រាជធានីភ្នំពេញ ៖ មន្ត្រីជាន់ខ្ពស់នៃអគ្គនាយកដ្ឋានគយ និងរដ្ឋាករកម្ពុជា បានលើកឡើងថា នៅក្នុងឆមាសទី១ឆ្នាំ២០១៨នេះ អគ្គនាយកដ្ឋានគយ និងរដ្ឋាករកម្ពុជា ប្រមូលចំណូលពន្ធបានប្រមាណ៤ពាន់ប៊ីលានរៀល ឬប្រមាណ១.១៧២លានដុល្លារអាមេរិក ក្នុងនោះ ចំណូលពន្ធពីយានយន្ដមានកំណើន៤០,៥% ដែលកំពុងដើរតួនាទីសំខាន់ក្នុងការរួមចំណែកប្រមាណ៤២%នៃចំណូលសរុប ។
ថ្លែងនៅក្នុងកិច្ចប្រជុំបូកសរុបលទ្ធផលការងារគយ និងរដ្ឋាករប្រចាំឆមាសទី១ កាលពីថ្ងៃទី១៧ កក្កដា លោកបណ្ឌិត គុណ ញឹម ប្រតិភូរាជរដ្ឋាភិបាល ទទួលបន្ទុកជាអគ្គនាយកនៃអគ្គនាយកដ្ឋានគយ និងរដ្ឋាករកម្ពុជា បានថ្លែងថា ក្នុងឆមាសទី១ ឆ្នាំ២០១៨នេះ ចំណូលសរុបដែលប្រមូលដោយអគ្គនាយកដ្ឋានគយ និងរដ្ឋាករកម្ពុជា មានប្រមាណ៤.៧៣៦ប៊ីលានរៀល ឬប្រមាណជា១.១៧២លានដុល្លារអាមេរិក ។ តួលេខចំណូលនេះត្រូវជាប្រមាណ ៥៦,៧% នៃផែនការដែលកំណត់ដោយច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ២០១៨។
បើធៀបនឹងឆមាសទី១ ឆ្នាំ២០១៧ ចំណូលនេះកើនឡើងប្រមាណ២៧,៨% ដែលក្នុងនោះ ចំណូលពីមុខទំនិញយានយន្តមានកំណើន ៤០,៥%, មុខទំនិញប្រេង និងថាមពល កើនឡើង១០,៥%, គ្រឿងសំណង់កើនឡើង ២៦,៦% និងមុខទំនិញចម្រុះផ្សេងទៀតមានកំណើន២៧% ។
លោកបន្ដថា ៖« កំណើននេះ គឺដោយសារកត្តាមួយចំនួន ក្នុងនោះកត្តាសំខាន់ គឺស្ថិរភាពនយោបាយក្នុងប្រទេស ដែលជាមូលដ្ឋានគ្រឹះគាំទ្រ និងធានាប្រក្រតីភាពនៃសកម្មភាពពាណិជ្ជកម្ម វិនិយោគ ផលិតកម្ម សេវាកម្ម និងការប្រើប្រាស់ជាទូទៅ ដែលប្រការទាំងនេះ បានជំរុញឲ្យមានកំណើនការនាំចូលមុខទំនិញផ្សេងៗ ឆ្លើយតបនឹងតម្រូវការ និងការផ្គត់ផ្គង់ក្នុងស្រុក » ។
អគ្គនាយកក្រុមហ៊ុន RMA លោក ងន សាំង បានមានប្រសាសន៍ថា ៖« ជាទូទៅ ការលក់រថយន្តនៅក្នុងឆមាសទី១ឆ្នាំ២០១៨នេះ ឃើញថា មានការកើនឡើងគ្រប់គ្នា ។ សម្រាប់ខាងខ្ញុំ ក៏កើនឡើងប្រហាក់ប្រហែល២០% បើប្រៀបធៀបរយៈពេលដូចគ្នាឆ្នាំ២០១៧»។
លោកបន្តថា ការលក់រថយន្តកើនឡើងប្រចាំឆមាសទី១នេះបង្ហាញថា ពលរដ្ឋកម្ពុជាមានតម្រូវការប្រើប្រាស់រថយន្តកើនឡើង, ពលរដ្ឋមានចំណូល ឬមានសមត្ថភាពក្នុងការទិញរថយន្តថ្មី និងពលរដ្ឋកម្ពុជាមានការយល់ដឹងទៅលើការប្រើប្រាស់រថយន្ត ។ កាលណាគាត់ទិញយកទៅប្រើ គឺធ្វើឱ្យគាត់មានសុវត្ថិភាពខ្ពស់ និងចំណាយលើការថែទាំអស់ប្រាក់តិចជាងរថយន្តជជុះ ។
លោកបន្ថែមថា នៅក្នុងឆមាសទី១នេះ ក្រុមហ៊ុនសម្រេចបានការលក់រថយន្តប្រហែល១ពាន់គ្រឿង ហើយរំពឹងថា នៅឆមាសបន្ទាប់នឹងនៅតែទទួលបានកំណើនដូចឆមាសទី១ដែរ ខណៈការលក់រថយន្តកាលពីមុន ទទួលបានចំណាត់ថ្នាក់នាំមុខគេនៅលើទីផ្សារកម្ពុជា ។
តាមរបាយការណ៍របស់មន្ទីរសាធារណការ និងដឹកជញ្ជូនរាជធានីភ្នំពេញ គិតត្រឹមដំណាច់ខែមិថុនាឆ្នាំនេះ ចំនួនយានយន្តគ្រប់ប្រភេទដែលកំពុងចរាចរនៅក្នុងរាជធានីភ្នំពេញ បានកើនឡើងដល់ជាង២លាន១សែន៩ម៉ឺនគ្រឿង ។ ដោយឡែកនៅទូទាំងប្រទេសកម្ពុជា ចំនួនរថយន្តនៅក្នុងប្រទេសកម្ពុជា មានជិត១លានគ្រឿង និងម៉ូតូប្រមាណជាង៦លានគ្រឿង ៕
ចែករំលែកព័តមាននេះ