ខេត្តរតនគិរី ៖ ក្មេងស្រីសិស្សសាលាម្នាក់ បានត្រូវជនមិនស្គាល់មុខចាប់រំលោភសេពសន្ថវ: ខណៈនាងចេញពីសាលារៀនដើរទៅផ្ទះម្នាក់ឯងតាមផ្លូវស្ងាត់ កាលពីវេលាម៉ោង១១ព្រឹកថ្ងៃទី១៤ ខែកក្កដាកន្លងទៅ នៅចំណុចចម្ការស្វាយចន្ទីមួយកន្លែង ស្ថិតក្នុងភូមិឃុំតាអង ស្រុកកូនមុំ ។
លោកវរសេនីយ៍ត្រី ជា សារិត អធិការរងនគរបាលស្រុកកូនមុំបានឲ្យដឹងថា ក្មេងស្រីរងគ្រោះបានប្រាប់សមត្ថកិច្ចថា ខណៈនាងចេញពីសាលាដើរទៅផ្ទះម្នាក់ឯងដល់ពាក់កណ្តាលផ្លូវ ក៏មានម៉ូតូ១គ្រឿងម៉ាកវ៉េវឆ្លាម ពណ៌ក្រហម មានដឹកកញ្ជេ១ ឆ្នាំង១ ពីក្រោយ ជិះហួសទៅហើយស្រាប់តែបកត្រឡប់មកវិញ រួចឈប់ម៉ូតូនៅក្បែរហើយចុះទៅទាញដៃនាងចូលក្នុងព្រៃចម្ការចន្ទី ដោយវាយនាងចំនួន១០ដៃ បណ្តាលឱ្យនាងសន្លប់រួចធ្វើសកម្មភាពរំលោភ ។ តាមភិនភាគដែលនាងចំណាំបានខ្លះ គឺជននោះមានភិនភាគខ្មៅខ្ពស់ និងធាត់ ហើយក្រោយពីរំលោភរួចជននោះក៏គេចខ្លួនបាត់ទៅ ។
លោកវរសេនីយ៍ត្រី ជា សារិត បន្តថា ក្មេងស្រីរងគ្រោះមានអាយុ១៣ឆ្នាំ ជាជនជាតិគ្រឹង មានទីលំនៅក្នុងឃុំខាងលើ ។ នគរបាលស្រុកកូនមុំ បាននាំក្មេងស្រីរងគ្រោះទៅធ្វើកោសល្យវិច័យនៅមន្ទីរពេទ្យបង្អែកខេត្តតែមកទល់នឹងពេលនេះមិនទាន់ដឹងពីលទ្ធផលនៅឡើយទេ គឺរង់ចាំមន្ទីរពេទ្យរាយការណ៍ជូនសមត្ថកិច្ចស្រុកកូនមុំតាមក្រោយ និងបានទៅពិនិត្យកន្លែងកើតហេតុផងដែរ ៕
ចែករំលែកព័តមាននេះ