ខេត្តព្រះសីហនុ ៖ តាមសេចក្តីរាយការណ៍ព័ត៌មានបានឱ្យដឹងថា មានគ្រោះថ្នាក់ចរាចរណ៍កើតឡើង២ករណីផ្សេងគ្នា ក្នុងនោះរួមមាន ៖ ករណីទី១-បុរសម្នាក់បានស្លាប់បាត់បង់ជីវិតនៅនឹងកន្លែង ពេលជិះម៉ូតូឆ្លងពីកើតទៅលិច ហើយត្រូវរថយន្តបុកពេញទំហឹងតែម្តង ។…
ខេត្តព្រះសីហនុ ៖ តាមសេចក្តីរាយការណ៍ព័ត៌មានបានឱ្យដឹងថា មានគ្រោះថ្នាក់ចរាចរណ៍កើតឡើង២ករណីផ្សេងគ្នា ក្នុងនោះរួមមាន ៖ ករណីទី១-បុរសម្នាក់បានស្លាប់បាត់បង់ជីវិតនៅនឹងកន្លែង ពេលជិះម៉ូតូឆ្លងពីកើតទៅលិច ហើយត្រូវរថយន្តបុកពេញទំហឹងតែម្តង ។ ហេតុការណ៍នេះបានកើតឡើង នៅវេលាម៉ោង៨និង៤០នាទីយប់ថ្ងៃទី១៩ ខែកក្កដាឆ្នាំ២០១៨ លើបណ្តោយផ្លូវជាតិលេខ៤ ស្ថិតនៅក្នុងភូមិសំរុងលើ ឃុំសំរុង ស្រុកព្រៃនប់ ខេត្តព្រះសីហនុ ។
ជនរងគ្រោះដែលស្លាប់ឈ្មោះតែម រ៉ាវី ភេទប្រុស អាយុ៥៥ឆ្នាំ មុខរបរកសិករ មានទីលំនៅចំណុចកើត
ហេតុ រីឯម៉ូតូមួយគ្រឿងរបស់ជនរងគ្រោះម៉ាកវ៉េវ ពណ៌ខ្មៅ គ្មានស្លាកលេខ ។ ចំណែករថយន្តបង្កមិនស្គាល់ម៉ាក (ក្រោយពេលបុកម៉ូតូធ្លាក់កាងជាប់ស្លាកលេខ ភ្នំពេញ ២N-៨៦៦៨) រីឯអ្នកបើកបរមិនស្គាល់អត្តសញ្ញាណ បានរត់គេចខ្លួនបាត់ស្រមោល ។
ប្រភពពីកន្លែងកើតហេតុបានអោយដឹងថា គ្រោះថ្នាក់នេះបានបង្កឡើងដោយរថយន្តមួយគ្រឿងមិនស្គាល់ម៉ាក (ធ្លាក់កាងជាប់ស្លាកលេខ ភ្នំពេញ ២N-៨៦៦៨ ) លុះមកដល់ចំណុចកើតហេតុខាងលើបានបុកម៉ូតូមួយគ្រឿងម៉ាកវ៉េវ ពណ៌ខ្មៅ គ្មានស្លាកលេខ ទិសដៅពីកើតទៅលិច(ឆ្លងថ្នល់)បណ្តាលឲ្យអ្នកបើកបរម៉ូតូស្លាប់នៅនឹងកន្លែង ។ ចំណែករថយន្តបានធ្លាក់កាងខាងមុខជាប់ស្លាកលេខរួចបន្តល្បឿនទៅមុខទាំងគ្មានកាងរថយន្តខាងមុខគេចបាត់តែម្តង ។ បច្ចុប្បន្នសពត្រូវបានសាច់ញាតិយកទៅធ្វើបុណ្យតាមប្រពៃណី ។
ករណីទី២-គ្រោះថ្នាក់ចរាចរណ៍មួយទៀតបានកើតឡើងដោយសារអ្នកបើកបររថយន្តមួយគ្រឿងបើកបរក្នុងល្បឿនលឿនបណ្តាលឱ្យក្រឡាប់ដោយខ្លួនឯង ហើយអ្នកបើកបរបានរងរបួសស្រាល ។ ហេតុការណ៍នេះបានកើតឡើងកាលពីវេលាម៉ោង១២និង៣០នាទី ថ្ងៃត្រង់ថ្ងៃទី២០ ខែកក្កដា ឆ្នាំ២០១៨ នៅចន្លោះគីឡូម៉ែត្រលេខ១៦៥ និង១៦៦ ស្ថិតក្នុងភូមិតានៃ ឃុំតានៃ ស្រុកព្រៃនប់ ខេត្តព្រះសីហនុ ។
ប្រភពព័ត៌មានបានឱ្យដឹងថា រថយន្តដែលបង្កឡើងដោយខ្លួនឯងម៉ាកស្តារិច ពណ៌ស ពាក់ស្លាកលេខ ២AQ-២៦៤១ បើកបរដោយឈ្មោះ ចិន ធៀនហ្វា ភេទប្រុស អាយុ៤៩ឆ្នាំ ស្នាក់នៅភ្នំពេញ បើកបរក្នុងទិសដៅពីភ្នំពេញទៅខេត្តព្រះសីហនុ លុះមកដល់ចំណុចកើតហេតុខាងលើរថយន្តមានល្បឿនលឿន ហើយក៏បានក្រឡាប់ទៅខាងស្តាំដៃ បណ្តាលឱ្យបាក់បង្គោលចំណាំងប្លាតអស់ចំនួន៣ដើម ចំណែកអ្នកបើកបររថយន្តរងរបួសស្រាល ។
ក្រោយពេលកើតហេតុ រថយន្តបង្កត្រូវបានប្រគល់ទៅអោយនគរបាលអធិការស្រុកព្រៃនប់ដើម្បីដោះស្រាយតាមនីតិវិធី៕
ចែករំលែកព័តមាននេះ