ខេត្តសៀមរាប ៖ តាមសេចក្តីរាយការណ៍ព័ត៌មានបឋមបានឱ្យដឹងថា រថយន្តចំនួន៣គ្រឿងបានបុកបន្តកន្ទុយគ្នា បណ្តាលឱ្យរងរបួសធ្ងន់និងស្រាលចំនួន៨នាក់ ។ ហេតុការណ៍គ្រោះថ្នាក់ចរាចរណ៍នេះបានកើតឡើងកាលពីវេលាម៉ោង៤និង១៥ នាទីរសៀលថ្ងៃទី២២ ខែកក្កដា ឆ្នាំ២០១៨ ស្ថិតនៅត្រង់ចំណុចលើផ្លូវជាតិលេខ៦ ពីខាងលិចស្នាក់ការប៉េអឹម(៦១០)ចំងាយ១០០ម៉ែត្រ ក្នុងភូមិឈ្នាន់ ឃុំស្រណាល ស្រុកក្រឡាញ់ ខេត្តសៀមរាប។
លោកវរសេនីយ៍ឯក ជី បេង ជន អធិការស្រុកក្រឡាញ់ បានប្រាប់តាមទូរស័ព្ទនៅព្រឹកថ្ងៃទី២៣ ខែកក្កដា ឆ្នាំ២០១៨នេះថា ករណីគ្រោះថ្នាក់ចរាចរណ៍នៅក្នុងស្រុកក្រឡាញ់នោះពិតជាមានមែន គឺ បង្កឡើងដោយរថយន្តមួយគ្រឿងម៉ាកហ៊ីយ៉ាន់ដាយ ពណ៍ស ពាក់ស្លាកលេខ ភ្នំពេញ ៣B-៦៣៤០ បើកបរដោយឈ្មោះ ចាន់ ភេទប្រុស អាយុ២០ឆ្នាំ (មិនស្គាល់ទីលំនៅ) មានអ្នករួមដំណើរចំនួន៣នាក់ ហើយរថយន្តហ៊ីយ៉ាន់ដាយនេះបានបែកកង់ខាងឆ្វេងរ៉េចង្កូតទៅឆ្វេងក៏បុករថយន្តម៉ាកហាយឡែនឌ័រ ពណ៍ទឹកប្រាក់ ពាក់ស្លាកលេខ បន្ទាយមានជយ័ ២A-៦៥៨៦ បើកបរដោយឈ្មោះ បិន នាគ ភេទប្រុស អាយុ៣២ឆ្នាំ មានអ្នករួមដំណើរ(ប្រពន្ធនិងកូន)ចំនួន៣នាក់ផងដែរ ។ ទាំង៤នាក់រស់នៅភូមិ២ ឃុំកំពង់ស្វាយ ស្រុកសេរីសោភណ័ ខេត្តបន្ទាយមានជយ័ បើកបរស្របទិសគ្នា ពីលិចទៅកើត។
លោកបានបន្តទៀតថា បន្ទាប់មក រថយន្តម៉ាកហ៊ីយ៉ាន់ដាយខាងលើបានដាច់កង់មុខរមៀលទៅបុករថយន្តមួយគ្រឿងទៀត ម៉ាកកាមរីបាឡែន ពណ៍ទឹកប្រាក់ ពាក់ស្លាកលេខ ភ្នំពេញ ២T-៩៧៦១ បើកបរដោយឈ្មោះ ជួ ផល្លី ភេទប្រុស អាយុ៣៧ឆ្នាំ រស់នៅភូមិចំការចេក ឃុំ អូរស្មាច់ ស្រុកសំរោង ខេត្តឧត្តមានជ័យ ដែលបើកបរបញ្ច្រាសទិសគ្នាក្នុងទិសដៅពីកើតទៅលិច ។ ក្នុងហេតុការណ៍គ្រោះថ្នាក់ចរាចរណ៍ខាងលើបណ្តាលឱ្យរបួសធ្ងន់៤នាក់ និងស្រាល៤នាក់ ហើយជនរងគ្រោះត្រូវបានបញ្ជូនទៅសង្គ្រោះនៅមន្ទីពេទ្យបង្អែកស្រុកពួក។ ចំណែករថយន្តរងការខូចខាតទាំង៣គ្រឿង ។
តាមការសន្និដ្ឋានបឋមបានឱ្យដឹងថា មូលហេតុបណ្តាលឱ្យមានគ្រោះថ្នាក់ចរាចរណ៍នេះ គឺមកពីរថយន្តមួយគ្រឿងម៉ាកហ៊ីយ៉ាន់ដាយ បើកបរក្នុងល្បឿនលឿន។
បច្ចុប្បន្ន រថយន្តបង្ក និងរថយន្តរងគ្រោះទាំង២គ្រឿងត្រូវបានកម្លាំងជំនាញនៃអធិការស្រុកពួកយកមករក្សាទុកនៅអធិការដ្ឋាន ដើម្បីចាត់ការតាមនីតិវិធីច្បាប់ ។ ព័ត៌មានលម្អិតនឹងមានផ្សាយនៅលើទំព័រកាសែតកោះសន្តិភាព ៕
ចែករំលែកព័តមាននេះ