បច្ចុប្បន្ន នៅតែមានការយល់ខុសអំពីការបើករថយន្ត មិនថាអ្នកបើករថយន្តមកយូរហើយក្តី ឬអ្នកដែលទើបតែហាត់បើកបរថ្មីៗក្តី ។ យើងសាកល្បងមកមើលថា ការយល់ខុសទាំងនេះមានអ្វីខ្លះ ? ១-រថយន្តធំជាង មានសុវត្ថិភាពជាង…
បច្ចុប្បន្ន នៅតែមានការយល់ខុសអំពីការបើករថយន្ត មិនថាអ្នកបើករថយន្តមកយូរហើយក្តី ឬអ្នកដែលទើបតែហាត់បើកបរថ្មីៗក្តី ។ យើងសាកល្បងមកមើលថា ការយល់ខុសទាំងនេះមានអ្វីខ្លះ ?
១-រថយន្តធំជាង មានសុវត្ថិភាពជាង ៖ មនុស្សភាគច្រើនគិតថា រថយន្តប្រភេទ SUV និង PPV មានសុវត្ថិភាពជាងរថយន្តតូចៗ ព្រោះក្នុងករណីកើតគ្រោះថ្នាក់រវាងរថយន្ត SUV ជាមួយរថយន្តតូច គឺរថយន្តតូចតែងខូចខាតច្រើនជាង ក្រៅពីបុកគ្នាខ្លាំងហើយ គឺរថយន្តតូចនៅក្រោមរថយន្តធំ ។
ប៉ុន្តែវាគ្រាន់តែជាការពិតមួយផ្នែកប៉ុណ្ណោះ ក្នុងករណីផ្សេងទៀត រថយន្ត SUV និង PPV មានទំនាញខ្ពស់ជាងរថយន្តតូចៗ ហើយបើអ្នកបើករថយន្តដោយល្បឿនលឿនខ្លាំង និងត្រូវបើកគេចពីវត្ថុទើសទែងទាន់ហន់នោះ រថយន្តធំនឹងងាយកើតគ្រោះថ្នាក់ជាងរថយន្តតូច។ ដូច្នេះ បើប្រាប់ថា រថយន្ត SUV និង PPV មានសុវត្ថិភាពជាងរថយន្តតូច គឺមិនត្រឹមត្រូវ១០០%ទេ ។
២-រថយន្តស៊េរីចាស់ៗធន់មាំជាងរថយន្តថ្មី ៖ មនុស្សជាច្រើនចូលចិត្តនិយាយជានិច្ចថា ដែកនៃម៉ូឌែលរថយន្តថ្មីៗស៊ូជាមួយដែករថយន្តសម័យមុន មិនបានទេ ។ វាធ្វើឲ្យអ្នកបើករថយន្តថ្មីមានឱកាសរងរបួសក្នុងហេតុការណ៍គ្រោះថ្នាក់ចរាចរណ៍ ឬស្លាប់ច្រើនជាង ។
ចំណុចនេះមិនត្រូវទាំងអស់នោះទេ ថ្វីបើរថយន្តជំនាន់ថ្មីៗត្រូវបានដំឡើងដោយដែក ដែលមានទម្ងន់ស្រាលជាងរថយន្តជំនាន់មុនមែន ប៉ុន្តែការរចនាម៉ូដមកជាមួយគម្រោងដែលអាចទប់ទល់នឹងការប៉ះទង្គិចខ្លាំងបានល្អជាងរថយន្តចាស់ៗ ដែលធ្វើឲ្យរថយន្តថ្មីមានសុវត្ថិភាពខ្លាំងឡើងនៅពេលកើតគ្រោះថ្នាក់។ ហេតុនេះ ការប្រើដែកក្រាស់ ឬស្តើង ស្ទើរតែមិនជួយអ្វីឡើយ ។
៣-ចង្កឹះលេខធម្មតា បុរាណជាងលេខអូតូ ៖ មនុស្សជាច្រើនគិតថា ចង្កឹះលេខរថយន្តធម្មតា គឺជាអ្វីដែលហួសសម័យ និងមិនគួរមានសម្រាប់រថយន្តយុគសម័យថ្មីឡើយ ប៉ុន្តែការពិត ចង្កឹះលេខធម្មតា នៅតែជាការចូលចិត្តខ្លាំងរបស់អ្នកបើកបរជនជាតិអឺរ៉ុប ។
ក្រៅពីជួយរុញកម្លាំងពីគ្រឿងម៉ាស៊ីនទៅដល់កង់បានល្អជាងនោះ វាអាចសន្សំសំចៃប្រេងបានច្រើនជាង ថែមទាំងមានភាពងាយស្រួលក្នុងការថែទាំ, អាយុកាលប្រើប្រាស់របស់ចង្កឹះលេខធម្មតា ស្ទើរតែស្មើនឹងអាយុកាលប្រើប្រាស់រថយន្តផងដែរ ប៉ុន្តែបើត្រូវប្រឈមជាមួយការស្ទះចរាចរណ៍ខ្លាំងប្រចាំថ្ងៃ មនុស្សភាគច្រើនត្រូវប្រើលេខអូតូច្រើនជាង ។
៤-ទិញរថយន្តមានកម្លាំងខ្លាំង គឺគ្មានប្រយោជន៍សម្រាប់ការបើកបរក្នុងក្រុង ៖ មនុស្សច្រើនណាស់គិតថា រថយន្តដែលមានកម្លាំងម៉ាស៊ីនខ្លាំងៗ គួរតែបើកនៅលើផ្លូវមានស្ថានភាពលំបាក ដូចជាឡើងភ្នំជាដើម ដូច្នេះ វានឹងគ្មានប្រយោជន៍អ្វីដែលត្រូវបើកបរនៅក្នុងក្រុងទេ ប៉ុន្តែការពិត វាមិនមែនបែបនេះទាំងស្រុងទេ ។
៥-មានប័ណ្ណបើកបរបង្ហាញថា ចេះបើក រថយន្តហើយ ៖ គេនៅតែគិតខុសថា បើពួកគេប្រឡងយកប័ណ្ណបើកបរជាប់ហើយ បង្ហាញថា ពួកគេចេះបើករថយន្តហើយ ប៉ុន្តែការពិត ប័ណ្ណបើកបរអាចមិនមែនជាគ្រឿងវាស់វែងសមត្ថភាពរហូតនោះទេ ព្រោះមានមនុស្សមិនតិចទេ ដែលរៀនបើកបររថយន្ត គ្រាន់តែឲ្យបានប្រឡងជាប់ប៉ុណ្ណោះ ។ ប៉ុន្តែការបើកនៅលើផ្លូវជាក់ស្តែង មានហេតុការណ៍ជាច្រើនដែលបង្កឲ្យកើតគ្រោះថ្នាក់គ្រប់ពេលវេលា ។
ដូច្នេះ ទោះបីជាបានប័ណ្ណបើកបរមកគ្រប់គ្រងក្តី ប៉ុន្តែអ្នកត្រូវចាំបាច់ត្រូវរៀនសូត្រពីការបើកបរនៅលើផ្លូវជាច្រើនទៀត ដើម្បីឲ្យសមជាមួយស្ថានការណ៍ផ្សេងៗបានល្អបំផុត ។ យ៉ាងម៉េចហើយ តើអ្នកមានជំនឿខុសៗដូចដែលបានរៀបរាប់មកខាងដើមនេះដែរឬទេ?
ចែករំលែកព័តមាននេះ