រាជធានីភ្នំពេញ៖ លោកខៃ ប្រសិដ្ឋ ជាតារាមួយដួងមានប្រជាប្រិយភាពស្ថិតក្នុងដួងចិត្តទស្សនិកជនក្នុងអំឡុងពេលលោកនៅចាប់អាជីព។ លោកខៃ ប្រសិដ្ឋ ត្រូវអ្នកដឹកនាំរឿងនិយមផ្គូផ្គងឲ្យសម្តែងជាមួយតួឯកស្រី ល្បីៗជាច្រើននាក់ ខណៈពេលបច្ចុប្បន្នតារាស្រីមួយចំនួនកំពុងបន្តអាជីពសម្តែងរបស់ខ្លួន និងមួយចំនួនរស់នៅបរទេសដូចលោកខៃ…
រាជធានីភ្នំពេញ៖ លោកខៃ ប្រសិដ្ឋ ជាតារាមួយដួងមានប្រជាប្រិយភាពស្ថិតក្នុងដួងចិត្តទស្សនិកជនក្នុងអំឡុងពេលលោកនៅចាប់អាជីព។ លោកខៃ ប្រសិដ្ឋ ត្រូវអ្នកដឹកនាំរឿងនិយមផ្គូផ្គងឲ្យសម្តែងជាមួយតួឯកស្រី ល្បីៗជាច្រើននាក់ ខណៈពេលបច្ចុប្បន្នតារាស្រីមួយចំនួនកំពុងបន្តអាជីពសម្តែងរបស់ខ្លួន និងមួយចំនួនរស់នៅបរទេសដូចលោកខៃ ប្រសិដ្ឋ ដែរ ។
បើតាមការឲ្យដឹងពីតារាសម្តែងជើងចាស់ និងជាផលិតករលោកមុត ថារី កាលពីពេល ថ្មីៗកន្លងមកឲ្យដឹងថាសម័យកាលនោះមានច្រើនផលិតកម្ម ហើយតួដែលសម្តែងជាមួយខៃ ប្រសិដ្ធ ក៏មានច្រើនដែរក្នុងនោះមានអ្នកនាង អ៊ុំ សុណ្ណនី ,ចាន់ តារាទី ,ពិសិដ្ធ ពិលីកា ,សុខ ស្រីមុំ ,គង្គ មូល្លីកា ,ប៊ុនឈឿន សូរីយ៉ាន ,ដួង តារាសី ,ហុក លក្ខិណា និងពេញ សុខកញ្ញា ជាដើម ។ ទោះជាយ៉ាងក៏ដោយលោកមុត ថារី មិនបានដឹងច្បាស់ពីវត្តមានរបស់តារាសម្តែងស្រីទាំងនោះកំពុងតែរស់នៅទីណាឡើយ ដោយលោកគ្រាន់តែដឹងថា ក្នុងចំណោមតួទាំងអស់នោះមានអ្នកខ្លះបានទទួលមរណភាព អ្នកខ្លះកំពុងបន្តវត្តមានសម្តែង និងមួយចំនួនទៀតកំពុងរស់នៅក្រៅប្រទេស ។
ជាការកត់សម្គាល់ចំពោះតារាសម្តែងដែលល្បីខាងបង្ហូរទឹកភ្នែកក្នុងរឿង«ស្រីណាមិនយំ» អ្នកនាង ចាន់ តារាទី កំពុងបន្តអាជីពសម្តែងរហូតមកដល់បច្ចុប្បន្នជាតួម្តាយ ។ ដោយឡែកអតីតតារាសម្តែង និងជាភរិយារបស់លោក ខៃ ប្រសិដ្ឋ អ្នកស្រីពិសិដ្ឋ ពិលីកា បានទទួលមរណភាពទៅហើយ ។
សម្រាប់អ្នកនាងសុខ ស្រីមុំ ដែលជាតួអង្គស្រីមួយរូបក៏ត្រូវបានគេចាត់ទុកថា ការសម្តែងរួមគ្នារវាងនាងជាមួយលោកខៃ ប្រសិដ្ឋ គឺមានភាពសក្តិសម ។ អ្នកនាងសុខ ស្រីមុំ បានចាកចេញពីពិភពសិល្បៈ បន្ទាប់ពីបានរៀបអាពាហ៍ពិពាហ៍ និងបានសាងជីវភាពគ្រួសារនៅអាមេរិក ។
អ្នកនាងសុខ ស្រីមុំ បានរៀបអាពាហ៍ពិពាហ៍ជាមួយលោកខៃ ចាន់តារា ហៅអ៊ួក នៅឆ្នាំ១៩៩៣ ប៉ុន្ដែអ្នកទាំងពីរបានលែងលះគ្នាក្រោយពីបានទៅរស់នៅសហរដ្ឋអាមេរិកប៉ុន្មានឆ្នាំដោយមានកូនប្រុសម្នាក់ ។
