ខេត្តកំពង់ស្ពឺ ៖ ប្រជាពលរដ្ឋចំនួន២៣០គ្រួសារ ស្មើនឹង៦៨៩នាក់ (ស្រី៣១៦នាក់) ត្រូវបានជម្លៀសចេញទៅរកទីទួលមានសុវត្ថិភាព ដែលកត្តាគ្រោះធម្មជាតិមួយនេះក៏បានធ្វើឲ្យប៉ះពាល់ និងខូចខាតផ្លូវក្រាលកៅស៊ូពីរជាន់ បណ្តោយ៣៥០ម៉ែត្រ , ខូចខាតផ្លូវលំក្រួសក្រហមប្រវែង៣៧២០ម៉ែត្រ លិចលង់ស្រូវ១១៥៧ហិកតា , ដំណាំស្វាយ២៣២ហិកតា , បាក់ទំនប់០២កន្លែង ស្មើនឹង១៥ម៉ែត្រ និងបាត់គោ០៧ក្បាល នេះតាមរបាយការណ៍របស់អភិបាលស្រុកភ្នំស្រួច ។
ដោយឡែកកម្រិតទឹកនៅស្ថានីយវាស់ទឹកពាមឃ្លៃ ឡើងដល់កម្រិតខ្ពស់៧.៣០ម៉ែត្រ ដែលជាកម្រិតអាចនឹងបង្កឲ្យមានទឹកជំនន់នៅតាមដងស្ទឹងព្រែកត្នោត និងតំបន់ខាងក្រោមមួយចំនួនទៀត ។ បន្ថែមពីនេះរដ្ឋបាលខេត្តកំពង់ស្ពឺក៏បានអំពាវនាវឲ្យប្រជាពលរដ្ឋមានការប្រុងប្រយ័ត្នខ្ពស់ជាប្រចាំ ដើម្បីជៀសវាងគ្រោះថ្នាក់ដែលអាចកើតឡើងជាយថាហេតុ និងសូមអាជ្ញាធរមូលដ្ឋានគ្រប់លំដាប់ថ្នាក់យកចិត្តទុកដាក់ខ្ពស់ ចំពោះជនងាយរងគ្រោះនិងកុមារតូចៗ និងពិនិត្យតាមដានសភាពការណ៍កម្រិតទឹកនៅតាមភូមិសាស្ដ្រខាងលើឲ្យបានខ្ជាប់ខ្ជួន ។
ចំពោះស្ថានភាពទឹកជំនន់លិចនៅផ្នែកខាងលើទំនប់រលាំងជ្រៃ នៅព្រឹកថ្ងៃទី១៩ កក្កដា ២០១៨នេះកំពង់ស្ពឺ ដោយសារស្ថានភាពទឹកមានសន្ទុះកាន់តែខ្លាំង ជំនាញបានបើកទ្វាទឹកចំនួន៥ទ្វា ។
សូមបញ្ជាក់ថា គ្រោះទឹកជំនន់ទឹកភ្លៀងនេះមិនមានប៉ះពាល់ដល់អាយុជីវិតមនុស្សឡើយ កម្ពស់ទឹកឡើងជិតស្មើមាត់ស្ទឹងព្រែកត្នោត ចំណុចជិតសាលាខេត្ត ហើយក្នុងនោះ បើតាមមហាជនរស់នៅជិតៗនោះបានលើកឡើងថា បើសិនទឹកមិនស្រកទេ ហើយភូមិនៅជិតៗនោះក៏អាចប្រឈមនឹងការលិចដែរ ៕
ចែករំលែកព័តមាននេះ