ្ងៃ ដោយឆ្លងកាត់តំបន់ជាច្រើននៅក្រុងប៊ើមីងហេម រដ្ឋអាឡាបាម៉ា សហរដ្ឋអាមេរិក ។ ការព្យាយាមរបស់លោកបានទទួលរថយន្តមួយគ្រឿងជាកាដូលើកទឹកចិត្តពីក្រុមហ៊ុន ។
ខណៈពេលលោកWalter Carrកំពុងដើរទៅធ្វើការបានជួបប៉ូលិសម្នាក់ ។ ប៉ូលិសនោះបានជជីកសួរដឹងការណ៍ពិតនៃជីវិតប្រចាំថ្ងៃរបស់លោក ។ ប៉ូលិសរូបនោះបានបង្ហោះរឿងរ៉ាវនៃការព្យាយាមរបស់លោកWalter Carr តាមអុីនធើរណេត ។ ក្រោយមករឿងរ៉ាវនេះបានលេចឮទៅដល់លោកលុក ម៉ាទីន ប្រធានក្រុមហ៊ុន«ប៊ែលហប់» ហើយលោកបានបើករថយន្តទៅជួបលោកWalter Carr ផ្ទាល់ ។
ក្រោយពីបានរៀបរាប់មួយសន្ទុះ លោកម៉ាទីន ក៏បានហុចកូនសោរថយន្ត«Ford Escape» ឆ្នាំ២០១៤ផ្ទាល់ខ្លួនផ្ដល់ជាកាដូឲ្យលោកCarr ។ លោកម៉ាទីនបានបញ្ជាក់ថា «ខ្ញុំមានក្ដីរំភើបចំពោះគេ អ្វីៗគ្រប់យ៉ាងដែលគេប្រតិបត្តិ គឺជាវត្ថុដែលពួកយើងចង់បាន ថែមទាំងមានទំនុកចិត្ត និងអត់ធ្មត់» ។
កាលពីថ្ងៃទី១៦ កក្កដា ២០១៨លោកCarrនិយាយថា «ការងារនៅប៊ែលហប់ គឺជាការងារដែលទទួលខ្ញុំឲ្យធ្វើ ក្រោយពីបាត់បង់ការងារអស់រយៈពេលយ៉ាងយូរ ។ ខ្ញុំចង់បង្ហាញឲ្យពួកគេឃើញថាខ្ញុំបានយកអស់ពីកម្លាំងកាយចិត្ត និងចង់ឲ្យពលរដ្ឋគ្រប់រូបដឹងថា ទោះបីជាមានការប្រកួតប្រជែងបែបណា ក៏អាចពុះពារលើឧបសគ្គនានាបាន » ៕
ចែករំលែកព័តមាននេះ