រាជធានីភ្នំពេញ ៖ ដោយសារមើលឃើញពីការលំបាករបស់អ្នកសិល្បៈដែលបានកើតឡើងជាបន្តបន្ទាប់នោះ អ្នកសិល្បៈមួយចំនួនបានបញ្ចេញទស្សនៈ និងបទពិសោធន៍ផ្ទាល់ខ្លួនក្នុងការត្រៀមទុកជាមុនសម្រាប់លំនឹងជីវភាពនៅពេលដែលខ្លួនបាត់បង់អាជីព ។
តារាទាំងនោះមានជីវភាពរស់នៅល្អប្រសើរ ហើយហាក់មិនពឹងផ្អែកទាំងស្រុងទៅអាជីពសិល្បៈនេះឡើយ ពោលពួកគេក៏មានភាពជោគជ័យលើអាជីពផ្សេងផងដែរ ។
អ្នកនាង ខាត់ សុឃីម បានលើកឡើងកាលពីពេល ថ្មីៗកន្លងមកថា ក្នុងនាមជាអ្នកសិល្បៈមួយរូបនាងតែងតែគិតច្រើនចំពោះជីវភាពគ្រួសារនាពេលអនាគត នៅពេលដែលនាងមិនអាចសម្តែងបាន ។ គ្រួសារនាងបានសម្រេចទិញសេវាធានារ៉ាប់រង ព្រោះនៅថ្ងៃមុខមិនដឹងមានហានិភ័យណាមួយកើតឡើងទេ ហេតុនេះប្រសិនបើមានធានារ៉ាប់រង វាអាចជួយបាន ប្រៀបបាននឹងមានអាវភ្លៀងពាក់ដែរ ។
បើតាមអ្នកនាងខាត់ សុឃីម តាំងពីតូចមកគឺនាងតែងមានបំណងសន្សំលុយដែលរកបានទោះតិចក្តីច្រើនក្តីដើម្បីទិញផ្ទះ ។ ចំណែកការហូបចុកគឺមានកម្រិត ក្នុងនោះនាងមានការទុកដាក់ត្រឹមត្រូវទៅលើសម្ភារប្រើប្រាស់ ផ្សេងៗដែលនាងបានប្រើប្រាស់រួច ដើម្បីការពារនៅពេលណាដែលមានការខ្វះខាតគឺនាងអាចយករបស់នោះមកប្រើប្រាស់ជាថ្មីវិញបាន ។ ចំពោះការប្រើប្រាស់របស់របរនេះគឺច្បាស់ណាស់អ្នកណាក៏ចង់ប្រើរបស់ល្អដែរ តែគួរតែគិតនៅពេលដែលខ្វះខាត តើរបស់នោះអាចជួយយើងបានដោយរបៀបណា ។
អ្នកនាងខាត់ សុឃីម ថាលុយដែលបានមកនោះគឺនាងទិញមាសទុក ហើយមួយផ្នែកទៀតសន្សំទុកទិញដីទោះបានធំ ឬតូចក្តី ។ សំខាន់ឲ្យតែមានក្នុងខ្លួនសម្រាប់ពេលដែលខ្លួនទាល់ ។
អ្នកនាងខាត់ សុឃីម និយាយថា «ខ្ញុំសំណូមពរចំពោះអ្នកសិល្បៈមួយចំនួន កុំរំពឹងតែទៅលើការអំពាវនាវរកសប្បុរសជនជួយពេក ព្រោះជាអ្នកសិល្បៈមួយរូបធ្លាប់តែមានភាពហ៊ឺហា ឡូយឆាយ ហើយបើយើងជួបរឿងអ៊ីចឹង វានាំឲ្យមជ្ឈដ្ឋានមួយចំនួនវាយតម្លៃដល់សិល្បៈយើង ធ្វើឲ្យតម្លៃសិល្បៈចេះតែធ្លាក់ចុះ»។
តារាកំប្លែងលោកជួង ជី ហៅកុយ បានលើកឡើងថា បើទោះបីជាពេលនេះក្រុមរបស់លោកមិនសូវបានឡើងសម្តែងតាមស្ថានីយទូរទស្សន៍ដូចមុនក៏ពិតមែន ប៉ុន្តែសម្រាប់នាយ និងកូនក្រុមមួយចំនួនហាក់មិនមានហានិភ័យណាមួយគួរឲ្យកត់សម្គាល់ឡើយ ដោយសារតែសុទ្ធតែមានមុខរបរផ្សេង ក្រៅពីអាជីពសិល្បៈនេះ ។ នាយក៏មានវង់ភ្លេងសម័យផ្ទាល់ខ្លួន ព្រមជាមួយនឹងការងារសិល្បៈផ្សេងទៀតដូចជាកាត់សក់ការ និងល្ខោនបាសាក់ជាដើម ក្រៅពីអាជីពកំប្លែង ។
ក្នុងនាមជាអ្នកសិល្បៈជើងចាស់មួយរូបនាយ កុយ បានស្នើអ្នកសិល្បៈទាំងអស់ថា«នៅពេលដែលកំពុងល្បី និងរកលុយបានត្រូវសន្សំ បង្កើតជាមុខរបរមួយផ្សេងពីសិល្បៈនេះ ដើម្បីទុកទៅថ្ងៃអនាគត ពេលដែលយើងអស់លទ្ធភាពសម្តែង»។
ចំណែកពិធីការរិនីល្បីឈ្មោះអ្នកនាងគង់ សុជាតិ និងអ្នកនាង យុគចិន្តា ក៏ធ្លាប់បានអះអាងស្រដៀងគ្នាដែរថា អ្នកសិល្បៈនៅពេលដែលកំពុងតែរកលុយបាននោះគួរតែសន្សំលុយទុក និងបង្កើតមុខរបរ ផ្សេងៗ ដើម្បីឲ្យនឹងធឹង នៅពេលដែលមានបញ្ហាវាអាចរក្សាលំបាកជីវភាពរស់នៅបានមួយចំណែកដែរ ។
ទាំងអ្នកនាងយុគ ចិន្តា និងអ្នកនាងគង់ សុជាតិ មិនត្រឹមតែជោគជ័យលើផ្នែកសិល្បៈមួយមុខទេ អ្នកទាំងពីរក៏មានចំណូលច្រើនផងដែរពីរបររកស៊ីខាងក្រៅ ៕
ចែករំលែកព័តមាននេះ