ខេត្តកណ្ដាល ៖ កម្លាំងនគរបាលផ្នែកប្រឆាំងគ្រឿងញៀន បានធ្វើការចាប់ខ្លួនជនសង្ស័យដែលជាមុខសញ្ញាជួញដូរគ្រឿងញៀនម្នាក់ដកហូតគ្រឿងញៀន ព្រមទាំងអាវុធកែច្នៃផងដែរ ការចាប់ខ្លួននេះធ្វើឡើងកាលពីម៉ោង២និង៣០នាទីរសៀល ថ្ងៃទី១៩ ខែកក្កដា ឆ្នាំ២០១៨ នៅផ្លូវលំ…
ខេត្តកណ្ដាល ៖ កម្លាំងនគរបាលផ្នែកប្រឆាំងគ្រឿងញៀន បានធ្វើការចាប់ខ្លួនជនសង្ស័យដែលជាមុខសញ្ញាជួញដូរគ្រឿងញៀនម្នាក់ដកហូតគ្រឿងញៀន ព្រមទាំងអាវុធកែច្នៃផងដែរ ការចាប់ខ្លួននេះធ្វើឡើងកាលពីម៉ោង២និង៣០នាទីរសៀល ថ្ងៃទី១៩ ខែកក្កដា ឆ្នាំ២០១៨ នៅផ្លូវលំ ស្ថិតក្នុងភូមិត្រពាំងភូមិ ឃុពើក ស្រុកអង្គស្នួល ។
ជនសង្ស័យខាងលើដែលឃាត់ខ្លួនបានឈ្មោះ វ៉ន វ៉ាត់ធី ភេទប្រុស អាយុ២៤ឆ្នាំ មុខរបរកម្មកររោងចក្រ ស្នាក់នៅភូមិត្រពាំងភូមិកើតហេតុខាងលើ។ ខណៈនោះនគរបាលដកហូតបានវត្ថុតាងមួយចំនួនរួមមានថ្នាំញៀនចំនួន០៨កញ្ចប់ គឺកញ្ចប់មធ្យម០២កញ្ចប់ និងកញ្ចប់តូច០៦កញ្ចប់, ទូរស័ព្ទដៃ១គ្រឿង, អាវុធច្នៃ០១ដើមបាញ់គ្រាប់កង់, ឧបករណ៍ប្រើប្រាស់ថ្នាំញៀន និងថង់វេចខ្ចប់មួយចំនួន។
នគរបាលបានឲ្យដឹងថា នៅម៉ោងកើតហេតុ កម្លាំងទទួលព័ត៌មានពីមហាជនថា មានជនសង្ស័យកំពុងជួញដូរថ្នាំញៀន ហើយភ្លាមៗនោះកម្លាំងនគរបាលប្រឆាំងគ្រឿងញៀន រួមជាមួយកម្លាំងនគរបាលព្រហ្មទណ្ឌស្រុកចុះទៅសហការជាមួយកម្លាំងនគរបាលប៉ុស្តិ៍ពើក ធ្វើការឃាត់ខ្លួនបាន។ បន្ទាប់មកធ្វើការឆែកត្រួតពិនិត្យឃើញមានថ្នាំញៀនចំនួន០៨កញ្ចប់នៅជាប់ខ្លួនជនសង្ស័យខាងលើ ។
ក្រោយមកកម្លាំងក៏នាំទៅសាកសួរ ហើយជនសង្ស័យឆ្លើយថា ថ្នាំញៀននេះខ្លួនបានទិញពីបុរសមិនស្គាល់ឈ្មោះម្នាក់នៅក្រុងច្បារមន ខេត្តកំពង់ស្ពឺ ដោយទិញម្តងៗចំនួន២០០.០០០រៀល ដើម្បីយកមកលក់បន្ត ។ ហើយក្រោយមកកម្លាំងបានឆែកឆេបន្ទប់ដែលជនសង្ស័យស្នាក់នៅរកឃើញឧបករណ៍ប្រើប្រាស់ថ្នាំញៀន ថង់វេចខ្ចប់ថ្នាំញៀនមួយចំនួន និងអាវុធច្នៃបាញ់គ្រាប់កង់១ដើម រួចបានកសាងសំណុំរឿងចាត់ការតាមនីតិវិធីច្បាប់ហើយ៕
ចែករំលែកព័តមាននេះ