នៅឆ្នាំ២០០០ អ្នកនាងសុខ ស្រីមុំ បានជួបជាមួយស្វាមីក្រោយដែលជាជនបរទេសមានអាជីពជាផលិតករភាពយន្ដនៅសហរដ្ឋអាមេរិក។ សព្វថ្ងៃនេះអ្នកនាងសុខ ស្រមុំ កំពុងរស់នៅរដ្ឋកាលីហ្វ៊័រនីញ៉ា សហរដ្ឋអាមេរិក មានអាយុជិត៥០ឆ្នាំហើយ ។
ចំពោះអ្នកនាងអម្ពរ ទេវី វិញគឺជាតារាមួយរូបស្ថិតនៅក្នុងដួងចិត្តទស្សនិកជន ក្នុងពេលដែលនាងបានបង្ហាញខ្លួនសម្តែងយ៉ាងសក្តិសមមិនថាជាមួយដៃគូសម្តែងលោកសមតារា លោកទេព រិនដារ៉ូ ឬលោកខៃ ប្រសិដ្ឋ ឡើយ។ បើទោះបីជាពេលនេះអ្នកនាងទេវី បានសាងជីវភាពគ្រួសារថ្មីនៅលើទឹកដីអាមេរិកក៏ដោយ ប៉ុន្តែតារារូបនេះនៅតែនឹករលឹកដល់វិស័យសិល្បៈដដែល ដោយក្នុងនោះនាងទើបតែចូលរួមសម្តែងជាថ្មីក្នុងខ្សែភាពយន្តរឿង«ទឹកចិត្តម្តាយសម័យថ្មី»របស់អ្នកដឹកនាំរឿងពាន់ ភួងបុប្ឆា ។
ដោយឡែកអ្នកនាងអ៊ុំ សុវណ្ណនី ជាតារាស្រីដំបូងគេបង្អស់ដែលបានធ្វើឲ្យវិស័យភាពយន្តខ្មែររស់រានមានជីវិតឡើងវិញ បន្ទាប់ពីរបបប្រល័យពូជសាសន៍ខ្មែរក្រហម ហើយក៏ជាតារាស្រីដំបូងគេបង្អស់ក្នុងទសវតទី៨០ ដែលបានសម្ដែងរួមជាមួយតារាបរទេសនៅក្នុងរឿង «នរក៩ជាន់» ជាខ្សែភាពយន្តដែលធ្វើឲ្យគាត់មានឈ្មោះល្បីល្បាញតាំងពីពេលនោះមក ។
បច្ចុប្បន្នអ្នកនាងអ៊ុំ សុវណ្ណនី រស់នៅក្នុងទីក្រុង ឡងបិច កាលីហ្វ៊័រនីញ៉ា សហរដ្ឋអាមេរិក និងតែងតែបង្ហាញខ្លួនជាញឹកញាប់តាមរយៈការរាំច្រៀង ជាមួយអតីតតារាសម្តែងរួមជំនាន់គឺលោកយស បូវណ្ណៈ ។
ចំពោះតួឯកក្នុងរឿង«ស្នេហាមួយ»អ្នកនាង ហុក លក្ខិណា ក៏ជាអតីតតារាសម្ដែងដ៏ល្បីមួយរូបផងដែរក្នុងអំឡុងទសវត្សរ៍៨០-៩០ ខណៈដែលបច្ចុប្បន្នអ្នកនាងបានបោះបង់ចោលអាជីពសម្តែងនេះហើយ និងកំពុងរស់ក្នុងប្រទេសអូស្ដ្រាលី ។ អ្នកនាងហុក លក្ខិណា ក៏ជាដៃគូសម្តែងរបស់លោកខៃ ប្រសិដ្ឋ ដែរ ។
ដោយឡែកកូនស្រីបង្កើតរបស់កវីនិពន្ធគង្គ ប៊ុនឈឿន គឺអ្នកនាង ប៊ុនឈឿន សូរីដា ជាតារាសម្តែងដែលមានភាពស្រគត់ស្រគុំមួយរូប ហើយបានចាប់ឈោងភាពល្បីក្នុងវិស័យខ្សែភាពយន្តនាសម័យនោះតាមរយៈរឿង«នាងរំសាយសក់»។ បច្ចុប្បន្នអ្នកនាងសូរីដា កំពុងកសាងជីវិតថ្មីនៅក្នុងប្រទេសន័រវ៉េសន៍ ដោយមានអាជីពជាអ្នកថែទាំមនុស្សចាស់នៅក្នុងមជ្ឈមណ្ឌលមួយ ។
ចំពោះអតីតតារាស្រីផ្សេងទៀតជំនាន់លោកខៃ ប្រសិដ្ឋ គេមិនបានដឹងទេថា តើរស់នៅទីណា និងចាប់អាជីពអ្វីឡើយដោយស្ងប់ស្ងាត់បាត់ដំណឹង ៕
ចែករំលែកព័តមាននេះ