រាជធានីភ្នំពេញ ៖ នៅក្នុងឆមាសទី១ឆ្នាំនេះ ស្ថាប័នរដ្ឋ, គ្រឹះស្ថានធនាគារ និងមីក្រូហិរញ្ញវត្ថុ បានបើកគណនីនៅក្នុងធនាគារជាតិនៃកម្ពុជា (NBC) មានចំនួនជាង១.០០០គណនី បើធៀបនឹងគ្រាដូចគ្នាកាលពីឆ្នាំ២០១៧ កើនឡើងជាង៦០គណនី ។
កំណើននេះ ដោយសារនៅតាមស្ថាប័នរដ្ឋ គឺតម្រូវឲ្យអនុវត្តគម្រោង និងទទួលថវិកាផ្ទាល់ពីអគ្គនាយកដ្ឋានរតនាគារជាតិ គួបផ្សំនឹងកំណើនគណនីរបស់គ្រឹះស្ថានធនាគារនិងហិរញ្ញវត្ថុ ជាពិសេស គ្រឹះស្ថានផ្តល់សេវាទូទាត់ប្រាក់ និងគ្រឹះស្ថានឥណទានជនបទ ដែលត្រូវបើកគណនី ដើម្បីតម្កល់ប្រាក់តាមខ្លឹមសារនៃប្រកាសថ្មីៗរបស់ធនាគារជាតិនៃកម្ពុជា ។ នេះបើតាមរបាយការណ៍ប្រចាំឆមាសទី១ របស់ធនាគារជាតិនៃកម្ពុជា ។របាយការណ៍បានបង្ហាញថា ៖« ក្នុងឆមាសទី១ កន្លងទៅនេះ ធនាគារជាតិនៃកម្ពុជាបាននិងកំពុងគ្រប់គ្រងគណនីសរុប១.៤៩៨ ក្នុងនោះស្ថាប័នរដ្ឋ៨២៥, គ្រឹះស្ថានធនាគារនិងហិរញ្ញវត្ថុ ៦៤០ និងគណនីផ្សេងៗមានចំនួន៣៣ បើធៀបនឹងឆមាសទី១ឆ្នាំ២០១៧ កើនឡើង៦៣គណនី» ។
តាមអគ្គនាយករងបច្ចេកទេសធនាគារជាតិនៃកម្ពុជាបានឱ្យដឹងថា ចំនួនគណនីដែលធនាគារជាតិនៃកម្ពុជាបាននិងកំពុងគ្រប់គ្រង ក៏ដូចជាកាន់គណនីជូនរាជរដ្ឋាភិបាល និងគ្រឹះស្ថានធនាគារនិងហិរញ្ញវត្ថុនេះ គឺបង្កលក្ខណៈងាយស្រួលធ្វើប្រតិបត្តិការជាមួយធនាគារកណ្តាល ឬទិញ-លក់ រូបិយប័ណ្ណ ឬផាត់ទាត់ជាមួយធនាគារផ្សេងទៀតបាន ។
លោក ឃូ វុឍ្ឍី អគ្គនាយករងបច្ចេកទេសធនាគារជាតិនៃកម្ពុជា បានថ្លែងកាលពីថ្ងៃទី១៨ កក្កដា ថា ៖« គ្រឹះស្ថានធនាគារ និងហិរញ្ញវត្ថុ ដែលមានគណនីនៅធនាគារជាតិនៃកម្ពុជា គឺមានភាពងាយស្រួលក្នុងការធ្វើប្រតិបត្តិការជាមួយធនាគារកណ្តាល ដូចជា ការទិញ-លក់លុយ, រូបិយប័ណ្ណ ឬធ្វើប្រតិបត្តិការផ្ទេរ ផាត់ទាត់ជាមួយធនាគារផ្សេងទៀត » ។ លោកបន្ដថា ៖« ការដែលមានគណនីជាមួយធនាគារជាតិ អាចផ្ទេរលុយនៅក្នុងនិងក្រៅប្រទេសបាន ។ ចំពោះភ្នាក់ងារប្តូរប្រាក់ក៏អីចឹងដែរ អ្នកដែលមានអាជ្ញាប័ណ្ណនៅធនាគារជាតិ ពេលគាត់ចង់ទិញ ឬលក់លុយ ពួកគាត់មានភាពងាយស្រួល » ។
បើតាមនាយកប្រតិបត្តិសមាគមមីក្រូហិរញ្ញវត្ថុកម្ពុជា គ្រឹះស្ថានដែលបានបើកគណនីនៅធនាគារជាតិនៃកម្ពុជា គឺពិតជាងាយស្រួលនៅពេលធ្វើប្រតិបត្តិការ ហើយគ្រឹះស្ថានត្រូវមានការដាក់ប្រាក់តម្កល់មួយចំនួនទៅតាមប្រភេទអាជីវកម្ម ដើម្បីបង្ហាញថា គ្រឹះស្ថានមានលទ្ធភាពគ្រប់គ្រាន់ ។ លោក យុន សុវណ្ណា នាយកប្រតិបត្តិនៃសមាគមមីក្រូហិរញ្ញវត្ថុកម្ពុជា មានប្រសាសន៍ថា ៖ « ធនាគារ និងហិរញ្ញវត្ថុ ប្រើប្រាស់សេវារបស់ធនាគារជាតិ ដើម្បីធ្វើប្រតិបត្តិការអន្តរធនាគារ ហើយគាត់ក៏ត្រូវដាក់ប្រាក់តម្កល់មួយចំនួនទៅតាមប្រភេទអាជីវកម្ម ក្នុងនាមគាត់ជាអ្នកផ្តល់សេវាហិរញ្ញវត្ថុ ហើយការដាក់ប្រាក់តម្កល់នេះ ដើម្បីបង្ហាញថា គ្រឹះស្ថានមានលទ្ធភាពគ្រប់គ្រាន់ » ។
បើតាមអគ្គនាយករងបច្ចេកទេសធនាគារជាតិនៃកម្ពុជា គណនីដែលធនាគារជាតិនៃកម្ពុជាបាននិងកំពុងគ្រប់គ្រងនេះ សម្រាប់ប្រជាពលរដ្ឋទូទៅ ឬក្រុមហ៊ុន សហគ្រាស ពុំអាចបើកគណនីនៅធនាគារជាតិនៃកម្ពុជាទេ គឺមានតែក្រសួងស្ថាប័នរដ្ឋ, គ្រឹះស្ថានធនាគារ និងហិរញ្ញវត្ថុ ឬស្ថាប័នអន្តរជាតិធំៗ ដូចជា ធនាគារកណ្តាលមួយចំនួននៅក្នុងតំបន់តែប៉ុណ្ណោះ ៕
ចែករំលែកព័តមាននេះ