ខេត្តព្រះសីហនុ ៖ កម្មករសំណង់ជាជនជាតិចិនម្នាក់ ត្រូវបានមិត្តភក្តិ និងអ្នកមុជទឹកសមុទ្រអះអាងថា ត្រូវទឹករលកអូស បណ្តាលឱ្យបាត់ខ្លួននាល្ងាចថ្ងៃទី១៩ កក្កដា វេលាម៉ោង១៨ និង៣០នាទី នៅចំណុចកន្ទុយនាគក្រុម១៤ ភូមិ៤ សង្កាត់៤ ក្រុងព្រះសីហនុ ដោយរលកសមុទ្រអូសយកទៅ ខណៈពេលចុះងូតទឹកលេងជាមួយមិត្តភក្តិ៤នាក់ផ្សេងទៀត ។ តាមការព្យាករណ៍ក្នុងសមុទ្រ មានខ្យល់បោកបក់ខ្លាំង និងមានទឹករលកខ្ពស់ៗ ដូច្នេះ អ្នកទៅលេងសមុទ្រ គប្បីមានការប្រុងប្រយ័ត្ន ។
តាមការឆ្លើយបំភ្លឺរបស់មិត្តភក្តិ ជនរងគ្រោះនៅក្នុងហេតុការណ៍បានរៀបរាប់ថា នៅវេលាម៉ោងខាងលើពួកគេមួយក្រុមមានគ្នា៥នាក់ បានចុះមកលេងសមុទ្រនៅឆ្នេរកន្ទុយនាគ ។ មួយសន្ទុះក្រោយមកមានមិត្តភក្តិម្នាក់បានរសាត់ទៅឆ្ងាយមានចំងាយប្រហែល៣ម៉ែត្រពីក្រុម ហើយត្រូវបានទឹករលកអូសចូលទៅកន្លែងជ្រៅ បាត់ខ្លួនទៅ។ ឃើញដូចនោះ ក៏នាំគ្នារត់រកពោងទៅជួយ តែមិនដល់មួយនាទីផងមិត្តភក្តិរូបនោះក៏បាត់ខ្លួន ។
ជនរងគ្រោះឈ្មោះ LIU QIANG ភេទប្រុស ឆ្នាំកំណើត ១ ខែមេសា ឆ្នាំ១៩៩១ កាន់លិខិតឆ្លងដែនលេខ E៦៨៤៧៨១០៣ មានសុពលភាពថ្ងៃទី២២ ខែកុម្ភៈ ឆ្នាំ២០២៦ មុខរបរជាកម្មករសំណង់ ។ ក្រោយមកកំលាំងនគរបាលប្រចាំការតំបន់នោះបានទំនាក់ទំនងជាមួយក្រុមម៉ូតូទឹកចំនួន២គ្រឿង មានគ្នា៤នាក់ បានរុករកទីតាំងដែលជនរងគ្រោះបានលង់ទឹកនោះ តែពុំបានរកឃើញឡើយ កណ្តាលផ្ទៃទឹកដែលកំពុងមានរលកបោកបក់រត់ប្រដេញគ្នាមករកឆ្នេរបែកផ្កាត្រែង ។
នៅតាមបណ្តោយឆ្នេរនាដើមឆ្នាំនេះ គឺទើបតែមានឧប្បត្តិហេតុបាត់ខ្លួនជនជាតិចិនម្នាក់តែប៉ុណ្ណោះ ព្រោះកន្លងមកក្រុមសមត្ថកិច្ចទៅជួយសង្គ្រោះបានទាន់ពេល ជាច្រើនលើកក្នុងករណីលង់ទឹកសមុទ្រនេះ ។ កាលពីឆ្នាំមុនមានមនុស្សបាត់បង់ជីវិត ដោយលង់ទឹកសមុទ្រមិនក្រោម១០នាក់ទេ ។ ដូចនេះបងប្អូនប្រជាពលរដ្ឋនិងភ្ញៀវទេសចរណ៍ ដែលមកកម្សាន្ត គួរតែមានការប្រុងប្រយ័ត្នចុះលេងទឹកសមុទ្រម្តងៗ នៅពេលមានរលកធំៗនោះ ។
ប្រភពព័ត៌មានបន្ថែមបានឱ្យដឹងថា នៅព្រឹកថ្ងៃទី២០ កក្កដា សពជនជាតិម្នាក់នេះ បានអណ្តែតនៅតំបន់ដដែល ត្រូវបានសមត្ថកិច្ចស្រង់ប្រគល់ឱ្យសាច់ញាតិទទួលយកទៅធ្វើបុណ្យតាមប្រពៃណីហើយ ៕
ចែករំលែកព័តមាននេះ