អ្នកដឹកនាំនៃបណ្ដាប្រទេសបង្ហាញចក្ខុវិស័យប្រឆាំងនឹងឯកតោភាគីនិយម
ទីក្រុងប៉េកាំង ៖ នៅក្នុងកម្មវិធី Vision China ដែលរៀបចំដោយសារព័ត៌មាន China Daily កាលពីថ្ងៃទី១៧ កក្កដា…
ទីក្រុងប៉េកាំង ៖ នៅក្នុងកម្មវិធី Vision China ដែលរៀបចំដោយសារព័ត៌មាន China Daily កាលពីថ្ងៃទី១៧ កក្កដា…
ទីក្រុងប៉េកាំង ៖ នៅក្នុងកម្មវិធី Vision China ដែលរៀបចំដោយសារព័ត៌មាន China Daily កាលពីថ្ងៃទី១៧ កក្កដា បណ្ដាអ្នកដឹកនាំរបស់ប្រទេស BRICS រួមមាន ប្រេស៊ីល, រុស្ស៊ី, ឥណ្ឌា, ចិន និងអាហ្វ្រិកខាងត្បូង បានថ្លែងពីចក្ខុវិស័យរបស់ខ្លួនចង់ទប់ទល់នឹងឧបសគ្គដែលកំពុងបង្កឡើងដោយគោលនយោបាយឯកតោភាគីនិយម និងការពារនិយម ដើម្បីជំរុញដល់ការរីកលូតលាស់សេដ្ឋកិច្ច ។ នេះបើយោងតាមការចេញផ្សាយរបស់គេហទំព័រ chinadaily.com.cn ។
លោក Wang Xiaohui អនុប្រធានផ្នែកផ្សព្វផ្សាយសាធារណៈនៃគណៈកម្មាធិការគណបក្សកុម្មុយនីស្ដចិន និងជាប្រធានរដ្ឋបាលភាពយន្តរដ្ឋ បានថ្លែងក្នុងវេទិកានេះថា BRICS បានក្លាយជាគំរូល្អនៃកិច្ចសហប្រតិបត្តិការសម្រាប់សេដ្ឋកិច្ចថ្មីៗ និងប្រទេសកំពុងអភិវឌ្ឍន៍។ លោកបានបន្តថា វាជាប្រភពនៃឥទ្ធិពលវិជ្ជមានសម្រាប់សហគមន៍អន្តរជាតិ ។
លោក Wang នឹងដឹកនាំក្រុមប្រតិភូមួយទៅកាន់អាហ្វ្រិកខាងត្បូង ដើម្បីចូលរួមកម្មវិធីជាច្រើនមុនកិច្ចប្រជុំ BRICS ។
លោក Zhao Zhongxiu អនុប្រធានក្រុមប្រឹក្សា China Council for BRICS Think Tank Cooperation និងជាប្រធានសាកលវិទ្យាល័យ University of International Business and Economics នៅប៉េកាំង បាននិយាយថា សំណើរបស់លោកប្រធានាធិបតី Xi ក្នុងការចូលរួមកសាងសហគមន៍ដែលមានអនាគតរួម បានផ្តល់ជាចក្ខុវិស័យមួយសម្រាប់ការកសាងពិភពលោក ដែលមានសន្តិភាព សន្តិសុខ ការលូតលាស់ ការបើកទូលាយ និងភាពរួម ព្រមទាំងបរិស្ថានដែលស្អាតថែមទៀត ។ លោកបន្តថា ប្រទេសចិនប្តេជ្ញាចូលរួមបន្ថែមក្នុងការអភិវឌ្ឍហេដ្ឋារចនាសម្ព័ន្ធអាហ្វ្រិកនិងជំរុញដល់ការលូតលាស់រួម។
ជាមួយគ្នានេះ លោក Martyn Davies នាយកគ្រប់គ្រងផ្នែកទីផ្សារថ្មីៗ និងទីផ្សារអាហ្វ្រិកក្នុងក្រុមហ៊ុន Deloitte គិតថា ទំនាក់ទំនងរវាងចិន និងអាហ្វ្រិក ដើរតួយ៉ាងសំខាន់សម្រាប់បណ្ដាប្រទេស BRICS ។ លោកធ្លាប់គិតថា ប្រទេស BRICS អាចនឹងជួបការលំបាកក្នុងការសហការគ្នា ព្រោះតែពួកគេស្ថិតក្នុងទ្វីបខុសៗគ្នា ប៉ុន្តែការទប់ទល់នឹងគោលនយោបាយឯកតោភាគីនិយម និងការពារនិយមរបស់សហរដ្ឋអាមេរិក នឹងក្លាយជាគោលជំហរសំខាន់ជាងគេសម្រាប់ពួកគេក្នុងការសម្របសម្រួល ។
ក្រៅពីនេះ លោក Andrew Moody អ្នកយកព័ត៌មានថ្នាក់ខ្ពស់របស់ China Daily នៅបរទេស បានឲ្យដឹងថា ទំនាក់ទំនងរវាងចិននិងអាហ្វ្រិក គឺជាផ្នែកមួយនៃរូបភាពធំ ហើយលោកជឿថា ទស្សនៈរបស់លោកប្រធានាធិបតីXi ទៅលើការធ្វើសកលភាវូបនីយកម្ម មានលើសពីការធ្វើពាណិជ្ជកម្ម និងសេដ្ឋកិច្ចទៅទៀត ដោយវាបង្កើតជាមូលដ្ឋានសម្រាប់ទ្រទ្រង់ទំនាក់ទំនងរវាងចិន និងអាហ្វ្រិកខាងត្បូង រួមជាមួយនឹងកិច្ចសហប្រតិបត្តិការរវាងប្រទេស BRICS ផងដែរ ។
ដោយលើកឡើងពីឧទាហរណ៍នៃវត្តមានក្រុមហ៊ុនចិនក្នុងអាហ្វ្រិក លោក Moody សរុបសេចក្តីថា ៖« ទំនាក់ទំនងរវាងចិន និងអាហ្វ្រិក គឺជាកិច្ចសហប្រតិបត្តិការបែបឈ្នះ-ឈ្នះ ហើយចិនបានចូលរួមយ៉ាងខ្លាំងទៅការអភិវឌ្ឍអាហ្វ្រិក» ៕
ចែករំលែកព័តមាននេះ