បើកឃើញចង់ដាច់ផ្ងារ…ប្រុងលោតឆត្រទៅយួន
- កំពត
ខេត្តកំពត ៖ ឈើប្រណិតខុសច្បាប់ប្រមាណ៣ទូកុងតឺន័រដែលមានផ្ទុកឈើ៥៣ដុំធំៗបម្រុងឆ្លងដែនទៅប្រទេសវៀតណាមត្រូវបានកម្លាំងការិយាល័យនាវាចរគយសហកាជាមួយកម្លាំងអាវុធហត្ថលើផ្ទៃប្រទេសបង្ក្រាបបាននៅចម្ងាយ៣គីឡូម៉ែត្រពីផែព្រែកត្នោតព្រំប្រទល់ខេត្តកំពត និងខេត្តព្រះសីហនុ ដែលឃាត់បានទាន់ពេលវេលាកាលពីម៉ោង១០យប់ ថ្ងៃទី១៧ ខែកក្កដា ឆ្នាំ២០១៨ ។ ប្រភពព័ត៌មានមន្ត្រីគយដែលបង្ក្រាបករណីរត់ពន្ធឈើខុសច្បាប់នេះបានបញ្ជាក់ប្រាប់បណ្តាញព័ត៌មាន…
ការបង្ក្រាបនេះដោយមានការបញ្ជាផ្ទាល់ពីលោក កើត សុទ្ធារ៉ា ប្រធាននាយកដ្ឋានបង្ការ និងបង្ក្រាបបទល្មើស នៃអគ្គនាយកដ្ឋានគយ ទើបលោក ឯម ណារិទ្ធ ប្រធានការិយាល័យនាវាចរគយដឹកនាំកម្លាំងសហការជាមួយកងរាជអាវុធហត្ថផ្ទៃប្រទេស ចុះត្រង់ចំណុចភូមិសាស្ត្រខាងលើក៏ប្រទះឃើញទូកយន្តឈើមួយគ្រឿង កំពុងលិចនៅក្នុងផ្ទៃទឹក ដែលមានជម្រៅប្រហែលបីម៉ែត្រ ទើបកម្លាំងសមត្ថកិច្ចចុះឆែកឆេរ ប៉ុន្ដែពុំឃើញមាននរណាម្នាក់នៅលើទូកនោះឡើយ គឺឃើញតែទូកុងតឺទ័រចំនួនបីគត់បន្សល់ទុកក្នុងទូកនោះក្រុមជំនាញក៏បានលើកកុងតឺន័រនោះមកបើកមើលឃើញសុទ្ធតែឈើប្រណិត ។
លោក ជួន សារ៉ា នាយខណ្ឌរដ្ឋបាលព្រៃឈើខេត្តបានឲ្យដឹងថា ការចុះបង្ក្រាបឈើខុសច្បាប់របស់សមត្ថកិច្ចគយចល័តនៅក្នុងសមុទ្រស្ថិតក្នុងឃុំព្រែកត្នោត ស្រុកទឹកឈូ ខេត្តកំពត កាលពីយប់ថ្ងៃទី១៧ ខែកក្កដា ឆ្នាំ២០១៨ លោកពុំបានដឹងនោះទេ ក្រោយពីមានប្រភពព័ត៌មានទើបលោកស្រាវជ្រាវដឹងថា មានករណីបង្ក្រាបឈើខុសច្បាប់ ។
លោក ជួន សារ៉ា បានឲ្យដឹងទៀតថា ឈើខុសច្បាប់ដឹកតាមទូកចំនួនបីកុងតឺន័រនេះមិនមែនចុះនៅតាមផែម្តុំនេះទេ ឈើនេះអាចមកពីកន្លែងផ្សេងហើយរត់ឆ្លងកាត់តាមសមុទ្រខាងក្រៅ ប៉ុន្តែចៃដន្យផ្ទៃមេឃមានព្យុះ និងភ្លៀងខ្លាំងនៅកណ្តាលសមុទ្រអាចធ្វើឲ្យអ្នកបើកបររកផ្លូវចេញទៅក្រៅមិនរួចក៏ត្រូវរត់មករកក្បែរខាងហើយត្រូវលេចទូក ។
បច្ចុប្បន្នទូកុងតឺន័រផ្ទុកឈើទាំងនោះត្រូវបានកម្លាំងសមត្ថកិច្ចស្ទួចយកមករក្សាទុកនៅកន្លែងឈរជើងបណ្តោះអាសន្នរបស់ការិយាល័យនាវាចរគយ និងធ្វើកំណត់ហេតុបញ្ចូនមកអគ្គនាយកដ្ឋានគយ និងរដ្ឋាករកម្ពុជា ដើម្បីរង់ចាំការសម្រេចពីលោកអគ្គនាយក នៃអគ្គនាយកដ្ឋានគយ និងរដ្ឋាករកម្ពុជា ៕
ចែករំលែកព័តមាននេះ